- రూ.లక్షల్లో వసూలు చేసిన కలెక్టరేట్ క్యాంప్ ఆఫీస్ ఉద్యోగి
- విచారణకు ఆదేశించిన కలెక్టర్
భద్రాద్రికొత్తగూడెం, వెలుగు: భద్రాద్రికొత్తగూడెం కలెక్టరేట్, మెడికల్ కాలేజీతో పాటు జీజీహెచ్లో ఔట్ సోర్సింగ్లో ఉద్యోగాలిప్పిస్తానంటూ కలెక్టర్ క్యాంప్ ఆఫీస్లో పని చేసే ఉద్యోగి రూ. లక్షల్లో వసూలు చేశాడు. విషయం తెలిసి ఉద్యోగిపై కలెక్టర్ సీరియస్ అయ్యారు. కానీ, అప్పటికే ఆ ఉద్యోగి పారిపోయాడు.
కలెక్టరేట్లో ఫోర్త్ క్లాస్ ఎంప్లాయ్గా హర్షద్ కొంత కాలంగా కలెక్టర్ క్యాంప్ ఆఫీస్లో పని చేస్తున్నారు. గ్రీవెన్స్ కుఉద్యోగాల కోసం వచ్చే నిరుద్యోగులకు ఉద్యోగాలు ఇప్పిస్తానంటూ నమ్మించాడు. ఒక్కో ఉద్యోగానికి రూ. లక్ష నుంచి రూ. 1.50 లక్షలు ఇచ్చేలా బేరం కుదుర్చుకున్నాడు. ఇలా రూ.50 వేల నుంచి రూ. లక్ష చొప్పున అడ్వాన్స్గా తీసుకున్నాడు. వర్క్ ఆర్డర్ ఇచ్చిన తరువాత మిగిలిన డబ్బులు ఇవ్వాలని ఒప్పందం చేసుకున్నారు.
ఇటీవల కొందరికి నకిలీ వర్క్ ఆర్డర్ కాపీలను ఇచ్చాడు. ఈ క్రమంలో కొందరు వర్క్ ఆర్డర్ తీసుకొని మెడికల్ కాలేజీతో పాటు తమకు చెప్పిన డిపార్ట్మెంట్లకు వెళ్లగా, ఫేక్ ఆర్డర్ కాపీలని ఆఫీసర్లు తేల్చారు. బాధితులు హర్షద్ కు ఫోన్ చేయగా, ఏదో పొరపాటు జరిగిందంటూ పది రోజులుగా నమ్మిస్తూ వచ్చాడు. ఈ విషయాన్ని కలెక్టర్ దృష్టికి తీసుకెళ్లడంతో, ఇది గమనించిన హర్షద్ పరారయ్యాడు. ఈ వ్యవహారంపై విచారణ చేయాలని ఆఫీసర్లను కలెక్టర్ ఆదేశించారు.
