రాజులకే రాజు చక్రవర్తి. శ్రీమంతులను మించిన ధనవంతుడు ఈ ‘లగ్జరీ’ చక్రవర్తి. ప్రపంచానికి ‘సిరి’కొత్త కుబేరుడనే టైటిల్ సాధించటానికి అడుగు దూరంలోనే ఉన్నాడు. ‘రేపో.. మాపో..’ అనేంత జెట్ స్పీడ్లో ఆ రికార్డ్ సృష్టించటానికి రెడీ అయ్యాడు. ఆ బిలియనీర్ పేరే బెర్నార్డ్ ఆర్నాల్ట్. దేశం: ఫ్రాన్స్. వయసు: 70 ఏళ్లు. సంపద: రూ.7 లక్షల 70 వేల కోట్లు. కష్టాల్లో ఉన్న టెక్స్టైల్ కంపెనీ కొని, బిజినెస్ చేసి, ఈ రోజు వరల్డ్లోనే అతి పెద్ద లగ్జరీ గూడ్స్ గ్రూపుగా డెవలప్ చేశారు. 1984లో ప్రారంభమైన ఈ శ్రీమంతుడి ప్రస్థానం 35 ఏళ్లుగా సాగుతోంది.
బెర్నార్డ్ ఆర్నాల్ట్ గ్రూపులోని 75 కంపెనీల లిస్టులో లేటెస్ట్గా టిఫానీ చేరింది. దీంతో సంపాదనలో బిల్గేట్స్ని మించిపోయారు. అమెజాన్ సీఈవో బెజోస్ని వెనక్కి నెట్టడమే తరువాయి. ‘ప్రపంచంలోనే నంబర్–1 రిచ్ పర్సన్’ ర్యాంక్ సొంతం చేసుకుంటారు ఋ. కేవలం రూ.15 వేల కోట్లు వస్తే చాలు. అదీ జరిగిపోతుంది. ఆర్నాల్ట్ ఆదాయం రోజురోజుకీ పెరుగుతున్న నేపథ్యంలో ఈ ల్యాండ్మార్క్ని చేరుకోవటం పెద్ద లెక్కేం కాదు. ఆయనకు ఇలాంటి ఎదుగుదల ఎలా సాధ్యమైంది?.
వ్యాపార సూత్రం ఇదే!
‘విలాస వస్తువులే విశేష లాభాలు తెస్తాయి’ అని ఆర్నాల్ట్ అంటుంటారు. దీన్నే బిజినెస్ సూత్రంగా ఫాలో అయ్యారు. డ్రింక్స్, ఫ్యాషన్, లెదర్ గూడ్స్, జొవెలరీ, వాచ్లు, పెర్ఫ్యూమ్స్, కాస్ట్యూమ్స్ ఇలా 70కిపైగా వ్యాపార రంగాల్లోకి అడుగుపెట్టారు. పట్టిందల్లా బంగారం చేశారు. ఆర్నాల్ట్కి ఆదాయం ఎక్కువగా ‘లూయిస్ వ్యుట్టన్ మోయెత్ హెన్నెస్సీ’(ఎల్వీఎంహెచ్) సంస్థలో తన ఫ్యామిలీకి ఉన్న 47 శాతం వాటాల ద్వారా వస్తోంది. ఆ కంపెనీకి ఆయన చైర్మన్, సీఈఓ కూడా.
ఎల్వీఎంహెచ్కి ఊహించని లాభాలు వస్తుండటంతో కంపెనీ షేర్లు ఈ ఏడాది ఇప్పటికి 55 శాతానికి పెరిగాయి. ఇప్పుడు ఈ గొడుగు కిందికి వచ్చిన టిఫ్ఫానీ కూడా అద్భుత పనితీరు కనబరిస్తే ఆర్నాల్ట్ రాబడి మరింత పెరగటం ఖాయం. లగ్జరీ అంటే ఇష్టపడే మిడిల్ క్లాస్ కస్టమర్లను(ముఖ్యంగా ఆసియా ప్రాంతంలో) ఆకట్టుకుంటూ వేగంగా అభివృద్ధి చెందుతున్న టిఫానీని కొనాలని ఆర్నాల్ట్ ఎప్పటినుంచో అనుకుంటున్నారు. అది ఇప్పటికి నెరవేరింది.
