రాష్ట్రానికి మూడో ‘వందే భారత్’..ట్రైన్ షెడ్యూల్ ఇదే..

• రేపు వర్చువల్​గా ప్రారంభించనున్న  ప్రధాని మోదీ
•  కాచిగూడలో జెండా ఊపనున్న గవర్నర్, కేంద్ర మంత్రి కిషన్ రెడ్డి
•  కాచిగూడ నుంచి బెంగళూరు వరకు ట్రైన్ 

హైదరాబాద్, వెలుగు: రాష్ట్రానికి మూడో వందే భారత్ ఎక్స్ ప్రెస్ సాంక్షన్ అయింది. కాచిగూడ (హైదరాబాద్)  నుంచి యశ్వంతపూర్ (బెంగళూరు) వరకు నడవనున్న ఈ ఎక్స్ ప్రెస్ ను ఈ నెల 24న (ఆదివారం) ఢిల్లీ నుంచి ప్రధాని నరేంద్ర మోదీ వర్చువల్ గా ప్రారంభిస్తారని కేంద్ర మంత్రి కిషన్ రెడ్డి శుక్రవారం ఓ ప్రకటనలో తెలిపారు. వినాయక చవితి కానుకగా రాష్ట్ర ప్రజలకు మోదీ ఈ ట్రైన్ ను ఇస్తున్నారని ఆయన పేర్కొన్నారు. మూడు వందే భారత్ ఎక్స్ ప్రెస్ రైళ్లు నడుస్తున్న రాష్ట్రం తెలంగాణ మాత్రమేనని తెలిపారు. సంక్రాంతి కానుకగా.. సికింద్రాబాద్ – విశాఖపట్నం రైలును, ఉగాది కానుకగా సికింద్రాబాద్ – -తిరుపతి రైలును కేంద్రం ప్రారంభించగా.. ఇప్పుడు గణపతి నవరాత్రుల కానుకగా.. కాచిగూడ – -బెంగళూరు వందే భారత్ రైలును ప్రారంభిస్తున్నదని వెల్లడించారు.  కాగా, కాచిగూడలో గవర్నర్ తమిళి సై, కేంద్ర మంత్రి కిషన్ రెడ్డి జెండా ఊపి ట్రైన్ ను ప్రారంభించనున్నారు. ట్రైన్ ఓపెనింగ్ పోగ్రాంకు అటెండ్ కావాలని సీఎం కేసీఆర్ కు దక్షిణ మధ్య రైల్వే అధికారులు ఇన్విటేషన్ పంపారు. 

ట్రైన్ షెడ్యూల్ ఇదే.. 

•     బుధవారం మినహా ప్రతిరోజూ కాచిగూడ నుంచి ఉదయం 5.30 గంటలకు రైలు బయలుదేరుతుంది. మహబూబ్‌‌నగర్ (6.59), కర్నూల్ సిటీ (8.39), అనంతపురం (10.54) స్టేషన్లలో ఆగుతూ యశ్వంతపూర్ (మధ్యాహ్నం 2.15) చేరుకుంటుంది.

•     మధ్యాహ్నం 3గంటలకు యశ్వంతపూర్‌‌నుంచి బయలుదేరి, అనంతపురం (5.40), కర్నూల్ సిటీ (7.50), మహబూబ్‌‌నగర్ (21.39) స్టేషన్లలో ఆగుతూ రాత్రి 11.15 గంటలకు కాచిగూడ చేరుకుంటుంది.

•     ఆదివారం మాత్రం మధ్యాహ్నం 12.30 గంటలకు కాచిగూడ నుంచి బయలుదేరి.. ఫలక్‌‌నుమా, ఉందానగర్, షాద్‌‌నగర్, జడ్చర్ల, మహబూబ్‌‌నగర్, దేవరకద్ర, గద్వాల్, కర్నూల్ సిటీ, డోన్, పెండేకల్లు జంక్షన్, గుత్తి, కల్లూరు, అనంతపుం, ధర్మవరం జంక్షన్, పెనుగొండ, రంగేపల్లి, హిందూపూర్, తొండెబావి, యలహంక జంక్షన్, లొట్టేగొల్లహల్లి మీదుగా యశ్వంతపూర్ చేరుకుంటుంది.