భద్రాచలం, వెలుగు : భద్రాచలం సీతారామచంద్రస్వామి శుక్రవారం భక్తులకు స్వర్ణ కవచాల్లో దర్శనం ఇచ్చారు. సుప్రభాత సేవ అనంతరం స్వామిని బంగారు కవచాల్లో అలంకరించి విశేష హారతులిచ్చారు. లక్ష్మీతాయారు అమ్మవారికి పంచామృతాలతో అభిషేకం చేసి, లక్ష్మీ అష్టోత్తర పూజలు నిర్వహించారు. ఈ సందర్భంగా కుంకుమార్చన, విష్ణు సహస్ర పారాయణం జరిగింది. కల్యాణమూర్తులను ఊరేగింపుగా బేడా మండపానికి తీసుకొచ్చి నిత్య కల్యాణం చేశారు.
కంకణాలు ధరించిన భక్తులు క్రతువును నిర్వహించి తీర్థప్రసాదాలు స్వీకరించారు. మాధ్యాహ్నిక ఆరాధనలు తర్వాత సాయంత్రం అద్దాల మండపంలో దర్బారు సేవ చేసి సంధ్యాహారతిని సమర్పించారు.