అన్నీ ఒకే చోటే దొరికితే..
కస్టమర్లు లగ్జరీ బ్యాగ్లు కొంటే వాటిని ఖాళీగా ఇంటికి పట్టుకుపోరు. ఏదో ఒక వస్తువు తీసుకొని అందులో వేసుకొని పోతారు. ఆ వస్తువు ఏదైనా కావొచ్చు. డ్రెస్లు, షూ, నగలు.. ఇలాంటివి షాపింగ్ చేస్తారు. అదే సమయంలో టైమ్పాస్ కోసం డ్రింక్స్ తాగుతారు. వీటన్నింటినీ ఒకే కంపెనీ వేర్వేరు బ్రాండ్నేమ్లతో తయారుచేసి ఒకే చోట దొరికేలా చేస్తే ఎంత బాగుంటుంది?. ఈ ఐడియానే ఎల్వీఎంహెచ్ని పాపులర్ చేసింది. కస్టమర్ల ఆలోచనలకు తగ్గట్లు వ్యాపారాన్ని మార్చుకుంటూ దూసుకుపోతోంది.
పాలిటెక్నిక్ చదివి..
ఫ్రాన్స్లోని రౌబైక్స్ ప్రాంతానికి చెందిన ఇండస్ట్రియలిస్టుల ఫ్యామిలీలో 1949 మార్చి 5న పుట్టిన ఆర్నాల్ట్ చిన్నప్పుడు లోకల్ స్కూల్స్లోనే చదువుకున్నారు. తర్వాత దేశంలోనే గొప్ప పేరున్న ఎకోల్ పాలిటెక్నిక్ కాలేజీలో చదివారు. కుటుంబ సంస్థ ఫెర్రెట్–సావినెల్ కన్స్ట్రక్షన్ కంపెనీలో ఇంజనీర్గా కెరీర్ ప్రారంభించారు. వివిధ ఎగ్జిక్యూటివ్ మేనేజ్మెంట్ పొజిషన్లకు ప్రమోటై వయసు 30 ఏళ్లు నిండక ముందే 1978లో సంస్థ చైర్మన్ అయ్యారు.
ఇబ్బందుల్లో ఉన్న టెక్స్టైల్ కంపెనీని 1984లో టేకోవర్ చేసి తన వ్యాపార సామ్రాజ్య విస్తరణకు మూల స్తంభం చేశారు. పదేళ్లలో ఎల్వీఎంహెచ్లో పెద్ద వాటాదారయ్యారు. మోయెత్ హెన్నెస్సీ, లూయిస్ వ్యుట్టన్ అనే గ్రూపుల్ని మెర్జ్ చేసి కంబైన్డ్ గ్రూప్ ఎల్వీఎంహెచ్కి 30 ఏళ్లుగా సీఈవోగా ఉంటున్నారు. ఎన్నో పెద్ద సంస్థల్ని ఇట్టే కొనేశారు.
టెస్టు, టేస్టు, స్టైల్.. వీటిని బట్టే గ్రీన్సిగ్నల్
ఆర్నాల్ట్ చాలా విషయాల్లో టేస్టున్న వ్యక్తి. పర్సనల్గా ఫాలో అయ్యే లైఫ్స్టైల్ని బేస్ చేసుకొని ఆయా ప్రొడక్ట్ల బిజినెస్లలోకి ఎంటరవుతూ ఒక్కో మెట్టూ ఎక్కారు. కొత్తగా ఏదైనా వ్యాపారం చేయాలనుకున్నప్పుడు ఆ ప్రొడక్ట్లు అసలు తనకు నచ్చుతున్నాయా? లేదా? అని టెస్ట్, టేస్ట్ చేస్తారు. ఫలానా ఐటమ్ని తానెందుకు ఇష్టపడుతున్నానో స్టడీ చేసేవారు. అన్ని కోణాల్లో ఆలోచించాకే డీల్స్ ఓకే చేసేవారు.
