- అవినీతి ఖాకీలకు కీలక పోస్టులు
- ఠాణాలలో ఇప్పటికీ కొనసాగుతున్న వైనం
- బదిలీ అయినా మరో స్టేషన్లలోనే కొత్త పోస్టింగ్లు
- సెటిల్మెంట్ ఆరోపణలున్న ఏసీపీ సస్పెన్షన్
నిజామాబాద్, వెలుగు: జిల్లాలోని కొందరు పోలీసు ఆఫీసర్ల తీరు అత్యంత వివాదాస్పదంగా మారింది. ఇసుక, మొరం మాఫియా నడుపుతూ ప్రైవేట్సెటిల్మెంట్లతో గీత దాటారు. డీఐజీ కార్యాలయం సీక్రెట్గా కొందరి అవినీతి కార్యకలాపాల వివరాలు తెప్పించుకొని శాఖాపరమైన విచారణకు సీపీని ఆదేశించడం సంచలనంగా మారింది. కొందరు అధికారులు లా అండ్ ఆర్డర్ డ్యూటీలు కేటాయించొద్దని స్పష్టమైన ఆదేశాలుండగా .. జిల్లాలో మాత్రం వారికి కీలకమైన పోస్టింగ్లు ఇవ్వడం చర్చనీయాంశమైంది.
తొమ్మిది మంది ఎస్ఐలు, ఇద్దరు సీఐలు
జిల్లాలోని మంజీరా పరీవాహక ప్రాంతంతోపాటు వాగుల మీదుగా ఇసుక అక్రమ రవాణా నిత్యకృత్యమైంది. నెలవారీగా ఒక ట్రాక్టర్కు రూ.10 నుంచి రూ.20 వేలు తీసుకొని అక్రమ దందాను ప్రోత్సహిస్తున్నారు. కొన్ని విలేజ్లలో 20కి తగ్గకుండా ట్రాక్టర్లు ఇసుక అక్రమ రవాణా చేస్తున్నారు. మరో పక్క మొరం మాఫియా ప్రొక్లెయిన్లతో గుట్టలను తవ్వేస్తున్నారు. ప్రైవేట్సెటిల్మెంట్లలో పోలీసుల ఇన్వాల్వ్మెంట్ఆందోళనకరంగా మారింది. ఇలా విచ్చలవిడి అక్రమాలతో రూ.లక్షలు ఆర్జిస్తున్న తొమ్మిది మంది ఎస్ఐలు, ఇద్దరు సీఐల అవినీతి చిట్టాను డీఐజీ ఆఫీస్ సేకరించింది. శాఖాపరమైన విచారణకు ఆదేశిస్తూ సెప్టెంబర్ 4న అప్పటి సీపీ కల్మేశ్వర్కు డీఐజీ నుంచి లెటర్ చేరింది. అవినీతికి పాల్పడిన వారిని తక్షణం ట్రాన్స్ఫర్ చేయాలనే ఆదేశించినా బేఖాతర్ చేస్తున్నారు.
విధులు యధాతథం..
బోధన్ డివిజన్పరిధిలోని కోటగిరి, పోతంగల్ ఏరియాల ఎస్ఐ సందీప్ ఇప్పటికీ అక్కడే విధులు నిర్వహిస్తున్నారు. వర్నితో పాటు చందూర్, మోస్రా మండలాలు పర్యవేక్షిస్తున్న ఎస్ఐ కృష్ణ, రెంజల్ ఎస్ఐ సాయన్న, జక్రాన్పల్లి ఎస్ఐ తిరుపతి, ఇందల్వాయి ఎస్ఐ మనోజ్అక్కడే కొనసాగుతున్నారు. డీఐజీ ఆదేశాలకు భిన్నంగా ధర్పల్లి నుంచి ఎస్ఐ విక్రం మోర్తాడ్ ఠాణాకు బదిలీ కాగా బోధన్ రూరల్ స్టేషన్ లో పనిచేసిన నాగ్నాథ్ కమ్మర్పల్లి ఠాణాలో పోస్టింగ్ పొందారు.
ఇందుకు వారు తమ పలుకుబడి ఉపయోగించినట్లు ప్రచారం జరుగుతోంది. సిరికొండ ఎస్ఐ రమేశ్కు ఎస్బీకి బదిలీ కాగా రుద్రూర్, మాక్లూర్ఎస్ఐలు అప్పారావు, సుధీర్రావు మాత్రమే ట్రాన్స్ఫర్లతో పక్క జిల్లాలకు వెళ్లారు. భీంగల్ సీఐ శ్రీనివాస్ ఆర్మూర్కు ట్రాన్స్ఫర్ చేయించుకోగా జిల్లా ఆఫీసర్లు అయనను జాయిన్ చేసుకోకుండా ఆపారు. బోధన్ ఎస్హెచ్వో వీరయ్యను నిజామాబాద్ ట్రాఫిక్ సీఐగా లూప్లైన్లో నియమించారు. డీఐజీ ఆదేశాల ప్రకారం ఇందులో ఇంకా ఎవరిపైనా విచారణ మొదలుకాకపోవడం ఆశ్చర్యం వేస్తోంది.
ఏసీపీపై వేటు
టాస్క్ఫోర్స్ వింగ్లో ఏసీపీగా పనిచేస్తూ సెటిల్మెంట్ వివాదాలు ఎదుర్కొన్న విష్ణుమూర్తి సస్పెండ్ అయ్యారు. ఈనెల 11న డీఐజీ ఆఫీస్కు ఆయన్ను అటాచ్ చేశాక విచారణ చేపట్టి జిల్లా నుంచి వెళ్లిన రిపోర్టు మేరకు రెండు రోజుల కింద వేటు వేస్తూ ఉత్తర్వులు జారీ చేశారు.
ఆయనకు సహకరించిన కానిస్టేబుళ్లు రాములు, సుధాకర్ లను కూడా సస్పెండ్ చేసి మరో ఏడుగురు టాస్క్ఫోర్స్ పోలీసులను బదిలీ చేశారు. సీపీ కల్మేశ్వర్నాలుగు రోజుల కింద ట్రాన్స్ఫర్పై వెళ్లిపోయాక ఇన్చార్జి సీపీగా కామారెడ్డి ఎస్పీ సింధూశర్మ వ్యవహరిస్తున్నారు. డీఐజీ లెటర్ ప్రకారం అవినీతి ఎస్ఐల పట్ల ఎలా ఉంటారనేది చర్చనీయాంశమైంది.
