భద్రాద్రికొత్తగూడెం మున్సిపాలిటీల్లో ఈసారి వాస్తవ బడ్జెట్లే!

• గతేడాది కన్నా తగ్గిన బడ్జెట్​ ప్రతిపాదనలు 
• కొత్తగూడెం మున్సిపాలిటీ గత బడ్జెట్​లో పొంతన లేని లెక్కలు
• తాజాగా రూ.81.56కోట్లతో కొత్తగూడెం, రూ. 15కోట్లతో ఇల్లెందు, రూ. 80కోట్లతో 
• పాల్వంచ మున్సిపల్​ బడ్జెట్​ 

భద్రాద్రికొత్తగూడెం, వెలుగు : జిల్లాలోని మున్సిపాలిటీల్లో ఈ సారి వాస్తవ బడ్జెట్​కు పాలకులు, ఆఫీసర్లు ప్రాధాన్యత ఇచ్చారు. 2024–25 ఆర్థిక సంవత్సరానికి సంబంధించి కొత్తగూడెం మున్సిపల్​ బడ్జెట్​ను రూ. 81.56కోట్లతో, ఇల్లెందు మున్సిపల్​ బడ్జెట్​ను రూ. 15.76కోట్లతో పాలకవర్గం ఆమోదించింది. పాల్వంచ మున్సిపల్​ బడ్జెట్​ను రూ. 80కోట్లతో కలెక్టర్​ ఆమోదించారు. మణుగూరు మున్సిపల్​ బడ్జెట్​ రూపకల్పన తుదిదశకు చేరుకుంది. 

తగ్గిన బడ్జెట్..

గతేడాది బడ్జెట్​తో పోలిస్తే ఈ సారి బడ్జెట్​లో భారీగా తగ్గుదల కనిపిస్తోంది. వాస్తవ బడ్జెట్​ రూపకల్పన మూలంగానే గతేడాది మీద ఈ సారి బడ్జెట్​లో కేటాయింపులు తగ్గాయని పాలకులు, అధికారులు పేర్కొంటున్నారు. వారం రోజుల ముందుగా మున్సిపల్​ చైర్మన్లు, కమిషనర్లతో కలెక్టర్​ ప్రత్యేక సమావేశం నిర్వహించారు. అంకెల గారడీ వద్దు..  వాస్తవ బడ్జెట్​కు ప్రాధాన్యత ఇవ్వాలని కలెక్టర్​ మున్సిపల్​ చైర్మన్లు, కమిషనర్లను ఆదేశించారు. 

దీంతో ఈ సారి వాస్తవ బడ్జెట్​ రూపకల్పనపై ఆఫీసర్లు, పాలకులు దృష్టి సారించారు. గతేడాది బడ్జెట్​ ఎక్కువగా చూపించాలని పాలకులు ఇష్టారాజ్యంగా బడ్జెట్​ను రూపొందించారనే ఆరోపణలున్నాయి. వాస్తవ బడ్జెట్​ కాకపోవడంపై గత బడ్జెటపై అధికార పార్టీతో పాటు ప్రతిపక్ష కౌన్సిలర్లు ఆగ్రహం వ్యక్తం చేసిన దాఖలాలున్నాయి.  కొత్తగూడెం మున్సిపాలిటీలో ప్రస్తుత బడ్జెట్​ రూ. 81.56కోట్లతో ఆమోదించగా, గతేడాది రూ.147.92కోట్లతో బడ్జెట్​ను ఆమోదించారు. 

ఇల్లెందు మున్సిపాలిటీలో ప్రస్తుతం రూ. 15.76కోట్లతో బడ్జెట్​ను ఆమోదించగా, లాస్ట్​ ఇయర్​లో రూ. 40కోట్లతో ఆమోదించిన దాఖలాలున్నాయి. పాల్వంచలో ప్రస్తుతం రూ. 80కోట్లతో బడ్జెట్​ను ఆమోదించగా, గతేడాది రూ. 125కోట్లతో బడ్జెట్​ను ఆమోదించారు. మణుగూరు మున్సిపాలిటీ బడ్జెట్​ ఫైనల్​ దశలో ఉంది. ఇదిలా ఉండగా ఆయా మున్సిపాలిటీల్లో ఆమోదించిన బడ్జెట్​లో ప్రజా సమస్యల పరిష్కారానికి నిధుల కేటాయింపులు పెద్దగా లేవనే విమర్శలు వెల్లువెత్తుతున్నాయి. 

గత బడ్జెట్..  ‘కొత్తగూడెం’ పరిస్థితి!

