2015లో ప్రారంభమైన భద్రాచలం-విజయవాడ హైవే పనులు
భద్రాద్రికొత్తగూడెం, వెలుగు :భద్రాద్రి కొత్తగూడెం జిల్లాలో భద్రాచలం– విజయవాడ నేషనల్ హైవే పనులు ఏడేండ్లయినా పూర్తి కాలేదు. కొత్తగూడెం మున్సిపాలిటీ పరిధి రుద్రంపూర్నుంచి పాల్వంచ, లక్ష్మీదేవిపల్లి, బూర్గంపహడ్ల మీదుగా జిల్లాలో సుమారు
50కి.మీ హైవే నిర్మించనున్నారు. దీని కోసం రూ.220 కోట్లు కేటాయించారు. అయితే హైవే పనులు ఏడేండ్లుగా సాగుతూనే ఉన్నాయి.. దీంతో ప్రజలు తీవ్ర ఇబ్బందులు పడుతున్నారు. కొవిడ్ తర్వాత నిర్మాణ ఖర్చు పెరగడంతో ఎస్టిమేషన్పెంచాలని ఉద్దేశంతో కాంట్రాక్టర్హైవే నిర్మాణంలో జాప్యం చేస్తున్నారన్న ఆరోపణలున్నాయి.
2015లో స్టార్ట్ అయిన పనులు
జిల్లాలో రుద్రంపూర్నుంచి భద్రాచలం వరకు 2015లో ఈ హైవే పనులు ప్రారంభించారు. నాలుగేండ్లలో పనులు పూర్తి చేయాల్సి ఉంది. మొదట్లో కొంత స్పీడ్గా పనులు చేసిన కాంట్రాక్టర్ తర్వాత నిర్లక్ష్యంగా వ్యవహరిస్తున్నారన్న ఆరోపణలున్నాయి. దీంతో పనుల్లో వేగం తగ్గింది. ముఖ్యంగా జిల్లా కేంద్రమైన కొత్తగూడెం పట్టణంలో పనులు స్లోగా నడుస్తుండటంతో జనం ఇబ్బందులు పడుతున్నారు. రామవరం, సింగరేణి హెడ్డాఫీస్, పోస్టాఫీస్ సెంటర్ల, మున్సిపాలిటీ ప్రాంతాల్లో డ్రైనేజీలు అసంపూర్తిగా నిర్మించడంతో మురుగునీరు నిల్వ ఉండి దోమలు పెరుగుతున్నాయి. మరో వైపు రోడ్డు పక్కన నిర్మిస్తున్న ఫుట్ పాత్లు అసంపూర్తిగా ఉండడంతో పాదచారులకు అవస్థలు తప్పడం లేదు. ఏళ్లకొద్దీ పనులు సాగుతుండడం, పనుల్లో క్వాలిటీ లేకపోవడంతో వర్క్స్ పూర్తి కాకుండానే రోడ్డు శిథిలావస్థకు చేరుతోంది. అధికారుల పర్యవేక్షణ లేక కాంట్రాక్లర్లు ఇష్టారీతిన పనిచేస్తున్నారన్న ఆరోపణలున్నాయి. రామవరం, శ్రీనగర్ ప్రాంతాల్లో బ్రిడ్జిలను అసంపూర్తిగా వదిలేశారు. కొన్ని ప్రాంతాల్లో రోడ్డుపై నుంచి వరద నీరు రోడ్డు డ్రైనేజీలలోకి వెళ్లే పరిస్థితి లేదు. ఇల్లందు క్రాస్ రోడ్డు వద్ద జంక్షన్ పనులు ఏడాదిన్నరగా అసంపూర్తిగానే ఉన్నాయి. దీంతో రాత్రిపూట రోడ్డు ప్రమాదాలు జరుగుతున్నాయి. పనులను స్పీడప్చేయాలని జరిగిన మీటింగ్లలో కలెక్టర్ అధికారులు, కాంట్రాక్టర్లను పలుమార్లు ఆదేశించినా వారిలో చలనం కనిపించడం లేదు. కొవిడ్తర్వాత నిర్మాణ వ్యయం పెరగడంతో కాంట్రాక్టర్ పనులు చేయడంలో కొంత నిర్లక్ష్యంగా వ్యవహరిస్తున్న మాట నిజమేనని నేషనల్ హైవే అధికారులు చెబుతున్నారు. కాంట్రాక్టర్ అందుబాటులో లేరని, పనులను చేయించేందుకు కృషి చేస్తున్నామని అధికారులు పేర్కొంటున్నారు.
