భద్రాద్రికొత్తగూడెం, వెలుగు: భద్రాద్రికొత్తగూడెం ఇంటిగ్రేటెడ్ కలెక్టరేట్ నిర్మాణం నాలుగు నెలల కింద పూర్తయినప్పటికీ సీఎం కేసీఆర్ పర్యటన ఖరారు కాక పోవడంతో ఓపెనింగ్కు నోచుకోవడం లేదు. సొంత భవనాలు లేక అద్దె బిల్డింగ్ లు, శిథిల భవనాల్లో పని చేస్తున్న ఉద్యోగులు కొత్త బిల్డింగ్లోకి ఎప్పుడెప్పుడు వెళ్దామా అని ఎదురు చూస్తున్నారు. మే నెలలోనే సీఎం వచ్చే అవకాశం ఉందని పనులను స్పీడప్‌ చేశారు. పాల్వంచలో నిర్మించిన ఇంటిగ్రేటెడ్ కలెక్టరేట్లో జిల్లా ఆఫీసులకు కలెక్టర్ అనుదీప్ గదులను కూడా కేటాయించారు. కలెక్టరేట్ నిర్మాణానికి నాలుగున్నరేండ్లు పట్టగా, ఓపెనింగ్కు ఇంకెన్నాళ్లు వేచి చూడాలోనని ఆఫీసర్లు, ప్రజలు అంటున్నారు.
రూ.48 కోట్లతో..
కొత్త జిల్లాలు ఏర్పడిన తర్వాత ఇంటిగ్రేటెడ్ కలెక్టరేట్లు నిర్మించాలని ప్రభుత్వం నిర్ణయించింది. జిల్లాలోని పాల్వంచలో సమీకృత కలెక్టరేట్ నిర్మాణానికి 2017లో ఉత్తర్వులు జారీ చేసింది. 2018 ఫిబ్రవరిలో బిల్డింగ్ పనులకు శంకుస్థాపన చేశారు. నిధుల లేమితో పనులు నెమ్మదిగా సాగాయి. కలెక్టర్ అనుదీప్ ప్రత్యేక చొరవ తీసుకొని ఏడాది కాలంగా కాంట్రాక్టర్లు, ఆర్అండ్బీ అధికారులపై ఒత్తిడి తెచ్చి పనులను పూర్తి చేసేలా చూశారు. తరుచూ పనులను పరిశీలించి పలుమార్లు కాంట్రాక్టర్లకు నోటీసులిచ్చారు. మంత్రి పువ్వాడ అజయ్ కుమార్ పలుమార్లు కలెక్టరేట్ పనులను పరిశీలించారు. రూ.48 కోట్లతో ఇంటిగ్రేటెడ్ కలెక్టరేట్తో పాటు కలెక్టర్, అడిషనల్ కలెక్టర్ల నివాస గృహాలు, మీటింగ్ హాల్స్ నిర్మించారు. జిల్లా ఆఫీసులు ఒకే చోట ఉండేలా ప్లాన్ చేశారు. ఈ ఏడాది మే నెలలో సీఎం వచ్చే అవకాశం ఉందంటూ హడావుడి చేశారు. ఈ క్రమంలోనే మూడు వారాల కిందట 48 జిల్లా ఆఫీసులను అధికారులకు అలాట్ చేశారు. ఆఫీసులలో ఫర్నిచర్ సమకూర్చుకోవాలని అధికారులకు సూచించారు.
హడావుడికే పరిమితం..
సీఎం వచ్చే అవకాశం ఉండడంతో ఇటీవల హెలీప్యాడ్ పనులను ప్రభుత్వ విప్ రేగా కాంతారావుతో కలిసి కలెక్టర్ పరిశీలించారు. కలెక్టరేట్కు సమీపంలోని దాదాపు 20 ఎకరాల స్థలంలో సీఎం బహిరంగ సభ నిర్వహించాలని భావించారు. కొంత భాగం శుభ్రం కూడా చేశారు. సీఎం వస్తున్నారంటూ బిల్డింగ్ను ముస్తాబు చేశారు. తీరా సీఎం పర్యటన ఖరారు కాకపోవడంతో కలెక్టరేట్ ప్రారంభోత్సవం వాయిదా పడుతూ వస్తుంది. సీఎం అపాయింట్మెంట్ కోసం మంత్రి పువ్వాడ అజయ్, విప్ రేగా కాంతారావు కొన్ని రోజులుగా ప్రయత్నిస్తున్నారు. ఈ నెల చివర్లో సీఎం వస్తారని జిల్లాలో ప్రచారం సాగుతోంది.
