45 రోజుల్లో బీఆర్ఎస్.. సర్కారు రద్దయితది
రెండ్రోజుల్లో జగదీశ్రెడ్డి అవినీతి సినిమా చూపిస్త : ఎంపీ కోమటిరెడ్డి వెంకట్రెడ్డి
ఇసుక సొమ్ముతో షాబాద్లో 80 ఎకరాలు కొన్నడని ఆరోపణ
యాదాద్రి, వెలుగు : రాబోయే 45 రోజుల్లో బీఆర్ఎస్ సర్కారు రద్దయితదని, మంత్రులు, ఎమ్మెల్యేలు మాజీలు కాబోతున్నారని భువనగిరి ఎంపీ కోమటిరెడ్డి వెంకట్రెడ్డి అన్నారు. ఆగస్టు నెలాఖరు వరకు ఎలక్షన్ నోటిఫికేషన్ వస్తుందని చెప్పారు. సోమవారం ఆయన యాదాద్రి జిల్లా మోత్కూరులో మీడియాతో మాట్లాడారు. గౌరెళ్లి–-కొత్తగూడెం నేషనల్ హైవే ను తుంగతుర్తి ఎమ్మెల్యే గాదరి కిశోర్ సాధించాడంటూ కేటీఆర్ చేసిన ప్రకటనపై ఎంపీ మండిపడ్డారు. 'కేటీఆర్ అమెరికాలో చదివినవ్.. మాట్లాడితే అర్థముండాలే.. గల్లీలో తిరిగే కిశోర్కు ఢిల్లీ సంగతేమెరుక. నేషనల్ హైవేలు ఎంపీల ద్వారా వస్తాయన్న విషయం కూడా తెలియదా’ అని ఎద్దేవా చేశారు. ‘మంత్రి కేటీఆర్, ఎమ్మెల్యే కిశోర్కు నేనే ప్లైట్టికెట్ బుక్చేయిస్తా.
నేషనల్ హైవే ఎవరు సాధించారో పీఎంవోలో తెలుసుకుందాం’ అని సవాల్ విసిరారు. గాలికి గెలిచిన జగదీశ్రెడ్డి, గాదరి కిశోర్ వచ్చే ఎన్నికల్లో గాలికే పోతారని అన్నారు. రాష్ట్రం బాగుపడాలని ప్రజలు కోరుకుంటున్నారని, అందుకే కాంగ్రెస్ను గెలిపిస్తారని చెప్పారు. కాంగ్రెస్సర్కారు ఏర్పడగానే,సీఎం ఎవరైనా మొదటి సంతకం రూ.4 వేల పింఛన్ పెంపు ఫైల్మీదనే ఉంటుందన్నారు. ఈ నెల 19న కొల్లాపూర్బహిరంగ సభలో ప్రియాంక గాంధీ బీసీ డిక్లరేషన్ ప్రకటిస్తారని ఎంపీ తెలిపారు. పీసీసీ పదవి విషయంలో తాను కొంత బాధపడినప్పటికీ ప్రజల కోసం అందరం కలిసి పనిచేస్తున్నామన్నారు.
ఇసుక అక్రమంగా తరలిస్తే లారీలు తగలబెడ్త
బస్సు కిరాయికి పైసలు లేని జగదీశ్రెడ్డి ఇసుక మీద అక్రమంగా సంపాదించి రూ.వేల కోట్లతో భూములు కొన్నాడని ఎంపీ ఆరోపించారు. షాబాద్లో కొన్న 80 ఎకరాల ల్యాండ్కు సంబంధించిన సినిమా రెండ్రోజులలో చూపిస్తానని వెంకట్రెడ్డి తెలిపారు. నాలుగు పార్టీలు మారిన ముసలాయన గుత్తా సుఖేందర్రెడ్డి ప్రాణభయంతో 12 కార్లను ఎస్కార్ట్గా పెట్టుకున్నారని ఎద్దేవా చేశారు. దళితబంధులో ఎమ్మెల్యేలకు 30 నుంచి 40 శాతం వాటా పోతోందని ఎంపీ ఆరోపించారు. కొత్తగా నిర్మిస్తున్న నేషనల్హైవేకు తప్ప.. అక్రమంగా ఇసుక తరలిస్తే.. లారీలకు పంచర్చేయడంతో పాటు అవసరమైతే తగలబెడతానని హెచ్చరించారు. ఇసుక అక్రమంగా తరలకుండా చర్యలు తీసుకోవాలని యాదాద్రి కలెక్టర్ పమేలా సత్పతికి ఎంపీ సూచించారు.
