మంచిర్యాల, వెలుగు: మంచిర్యాల ఐబీ చౌరస్తా సమీపంలో మంగళవారం అర్ధరాత్రి సిద్దిపేట జిల్లా బెజ్జంకి ఎస్సై ఆవుల తిరుపతి, అతడి ఫ్రెండ్స్ వీరంగం సృష్టించారు. హాజీపూర్ మండలం వేంపల్లికి చెందిన తిరుపతి దీపావళి పండుగ సందర్భంగా స్వగ్రామానికి వచ్చాడు. ఏడుగురు ఫ్రెండ్స్తో కలిసి ఐబీ చౌరస్తా సమీపంలోని ఓ బార్ పక్కన రోడ్డుపై మద్యం తాగారు. గవర్నమెంట్హాస్పిటల్లో డ్యూటీ ముగించుకొని ఇంటికి వెళ్తున్న ఓ మహిళా వైద్య సిబ్బందిని ఈలలు వేస్తూ టీజింగ్ చేశారు. ఆమె తన భర్తకు ఫోన్ చేసి విషయం చెప్పగా అతడు డయల్ 100కు ఫిర్యాదు చేశాడు. సమాచారం అందుకున్న బ్లూకోల్ట్స్కానిస్టేబుళ్లు వెంటనే ఘటనా స్థలానికి చేరుకున్నారు.
ఎస్సై తిరుపతి గ్యాంగ్ను అక్కడి నుంచి పంపించే క్రమంలో బ్లూకోల్ట్స్ సిబ్బందిపైనే దాడికి దిగారు. వాళ్ల దగ్గరున్న ట్యాబ్లు పగలగొట్టి సెల్ఫోన్లు గుంజుకున్నారు. స్థానికులు వారిని పట్టుకునేందుకు ప్రయత్నించడంతో కారు వదిలేసి అక్కడినుంచి పారిపోయారు. ఈ ఘటనలో బ్లూకోల్ట్కానిస్టేబుళ్లు ఉస్మాన్, సంపత్కు గాయాలయ్యాయి. పోలీసుల డ్యూటీకి ఆటంకం కలిగించి దాడి చేశారని ఆవుల తిరుపతి, అతని ఏడుగురు ఫ్రెండ్స్ పై ఐపీసీ 333తో పాటు పలు సెక్షన్ల కింద కేసులు నమోదు చేశారు. బుధవారం సాయంత్రం తిరుపతి, అనురాగ్, వినయ్ కుమార్, నవీన్ను అరెస్టు చేసి కోర్టులో హాజరు పరిచారు. వారికి కోర్టు 14 రోజుల రిమాండ్ విధించింది. మిగతా నలుగురు పరారీలో ఉన్నారు. సీసీ టీవీ ఫుటేజీలు పరిశీలించి తదుపరి చర్యల కోసం ఉన్నతాధికారులకు రిపోర్టు చేస్తామని ఏసీపీ తిరుపతిరెడ్డి చెప్పారు.