రెండు దేశాల రాయబారిగా..
ఆర్నాల్ట్ఫ్రాన్స్ కల్చరల్ అంబాసిడర్గా పాపులర్. బీజింగ్ ఒలింపిక్స్కి ముందు ఫ్రాన్స్, చైనా మధ్య తలెత్తిన గొడవలు తీర్చటంలో ముఖ్య పాత్ర పోషించారు. ప్రపంచంలోని ప్రముఖులతో మంచి రిలేషన్స్ మెయింటెయిన్ చేస్తారు. 2017లో అమెరికా ప్రెసిడెంట్ డొనాల్డ్ ట్రంప్ని కలిసి ఆ దేశంలో తన కంపెనీ విస్తరణపై ఆయనతో మాట్లాడారు.
మెచ్చుకున్న ‘యాపిల్’ ఫౌండర్
యాపిల్ కంపెనీ ఫౌండర్ స్టీవ్ జాబ్స్తో ఆర్నాల్ట్ ఫ్రెండ్లీగా ఉండేవారు. ఒకసారి ఆర్నాల్ట్ని జాబ్స్ తెగ మెచ్చుకున్నారు. ‘మరో 50 ఏళ్లు యాపిల్ ఫోన్ సక్సెస్ఫుల్గా ఉంటుందో లేదో తెలియదు గానీ మీ కంపెనీ డ్రింక్ మాత్రం జనం వందేళ్లయినా మర్చిపోరు’ అన్నారట. ఫ్రాన్స్ మాజీ ప్రెసిడెంట్ నికోలస్ సర్కోజీతో కూడా ఆర్నాల్ట్ క్లోజ్గా మెలిగేవారు.
పర్ఫెక్ట్ పర్సనల్ లైఫ్
ఆర్నాల్ట్ ఎక్కువగా పారిస్లో ఉంటారు. ఐదుగురు పిల్లల్లో నలుగుర్ని వ్యాపారంలోకి తెచ్చారు. ఎప్పుడూ బిజీగా ఉన్నా స్టైలిష్గా ఉండటానికే ఇష్టపడతారు. ఆటలంటే చాలా ఇష్టం. తరచూ రాకెట్ పట్టుకొని టెన్నిస్ కోర్టులోకి దిగుతారు. తద్వారా తననుతాను ఫిట్గా ఉంచుకుంటారు. మ్యూజిక్ అన్నా ఆసక్తే. పాటలు పాడరు కానీ పియానో ప్లే చేస్తారు. పెయింటింగ్స్, బొమ్మలంటే ప్రాణం. ఆర్ట్ పీస్లను లెక్కలేనన్ని సేకరించారు.
ఇంధ్రభవనం లాంటి యాట్
బిలియనీర్లకు ప్రైవేట్ జెట్ విమానాలు ఉండటం సహజం. ఆర్నాల్ట్కీ అలాంటి సొంత విమానం ఉంది. దీంతోపాటు ఇంధ్రభవనాన్ని తలపించే యాట్ను ఆయన 2015లో 150 మిలియన్ డాలర్లు పెట్టి స్పెషల్గా డిజైన్ చేయించారు. దాని పేరు సింఫనీ. పొడవు 101 మీటర్లు. ఇందులో మొత్తం 16 క్యాబిన్లు ఉన్నాయి. 8 గదుల్లో 20 మంది గెస్టులు ఉండొచ్చు. మిగతా 8 రూముల్ని 18 మంది స్టాఫ్కి కేటాయించారు.
