- భద్రాద్రికొత్తగూడెం కలెక్టర్ జితేశ్ వి పాటిల్
భద్రాచలం, వెలుగు : భద్రాచలం ఏరియా హాస్పిటల్లో సమస్యలను దశలవారీగా అన్నీ పరిష్కరిస్తామని భద్రాద్రికొత్తగూడెం కలెక్టర్జితేశ్వి పాటిల్ తెలిపారు. బుధవారం ఆయన ఆస్పత్రిని ఆకస్మికంగా తనిఖీ చేశారు. ఈ సందర్భంగా కలెక్టర్ మాట్లాడుతూ తెలంగాణతో పాటు ఏపీ, ఛత్తీస్గఢ్, ఒడిశా రాష్ట్రాల గిరిజనులు భద్రాచలం ఏరియా ఆస్పత్రికి చికిత్స కోసం వస్తుంటారని, ఈ నేపథ్యంలో అన్ని సౌకర్యాలు మెరుగుపరచడానికి యాక్షన్ ప్లాన్ సిద్ధం చేసినట్లుగా తెలిపారు.
ముందుగా సిబ్బంది కొరత, భర్తీపై దృష్టిసారించి నెలరోజుల్లో సమస్యను పరిష్కరిస్తామని చెప్పారు. అవసరమైన భవనాల కోసం ఎస్టిమేషన్లు సిద్ధం చేయాలని అధికారులను ఆదేశించారు. సిబ్బంది రోగుల పట్ల నిర్లక్ష్యంగా వ్యవహరింస్తే చర్యలు తీసుకుంటామని
హెచ్చరించారు.
బూర్గంపహాడ్ : బూర్గంపహాడ్ లోని ప్రభుత్వ ఆస్పత్రిని కలెక్టర్ ఆకస్మికంగా తనిఖీ చేశారు. ఐటీసీ సహకారంతో ఆస్పత్రి ఆవరణలో నిర్మించిన పబ్లిక్ టాయిలెట్ల నిర్మాణ ప్లానింగ్ పై అసంతృప్తి వ్యక్తం చేశారు. హాస్పిటల్ సూపరింటెండెంట్ తో సమావేశమై సమస్యలపై చర్చించారు. కాగా గురుకుల పాఠశాలతో పాటు పలు సమస్యలపై స్థానికులు కలెక్టర్ కు వినతిపత్రం అందచేశారు. ఈ కార్యక్రమంలో డీసీహెచ్ వో రవిబాబు, తహసీల్దార్ ముజాహిద్, డాక్టర్లు అనిత, సబితా రెడ్డి, మౌనిక పాల్గొన్నారు.
