- నక్సల్స్ నియంత్రణలో జిల్లా పోలీసులకుముందడుగు..
- తగ్గిన కిడ్నాప్లు, వరకట్న హత్యలు, దొంగతనాలు
భద్రాద్రికొత్తగూడెం, వెలుగు : నక్సల్స్ నియంత్రణలో భద్రాద్రికొత్తగూడెం జిల్లా పోలీస్లు ప్రతిభ కనపర్చారు. నేరాల నియంత్రణలో వెనుకబడ్డారు. గతేడాది కంటే రాబరీలు, రేప్లు, పోక్సో కేసులు,చోరీలు, సైబర్ నేరాలు పెరిగాయి. ఇండ్ల దొంగతనాలు, కిడ్నాప్లు, వరకట్న హత్యలు గతేడాది కంటే తగ్గాయి. 2024 సంవత్సరానికి సంబంధించిన క్రైం వివరాలను జిల్లా ఎస్పీ ఆఫీస్లో సోమవారం ఏర్పాటు చేసిన మీడియా సమావేశంలో ఎస్పీ బి.రోహిత్ రాజు వివరించారు. అనంతరం బుక్ లెట్ రిలీజ్ చేశారు.
గోదావరి వరదల టైంలో ప్రాణ నష్టం లేకుండా చేయడంలో మిగిలిన శాఖలను కలుపుకొని పోలీస్లు చేసిన సేవలు మరువలేనివన్నారు. ఎస్సైతో పాటు ఇద్దరు పోలీస్ సిబ్బంది ఆత్మహత్యలకు పాల్పడడం తనను కలిచి వేసిందన్నారు. పోలీస్లకు యోగాతో పాటు వ్యక్తిత్వ వికాస నిపుణులతో అవగాహన సదస్సులు ఏర్పాటు చేస్తున్నామన్నారు.
నక్సల్స్ నియంత్రణలో ...
మావోయిస్టుల నియంత్రణలో రాష్ట్రంలోనే జిల్లాకు మంచి పేరు వచ్చింది. ఉన్నతాధికారుల నుంచి జిల్లా పోలీస్లు శభాష్ అని పించుకున్నారు. ఈ ఏడాదిలో వివిధ హోదాలకు చెందిన 59 మంది మావోయిస్టు నేతలు, సానుభూతిపరులను అరెస్ట్ చేశారు. అరెస్టు అయిన వారిలో మావోయిస్టు పార్టీ, న్యూడెమోక్రసీలకు చెందిన స్టేట్ కమిటీ సెక్రటరీ, స్టేట్ కమిటీ మెంబర్, సౌత్ బస్తర్ కీలక నేతతో పాటు అజ్ఞాత నక్సల్స్ దళం సభ్యులున్నారు. 31 మంది సరెండర్ అయ్యారు.
ఇందులో మావోయిస్టు పార్టీకి చెందిన ఏసీఎంతో పాటు దళం, మిలిటరీ కమాండర్లు, మెంబర్లున్నారు. జిల్లాలో రెండు కీలక ఎన్కౌంటర్లు జరిగాయి. రెండు దళాలు తుడిచిపెట్టుకుపోయాయి. 441 జిలిటెన్ స్టిక్స్, 27 ఎలక్ట్రిక్ డిటోనేటర్స్ విత్ వైర్, 1000 వైర్ లేని డిటోనేటర్స్తో పాటు పలు వెపన్స్ను స్వాదీనం చేసుకున్నారు. పలు చోట్ల మందుపాతర్లను డిస్పోజల్ చేశారు.
రూ. 90కోట్ల విలువైన గంజాయిని దహనం చేశారు. రాష్ట్రంలోనే తొలిసారిగా జిల్లాలో డాగ్ స్క్వాడ్స్తో గంజాయిని పట్టుకున్నారు.
412 దొంగతనాల కేసుల్లో రూ. 3.20కోట్ల సొత్తు పోగా రూ. 1.35కోట్ల మేర రికవరి చేశారు.ఎస్సీ, ఎస్టీ కేసులతో పాటు మహిళల వేధింపు కేసులు గతేడాది కంటే పెరిగాయి.
పోలీస్ శాఖకు సంబంధించి ఆరు విభాగాల్లో డయల్ 100, ఇన్విస్టిగేషన్, కోర్టు డ్యూటీ ఆఫీసర్స్ వంటి నాలుగు విభాగాల్లో జిల్లా ప్రతిభ చూపి రాష్ట్రంలో భేష్ అనిపించుకుంది.
మావోయిస్టు ప్రభావిత ప్రాంతాల్లో దాదాపు రూ. 90 కోట్లతో ఎల్ డబ్ల్యు ఈ ఫండ్స్తో డెవలప్మెంట్ వర్క్స్ జరుగుతున్నాయి.
గోదావరి వరదల టైంలో ప్రాణ నష్టం లేకుండా చేయడంలో పోలీస్లు కీలక భూమిక పోషించారు. ఖమ్మం వరదల టైంలో వారికి సాయంగా జిల్లా పోలీస్లు సేవలందించారు.
పోలీస్లకు భరోసా కల్పించేలా
జిల్లాలో ఎస్సైతో పాటు ఇద్దరు పోలీస్ సిబ్బంది ఆత్మహత్యలకు పాల్పడడం విచారకరం. డ్యూటీలతో పాటు కుటుంబంలో నెలకొన్న ఒత్తిళ్లను పోగొట్టుకునేలా పోలీస్లకు యోగాతో పాటు వ్యక్తిత్వ వికాస నిపుణులతో అవగాహన సదస్సులు నిర్వహిస్తున్నాం. సైబర్ నేరాల పట్ల ప్రజలు అప్రమత్తంగా ఉండాలి. ఏదేని సైబర్ క్రైం జరిగిన వెంటనే పోలీస్ లకు సమాచారం ఇవ్వడం మూలంగా పోగొట్టుకున్న సొత్తును రికవరీ చేసేందుకు అవకాశాలున్నాయి. కొత్తగూడెంతో పాటు జిల్లాలో ట్రాఫిక్ నియంత్రణపై స్పెషల్ ఫోకస్పెట్టనున్నాం. సీసీ కెమోరాల ఏర్పాటుకు ప్లాన్ చేస్తున్నాం. అశ్వారావుపేట మండలంలోని పెద్దవాగు వరదలో చిక్కుకున్న 40 మందిని కాపాడడం పోలీస్ల కృషి మరువలేనిది. - బి. రోహిత్ రాజు, ఎస్పీ, భద్రాద్రికొత్తగూడెం
క్రైం పేరు 2023 2024
ఎఫ్ఐఆర్లు 2,333 2,375
రాబరీలు 0 05
పోక్సో కేసులు 86 105
డోమెస్టిక్ వాయ్లెన్స్ 403 420
ఆర్డినరీ థెఫ్ట్లు 223 265
పీడీఎస్ రైస్ 64 71
ఇసుక అక్రమ రవాణా 05 215
కిడ్నాప్లు 98 77
చీటింగ్స్ 260 303
సైబర్ క్రైమ్స్ 138 196
టోటల్ యాక్సిడెంట్స్ 515 491
