యాదాద్రి, వెలుగు : యాదాద్రి జిల్లా భువనగిరి ఎస్సీ వెల్ఫేర్ హాస్టల్లో ఆత్మహత్య చేసుకున్న స్టూడెంట్ల కుటుంబాలను ఆదుకోవాలని సీఎం కార్యాలయం నుంచి ఆదేశాలు వచ్చాయి. వెంటనే బాధిత కుటుంబాలను కలెక్టరేట్కు పిలిపించి స్వయంగా కలెక్టర్ మాట్లాడారు. త్వరలో వారి సమస్య పరిష్కరిస్తామని హామీ ఇచ్చారు. హాస్టల్లో టెన్త్ క్లాస్ స్టూడెంట్స్ భవ్య, వైష్ణవి ఫిబ్రవరి 3న ఆత్మహత్య చేసుకున్నారు. అప్పట్లో పేరెంట్స్తో కలిసి స్టూడెంట్స్ యూనియన్స్ ఆందోళన చేయగా.. ఆర్ధిక సాయం చేస్తామని, ఔట్ సోర్సింగ్ పద్దతిలో కుటుంబ సభ్యుల్లో ఒకరికి ఉద్యోగం ఇస్తామని ఆఫీసర్లు హామీ ఇచ్చారు. ఇప్పటికీ హామీ అమలు కాకపోవడంతో పేరెంట్స్ఇటీవల హైదరాబాద్లో సీఎం గ్రీవెన్స్ సెల్కు ఫిర్యాదు చేశారు. సీఎం గ్రీవెన్స్సెల్ నుంచి వచ్చిన ఆదేశాలతో భవ్య, వైష్ణవి పేరెంట్స్ను కలెక్టర్ హనుమంతు జెండగే పిలిపించారు.
ఇక్కడికి వచ్చిన పేరెంట్స్ కృష్ణ, నాగరాజు కలెక్టర్, డీసీపీని వేర్వేరుగా కలిశారు. తమ ఆర్ధిక పరిస్థితి బాగాలేదని, కూతుర్ల ఆత్మహత్యతో మానసికంగా దెబ్బతిన్నామని కృష్ణ, నాగరాజు కలెక్టర్ కు వివరించారు. వారినే తలుచుకుంటూ కూలికి కూడా వెళ్లలేకపోతున్నామని వాపోయారు. తాము బతుకుదెరువుకోసం వెళ్లిన సికింద్రాబాద్లో ఉండలేమని, తమ సొంతూళ్లకు వెళ్లిపోతామన్నారు. తమకు ఏదైనా పని ఇప్పించాలని కోరారు. ఆర్ధిక సాయం కోసం ప్రభుత్వానికి సిఫార్సు చేస్తామని కలెక్టర్ తెలిపారు. వారి సొంత జిల్లాల్లో ఏదైనా డిపార్ట్మెంట్లో ఔట్ సోర్సింగ్, కాంట్రాక్ట్ ఉద్యోగాలు ఖాళీగా ఉంటే అక్కడి అధికారులకు రికమండ్ చేస్తానన్నారు. పిల్లల ఆత్మహత్యలో ఎలాంటి అనుమానాలు లేవని యాదాద్రి డీసీపీ రాజేశ్ చంద్ర తెలిపారు. తనను కలిసిన భవ్య, వైష్ణవి పేరేంట్స్తో ఆయన మాట్లాడారు. అన్ని రిపోర్టులు సరిగానే వచ్చాయన్నారు.
