కో–చైర్ పర్సన్ గా డాక్టర్ వివేక్ మూర్తి
న్యూయార్క్: ప్రెసిడెన్షియల్ ఎన్నికల్లో గెలిచినట్లు ఇంకా అఫీషియల్ ప్రకటన రానేలేదు.. కానీ జో బైడెన్ అప్పుడే పనిలోకి దిగిండు. దేశాన్ని పట్టిపీడిస్తున్న కరోనా మహమ్మారిపై పోరుకు ఏర్పాట్లు మొదలెట్టిండు. కరోనాపై పోరుకు ఓ టాస్క్ఫోర్స్ను నియమిస్తానన్న ఎన్నికల హామీని నిలబెట్టుకున్నడు. ఈ మేరకు సోమవారం ఒక ప్రకటన చేశారు. 19 మంది డాక్టర్లు, సైంటిస్టులతో టాస్క్ఫోర్స్ ను ఏర్పాటు చేస్తున్నట్టు వెల్లడించారు. ఇందులో ముగ్గురు కో–చైర్మన్లు ఉంటారు. వీరిలో ఇండియన్ అమెరికన్ డాక్టర్ వివేక్ మూర్తి ఒకరు. ఈ టాస్క్ఫోర్స్ కరోనా కంట్రోల్పై బైడెన్కు, కమలా హారిస్ కు సలహాలు ఇస్తుంది. ఒబామా హయాంలో సర్జన్ జనరల్గా పనిచేసిన వివేక్ మూర్తిని.. ట్రంప్ అధికారంలోకి వచ్చాక 2017లో డిస్మిస్ చేశారు. యూఎస్ఎఫ్డీ మాజీ కమిషనర్ డాక్టర్ డేవిడ్ కెస్లర్, డాక్టర్ నునెజ్ స్మిత్ కూడా టాస్క్ఫోర్స్ కో–చైర్మన్లుగా పనిచేస్తారు. కరోనాపై పోరాటానికి ఎక్కువ ఇంపార్టెన్స్ ఇస్తామని బైడెన్ ఇది వరకే స్పష్టం చేశారు.‘‘వ్యాధిని ఎలా అదుపు చేయాలో ఈ టాస్క్ఫోర్స్ ఎప్పటికప్పుడు మాకు సూచనలు ఇస్తుంది. వ్యాక్సిన్లు అందరికీ సురక్షితంగా అందించేందుకు తీసుకోవాల్సిన చర్య లను సూచిస్తుంది. రిస్క్లో ఉన్న వారిని కాపాడటంలో ప్రభుత్వానికి సాయపడుతుంది” అని వివరించారు. కరోనాను కంట్రోల్ చేయడంలో ట్రంప్ పూర్తిగా ఫెయిలయ్యారని, కనీసం మాస్క్ పెట్టుకోవడమూ ఆయనకు ఇష్టం లేదని ఎన్నికల ప్రచార సమయంలో బైడెన్ విమర్శించారు. కరోనా కంట్రోల్ ప్లాన్ అమలుతోనే తన పని మొదలవుతుందని గెలుపు అనంతరం ప్రకటించారు. మిగతా దేశాలతో పోలిస్తే అమెరికా కరోనాతో తీవ్రంగా నష్టపోయింది. శనివారం ఒక్కరోజే 1.30 లక్షల మంది ఈ వ్యాధి బారినపడగా, మొత్తం కేసుల సంఖ్య 99.67 లక్షలకు చేరింది. ఇప్పటి వరకు 2.37 లక్షల మందికిపైగా మరణించారని జాన్స్ హాప్కిన్స్ యూనివర్సిటీ ప్రకటించింది.
For More News..
