- శ్రీరామనవమి ఏర్పాట్ల రివ్యూ
భద్రాచలం, వెలుగు : శ్రీరామనవమి, మహాపట్టాభిషేకం ఉత్సవాల నిర్వహణకు అప్పగించిన విధులను బాధ్యతగా నిర్వహించాలని ఎండోమెంట్ కమిషనర్ శ్రీధర్ సూచించారు. భద్రాచలం ఆర్డీవో ఆఫీసులో కలెక్టర్ జితేశ్ వి పాటిల్ అధ్యక్షతన బుధవారం నిర్వహించిన జిల్లా స్థాయి ఆఫీసర్ల రివ్యూ మీటింగ్లో ఆయన మాట్లాడారు. భద్రాద్రికి, పర్ణశాలకు భక్తులు ఈసారి ఊహించిన దాని కంటే ఎక్కువ సంఖ్యలో వస్తారని, ఏర్పాట్లు పక్కాగాఉండాలని ఆదేశించారు.
ఇప్పటికీ కొన్ని పనులు పూర్తి కాకపోవడంపై అసంతృప్తి వ్యక్తం చేశారు. ఏప్రిల్ 4న అన్ని శాఖలు తాము కల్పించిన సదుపాయాలపై ట్రయల్ రన్ నిర్వహించుకోవాలని సూచించారు. సీఎం రేవంత్రెడ్డి, ఇతర వీవీఐపీలు, వీఐపీలు వస్తున్నందున భద్రత విషయంలో జాగ్రత్తలు తీసుకోవాలని చెప్పారు. ఫైర్, పోలీస్, రెవెన్యూ, పంచాయతీ, ఆర్డబ్ల్యూఎస్ఈ శాఖలు అలర్ట్ గా ఉండాలని తెలిపారు. కలెక్టర్ జితేశ్ మాట్లాడుతూ భక్తులకు 75 శాతం టిక్కెట్లు ఆన్లైన్లో ఉంచామన్నారు.
తలంబ్రాలు, లడ్డూ ప్రసాదాలు ఇవ్వడానికి యాక్షన్ ప్లాన్ సిద్ధం చేశామని తెలిపారు. సీఎం రాక కోసం మూడు హెలీప్యాడ్లు సిద్ధం చేశామన్నారు. మిథిలాస్టేడియం వద్ద నాలుగు ఫైరింజన్లు, ఆరోగ్యశాఖ ద్వారా 13 మెడికల్ క్యాంపులు, 5 అంబులెన్సులు, 30 మంది ఫీల్డ్ స్టాఫ్, ఏరియా ఆస్పత్రిలో 24 గంటలు పనిచేసే ప్రత్యేక వార్డు, మందులు, ఓఆర్ఎస్ ప్యాకెట్లు అందుబాటులో ఉంచామన్నారు. 6,7 తేదీల్లో మద్యం దుకాణాలు మూసివేస్తున్నట్లు ప్రకటించారు. సిబ్బంది ఎవరైనా న్యూసెన్స్ సృష్టిస్తే సహించేది లేదని హెచ్చరించారు. ఈ సమావేశంలో అడిషనల్ కలెక్టఱ్ వేణుగోపాల్, ఐటీడీఏ పీవో రాహుల్, ఈవో రమాదేవి, ఏఎస్పీ విక్రాంత్కుమార్ సింగ్, ఆర్డీవో దామోదర్ పాల్గొన్నారు.
