వాషింగ్టన్: భారత ప్రధాని నరేంద్ర మోదీ శాంతి సందేశం గొప్పదని అమెరికా ప్రెసిడెంట్ బైడెన్ అన్నారు. మోదీ తన పర్యటనతో ఉక్రెయిన్కు శాంతి సందేశం పంపారని ప్రశంసించారు. పోలెండ్, ఉక్రెయిన్ దేశాల్లో మోదీ పర్యటన విశేషాలను తెలుసుకునేందుకు తాను ఆయనతో ఫోన్లో మాట్లాడానని బైడెన్ ట్వీట్ చేశారు. "మోదీ ఇటీవల పోలెండ్, ఉక్రెయిన్ దేశాల్లో పర్యటించారు. ఆ విశేషాలను తెలుసుకునేందుకు ఆయనతో ఫోన్లో మాట్లాడా. మోదీ శాంతి సందేశం, మానవతావాద మద్దతు మెచ్చుకోదగినది. ఇండో-పసిఫిక్లో శాంతి, శ్రేయస్సు కోసం కలిసి పనిచేయడానికి మేం మా నిబద్ధతను కూడా వెల్లడించాం" అని బైడెన్ చెప్పారు. బంగ్లాదేశ్ పరిస్థితులపైనా ఇరువురు నేతలు చర్చించుకున్నారు. ప్రాంతీయ, ప్రపంచవ్యాప్త పరిణామాలెన్నో తమ మధ్య చర్చకు వచ్చాయని మోదీ 'ఎక్స్' వేదికగా వెల్లడించారు.
