భద్రాచలం, వెలుగు : శ్రీసీతారామచంద్రస్వామి దేవస్థానం ప్రధాన అర్చకుడు కె.శ్రావణకుమారాచార్యులు తన పదవికి రాజీనామా చేశారు. 2022 జులై నెల నుంచి ఆయన దీర్ఘకాలిక సెలవు తీసుకుని అమెరికాలో ఉంటున్నారు. కొంత కాలం సాధారణ సెలవులు, తర్వాత మెడికల్ లీవ్ తీసుకున్నారు. ఇటీవలే మళ్లీ సెలవులు కావాలంటూ మెయిల్ ద్వారా ఈఓ రమాదేవికి ఆయన విజ్ఞప్తి చేశారు.
సంతకం లేకుండా సెలవులు ఇవ్వలేమని, వచ్చి మాట్లాడాలని సూచించారు. ఇందుకు కొంత టైం కావాలని ఆయన కోరారు. అయితే, అమెరికాలోని ఓ గుడిలో ఆయన పనిచేస్తున్నట్లు సమాచారం. దీంతో రాజీనామా చేయాలని దేవస్థానం సూచించింది. దీనిపై గతంలోనే ప్రకటన కూడా ఇచ్చారు. ఎట్టకేలకు తాను ప్రధాన అర్చక పదవికి రాజీనామా చేస్తున్నట్లు పేర్కొంటూ మెయిల్ ద్వారా శ్రీసీతారామచంద్రస్వామి దేవస్థానానికి శ్రావణకుమారాచార్యులు సమాచారం ఇచ్చారు. దీంతో ఆయన రాజీనామాను ఈఓ
ఆమోదించారు.