కొత్తగూడెం మున్సిపాలిటీలో గత బడ్జెట్​లో అంచనా వ్యయం రూ. 4.28 కోట్లు చూపించగా, 5.46 కోట్లు ఖర్చు చేసినట్టుగా చూపించారు. సెంట్రల్​ లైటింగ్​కు రూ. 16.44లక్షలు ఖర్చు చేసినట్టు చూపెట్టారు. పట్టణంలోని సూర్యా ప్యాలెస్​, శేషగిరిభవన్​ రోడ్డు, సూర్యోదయ స్కూల్​ రోడ్​లో సెంట్రల్​ లైటింగ్​ ఎక్కడా ఏర్పాటు చేసిన దాఖలాలు లేవు. వీధిదీపాల ఏర్పాటు కోసం రూ. 67.10లక్షలు అంచనా వ్యయం వేసి ఖర్చు మాత్రం రూ. 49లక్షలు మాత్రమే చూపించడం గమనార్హం. 

మరో వైపు 36 వార్డులలో కరెంట్​ పోల్స్​ ఏర్పాటులో జాప్యం చేస్తుండడం పట్ల పలువురు కౌన్సిలర్లు ఆగ్రహం వ్యక్తం చేస్తున్నారు. గత ఆర్థిక సంవత్సరంలో సంత, డైలీ మార్కెట్​ పేర మున్సిపాలిటీకి వచ్చిన ఆదాయం, కాంట్రాక్టర్లు ఎంతకు వేలంలో దక్కించుకున్నారు.. లాంటి లెక్కలు చూపించకపోవడం పట్ల కౌన్సిలర్లు పాలకవర్గంతో పాటు ఆఫీసర్ల తీరుపై అసహనం వ్యక్తం చేస్తున్నారు. 

ఫండ్స్​ తెచ్చుకోవడంలో విఫలం.. 

ఎంపీ, ఎమ్మెల్యే, ఎమ్మెల్సీల ద్వారా ఫండ్స్​ తెచ్చుకోవడంలో కొత్తగూడెం మున్సిపాలిటీ పాలకవర్గం పూర్తి స్థాయిలో విఫలమైంది. రాష్ట్రంలో, మున్సిపాలిటీలో అధికారంలో బీఆర్​ఎస్​ ఉన్నప్పటికీ ఈ ఫండ్స్​ తెచ్చుకోవడంలో  నిర్లక్ష్యంతో అభివృద్ధిలో కొంత వెనుకబాటులో  ఉన్నామంటూ కౌన్సిలర్లు వాపోతున్నారు. పట్టణంలోని గవర్నమెంట్​ హాస్పిటల్​, రైతు మార్కెట్, నేతాజీ మార్కెట్​ ప్రాంతాల్లో రూ. లక్షలు వెచ్చించి వీధి వ్యాపారులు, చిరు వ్యాపారుల కోసం నిర్మించిన షెడ్స్​ గత ఏడాదిన్నర కాలంగా నిరుపయోగంగా ఉన్నాయి. వాటిని వీధి వ్యాపారులు, చిరువ్యాపారులకు అప్పగించి నామమాత్రపు ఫీజుతో మున్సిపాలిటీకి ఆదాయం వచ్చే అవకాశం ఉన్నా పట్టించుకోలేదు. 

గత బడ్జెట్​కు సంబంధించి ప్రైవేట్, గవర్నమెంట్​ ఆస్థులపై నీటి సరఫరా చార్జీల కింద రూ. 2కోట్ల  అంచనా ఆదాయం చూపించిన అధికారులు  వాస్తవ ఆదాయాన్ని కేవలం రూ. 87.13లక్షలే చూపించారు. కంపోస్ట్​ ఎరువు అమ్మకం ద్వారా రూ. 3లక్షలు అంచనా ఆదాయం చూపించినా వాస్తవ ఆదాయం జీరో చూపించడం గమనార్హం. కంపోస్ట్​ ఎరువు తయారు చేస్తున్నామని పాలకులు, అధికారులు గొప్పలు చెప్తున్నారు. బడ్జెట్​ రిపోర్టులో మాత్రం ఆదాయం జీరో చూపించడంలో ఆంతర్యమేమిటో ఆఫీసర్లకే తెలియాలి. ప్లాస్టిక్​ వాడకం, ఇతరత్రా జరిమానాల కింద అంచనా ఆదాయం రూ. 10లక్షలు చూపించారు. వాస్తవ ఆదాయం మాత్రం కేవలం రూ. 5వేలకే పరిమితమయ్యారు. ప్లాస్టిక్​ వాడకం యథేచ్ఛగా సాగుతున్నా ఆఫీసర్లు, పాలకులకు పట్టింపు లేకుండా పోయింది. 

