- రాత్రి 8 తర్వాత జరిగే కార్యక్రమాల్లో పాల్గొనలేను
వాషింగ్టన్: అధ్యక్ష ఎన్నికల ప్రచార కార్యక్రమాలతో అలసిపోతున్నానని, తనకు మరింత నిద్ర అవసరమని అమెరికా అధ్యక్షుడు జో బైడెన్ అన్నారు. ప్రచార కార్యక్రమాలకు రాత్రి 8 గంటల తర్వాత హాజరుకాలేనని ఆయన తెలిపారు. వైట్ హౌస్లో జరిగిన డెమోక్రటిక్ గవర్నర్ల సమావేశంలో ఆయన మాట్లాడారు. కొంతమంది గవర్నర్లు ఫిజికల్గా హాజరుకాగా.. మరి కొంతమంది వర్చువల్గా పాల్గొన్నారు.
రిపబ్లికన్ పార్టీ అభ్యర్థి డొనాల్డ్ ట్రంప్ కు వ్యతిరేకంగా నిర్వహిస్తున్న వివిధ ప్రచార కార్యక్రమాల్లో తీరిక లేకుండా పాల్గొంటున్నానని, దీంతో అలసిపోతున్నానని 81 ఏండ్ల బైడెన్ చెప్పారు. ఈ నేపథ్యంలో తనకు మరింత నిద్ర కావాలన్నారు. ఈ సమావేశంలో బైడెన్ తన ఆరోగ్యంపై తనే జోకులేసుకున్నారు. ‘నేను ఆరోగ్యంగానే ఉన్నా.. నా బ్రెయిన్ పరిస్థితి ఎలా ఉందనేది తెలవదు కానీ నా మటుకు నేనైతే బాగున్నా’ అని బైడెన్ నవ్వించారు.
