భద్రాచలం, వెలుగు : భద్రాచలంలో గులాబీ పార్టీకి ఊహించని విధంగా షాక్లు తగులుతున్నాయి. ఇటీవల ఎమ్మెల్యే తెల్లం వెంకట్రావు పార్టీని వీడి కాంగ్రెస్లో చేరిన సంగతి తెలిసిందే. శుక్రవారం భద్రాచలం మండల బీఆర్ఎస్ ప్రధాన కార్యదర్శి కొండి శెట్టి కృష్ణ మూర్తి అలియాస్ కేకే రాజీనామా చేశారు. భద్రాచలంలోని కేకే ఫంక్షన్ హాలులో తన కేడర్తో ఆయన సమావేశమయ్యారు. ఈ సందర్భంగా కేకే మాట్లాడుతూ ఎమ్మెల్సీ తాతా మధు లోకల్ లీడర్లకు చెప్పకుండా పార్టీ మీటింగ్లు పెడుతున్నారంటూ ఆరోపించారు.
ఆయన ఒంటెద్దు పోకడలు నచ్చకనే పార్టీకి రాజీనామా చేస్తున్నట్లు తెలిపారు. ఆయనతో పాటు అభయాంజనేయస్వామి దేవస్థానం మాజీ ట్రస్టుబోర్డు చైర్మన్ తాళ్ల రవికుమార్, సీనియర్ నాయకులు చింతాడి రామకృష్ణ, పార్టీ మండల మహిళా కమిటీ అధ్యక్షురాలు జాస్తి గంగాభారతి, మాజీ ఎంపీటీసీ జ్యోతి, మాజీ మహిళా అధ్యక్షురాలు కేతినేని లలిత, బూత్ కమిటీ సభ్యులు, 100 కుటుంబాల సభ్యులు రాజీనామా చేసిన వారిలో ఉన్నారు.