ప్రాపర్టీ ట్యాక్స్..​

ప్రాపర్టీ ట్యాక్స్​ అంచనా ఆదాయం రూ. 5.80 కోట్లు చూపించారు. జనవరి చివరి నాటికి రూ. 2.85కోట్లు వాస్తవ ఆదాయంగా పేర్కొన్నారు. మరి రూ. 2.95కోట్లు మార్చి లోపు చూపిస్తారా, మార్చి తర్వాత వసూలు చేస్తారో తెలియని పరిస్థితి. కొత్తగూడెం మున్సిపల్​ జనరల్​ ఫండ్​ దాదాపు రూ. 6.52కోట్లు అంచనా వ్యయంగా పేర్కొన్న అధికారులు వాస్తవ ఆదాయాన్ని రూ. 3.58కోట్లుగా చూపించారు. ఓ వైపు 100శాతం ట్యాక్స్​ వసూలు చేస్తున్నా మని చెప్తున్న అధికారులు, పాలకులు ఈ అంచనాలు వేయడంలో నిర్లక్ష్యంగా వ్యవహరించారా? ఏదో అంకెలు వేసి గారడీ చేస్తే సరిపోతుందని అనుకున్నారో? చెప్పాలని పలువురు కౌన్సిలర్లు డిమాండ్​ చేస్తున్నారు. ఆదాయపు వనరులున్నా సమకూర్చుకోవడంలో కొత్తగూడెం మున్సిపాలిటీ విఫలమైందని అధికార బీఆర్​ఎస్​ పార్టీ కౌన్సిలర్లే విమర్శిస్తుండడం గమనార్హం.  

‘కొత్తగూడెం-పాల్వంచ కార్పొరేషన్’​కు కృషి : ఎమ్మెల్యే కూనంనేని సాంబశివరావు

భద్రాద్రికొత్తగూడెం, వెలుగు : కొత్తగూడెం, పాల్వంచ మున్సిపాలిటీలను కలిపి కార్పొరేషన్​ ఏర్పాటుకు కృషి చేస్తున్నామని ఎమ్మెల్యే కూనంనేని సాంబశివరావు తెలిపారు. కొత్తగూడెం మున్సిపాలిటీ ఆఫీస్​లో మంగళవారం మున్సిపల్​ చైర్​ పర్సన్​ కె. సీతాలక్ష్మి అధ్యక్షతన జరిగిన  బడ్జెట్​ మీటింగ్​లో ఆయన మాట్లాడారు. కొత్తగూడెం మున్సిపాలిటీల అభివృద్ధిలో భాగంగా నిధుల కోసం ముఖ్యమంత్రిని కలవనున్నట్టు తెలిపారు. 

వాస్తవ బడ్జెట్​కు ప్రాధాన్యత ఇవ్వాలన్నారు. 2024–25 ఆర్థిక సంవత్సరానికి సంబంధించి రూ. 81.56కోట్ల ఆదాయం, రూ. 83.52కోట్ల ఖర్చుతో బడ్జెట్​ను కౌన్సిల్​ ఆమోదించింది. ఈ మీటింగ్​లో డీఆర్డీఓ విద్యాచందన, మున్సిపల్​ కమిషనర్​ శేషాంజన్​ స్వామి, మున్సిపల్​ వైస్​ చైర్మన్​ దామోదర్​ యాదవ్​, మున్సిపల్​ మేనేజర్​ సత్యనారాయణ, డీఈ రవి కుమార్​, కౌన్సిలర్లు, అధికారులు పాల్గొన్నారు. 
 

‘ఇల్లెందు’కు ప్రత్యేకంగా నిధులు తెస్తాం.. : కోరం 

ఇల్లెందు మున్సిపల్​ చైర్మన్​ దమ్మాలపాటి వెంకటేశ్వరరావు అధ్యక్షతన మున్సిపాలిటీ ఆఫీస్​లో ఏర్పాటైన సమావేశంలో రూ.15కోట్లతో రూపొందించిన బడ్జెట్​ను కౌన్సిల్​ సభ్యులు ఆమోదించారు. ఈ సందర్భంగా ఎమ్మెల్యే కోరం కనకయ్య మాట్లాడుతూ మున్సిపాలిటీ అభివృద్ధికి ప్రత్యేకంగా నిధులు తీసుకువచ్చేందుకు కృషి చేస్తానన్నారు. ఈ ప్రోగ్రాంలో మున్సిపల్​ కమిషనర్​ నవీన్​ కుమార్​, కౌన్సిలర్లు, అధికారులు పాల్గొన్నారు.