డిఫెండింగ్ ఛాంపియన్ గా భారత గడ్డపై అడుగు పెట్టిన ఇంగ్లాండ్ కి అనూహ్య ఫలితాలు ఎదురవుతున్నాయి. టైటిల్ ఫేవరేట్స్ ఒకటైన బట్లర్ సేన ఆశించని స్థాయిలో మెప్పించలేకపోతుంది. తొలి మూడు మ్యాచుల్లో బలహీనమైన బంగ్లాదేశ్ పై మాత్రమే విజయం సాధించింది. ప్రారంభ మ్యాచులో న్యూజిలాండ్ భారీ పరాజయాన్ని చవి చూసిన ఇంగ్లీష్ టీంకి పసికూన ఆఫ్ఘనిస్థాన్ ఊహించని షాక్ ఇచ్చింది. దీంతో ఇంగ్లాండ్ సెమీస్ అవకాశాలు సంక్లిష్టం అయ్యాయనే వాదనలు వినిపిస్తున్నాయి. ఈ నేపథ్యంలో ఇంగ్లాండ్ స్టార్ ప్లేయర్లు స్టోక్స్, ఆర్చర్ ని బరిలోకి దించబోతుంది.
ప్రస్తుతం గాయం నుంచి కోలుకున్న స్టోక్స్ నేడు సౌత్ ఆఫ్రికా మ్యాచుకు అందుబాటులో ఉంటున్నట్లు తెలుస్తుంది. గాయం కారణంగా తొలి మూడు మ్యాచుల్లో బరిలోకి దిగని ఈ స్టార్ ఆల్ రౌండర్ నేడు సౌత్ ఆఫ్రికా మ్యాచుకు తుది జట్టులోకి రావడం దాదాపుగా ఖాయమైంది. ఇక స్టార్ పేసర్ ఆర్చర్ కూడా తాజాగా ఇంగ్లాండ్ జట్టులో చేరాడు. ఇప్పటికే భారత్ కి చేరుకున్న ఆర్చర్.. మోచేతి గాయం నుంచి కోలుకుంటున్నాడు.
ALSO READ : హైదరాబాద్ బాయ్స్ హాస్టల్ లో అగ్నిప్రమాదం.. కాలిపోయిన బట్టలు, వస్తువులు
గాయంతో ఆర్చర్ మార్చి నుంచి ఇంగ్లండ్ తరఫున ఆడలేదు. ఇంగ్లండ్‌కు చెందిన ఆరుగురు ఫ్రంట్‌లైన్ సీమర్‌లలో ఒకరికి గాయం అయితే ఆర్చర్ సిద్ధంగా ఉంటాడని ఇంగ్లాండ్ యాజమాన్యం తెలిపింది. దీంతో త్వరలో ఆర్చర్ కూడా ప్లేయింగ్ 11 లో ఉండనున్నట్లు తెలుస్తుంది. ఇప్పటికే స్టోక్స్ ఎంట్రీతో బలంగా తయారైన ఇంగ్లాండ్.. ఆర్చర్ కూడా వస్తే ఇక తిరుగుండదు. వీరిద్దరూ కూడా 2019 లో ఇంగ్లండ్ వరల్డ్ కప్ గెలవడంతో కీలక పాత్ర పోషించారు. మరి ప్రస్తుతం కష్టాల్లో ఉన్న ఇంగ్లాండ్ జట్టును ఈ స్టార్ ప్లేయర్ల రాకతో వరుస విజయాల బాట పడుతుందేమో చూడాలి.
