- భారీ భూకంపం.. 9 మంది మృతి.. 70 మంది గల్లంతు
తైపీ : భారీ భూకంపం దాటికి తైవాన్ ద్వీపం చిగురుటాకులా వణికింది. బుధవారం ఉదయం సంభవించిన విపత్తుతో ద్వీపదేశం అతలాకుతలమైంది. భూకంప తీవ్రత రిక్టర్ స్కేలుపై 7.4గా నమోదైంది. గ్రామీణ, పర్వతప్రాంతాలైన హువాలియన్ కౌంటీ తీరానికి 18 కిలోమీటర్ల దూరం, 35 కిలోమీటర్ల లోతులో భూకంప కేంద్రం ఉన్నట్టు యూఎస్ జియోలాజికల్ సర్వే వెల్లడించింది. భూకంపం తీవ్రతకు భవనాలు, ఫ్లైఓవర్లు కొద్దిసేపు ఊగిపోయాయి.
కొన్ని భవనాలనుంచి శకలాలు రోడ్డుపై వెళ్తున్నవారిపై పడ్డాయి. ఈ ఘటనలో తొమ్మిది మంది మృత్యువాతపడగా, వెయ్యి మందికి పైగా గాయపడ్డారు. 70 మంది గల్లంతైనట్టు నేషనల్ ఫైర్ ఏజెన్సీ అధికారులు వెల్లడించారు. భూ ప్రకంపనలతో 24 కొండచరియలు విరిగిపడగా.. 35 రోడ్లు, వంతెనలు, సొరంగ మార్గాలు దెబ్బతిన్నాయి. భూకంప తీవ్రత నేపథ్యంలో తైవాన్ వ్యాప్తంగా రైలు సేవలను నిలిపివేశారు. విమానక రాకపోకలకూ అంతరాయం కలిగింది. కాగా, గత 25 ఏండ్లలో ఇదే అతి పెద్ద విపత్తు అని అధికారులు వెల్లడించారు.
సునామీ హెచ్చరిక జారీ.. ఎత్తివేత
భారత కాలమానం ప్రకారం బుధవారం ఉదయం 8 గంటల ప్రాంతంలో తైవాన్లో భూకంపం సంభవించింది. నగరంలోని ఓ ఫ్లైఓవర్ కొన్ని నిమిషాలపాటు కదిలింది. దీంతో వాహనదారులు ఎక్కడికక్కడే ఆగిపోయారు. మరికొన్నిచోట్ల కూడా బ్రిడ్జిలు కంపించాయి. భవనాలు వంగిపోయాయి. విపత్తు కారణంగా తైవాన్తోపాటు పొరుగు దేశాల్లో సునామీ హెచ్చరికలు జారీచేశారు. అయితే ప్రభావం ఆస్థాయిలో
లేకపోవడంతో అధికారులు కొద్దిసేపటికే ఎత్తివేశారు.
45 డిగ్రీల కోణంలో వంగిన భవనాలు
భూకంపం దాటికి హువాలియన్ కౌంటీలో కొన్ని భవనాలు 45 డిగ్రీల కోణంలో వంగిపోయాయి. గ్రౌండ్ ఫ్లోర్లు పూర్తిగా ధ్వంసమయ్యాయి. భూప్రకంపనలు కనిపించగానే స్కూళ్ల యాజమాన్యాలు అప్రమత్తమయ్యాయి. పిల్లలను గ్రౌండ్లోకి తరలించారు. పిల్లలందరికీ ఎల్లో సేఫ్టీహెల్మెట్లు అందజేశారు. భవనాలనుంచి రాలిపడుతున్న శకలాలనుంచి తమను తాము రక్షించేకునేందుకు కొందరు పిల్లలు పుస్తకాలతో తలను కవర్ చేసుకోవడం కనిపించింది. కూలిపోయిన భవనాల్లోనుంచి బాధితులను రక్షించేందుకు ఇరుగుపొరుగువారు తీవ్రంగా శ్రమించారు.
కాగా, మినీ బస్లో నేషనల్ పార్క్కు వెళ్లిన 50 మంది ఆచూకీ తెలియడం లేదని అధికారులు వెల్లడించారు. భూకంపం తర్వాత ఫోన్ నెట్వర్క్ పనిచేయకపోవడంతో వారితో సంబంధాలు తెగిపోయాయని తెలిపారు. రెండు బొగ్గు గనుల్లో 70 మంది చిక్కుకున్నట్టు తైవాన్ అధికారులు వెల్లడించారు. ఒక గనిలో 64 మంది, మరో గనిలో ఆరుగుకు చిక్కుకుపోయారని, అక్కడ సహాయక చర్యలు కొనసాగిస్తున్నట్టు చెప్పారు. కాగా, భూకంపం ధాటికి నేషనల్ లెజిస్లేచర్ భవనం సహా పలు పురాతన భవనాలు స్వల్పంగా దెబ్బతిన్నాయి.
తైవాన్ పొరుగు దేశాల్లోనూ భూకంప ప్రభావం
తైవాన్ పొరుగు దేశాలైన చైనా, జపాన్లోనూ భూకంప ప్రభావం కనిపించింది. చైనా రాజధాని షాంఘై, ఆగ్నేయ తీరం వెంట అనేక ప్రావిన్స్లలో భూమి కంపించినట్టు ఆదేశ మీడియా వెల్లడించింది. భూకంపం సంభవించిన 15 నిమిషాల తర్వాత యోనాగుని ద్వీపం తీరంలో 30 సెంటీమీటర్ల (సుమారు ఒక అడుగు)లోతులో సునామీ సంభవించినట్టు జపాన్ దేశ వాతావరణ సంస్థ వెల్లడించింది. ఇషిగాకి, మియాకో ద్వీపాల్లో స్వల్ప తరంగాలు కనిపించినట్టు తెలిపింది. అయితే, బుధవారం మధ్యాహ్నానికి సునామీ హెచ్చరికలను జపాన్ ఎత్తివేసింది.
మధ్యాహ్నం వరకే తేరుకున్న తైవాన్
ఉదయం భారీ భూకంపం కుదిపేసినా తైవాన్ మధ్యాహ్నం వరకే తేరుకున్నది. భూకంపం తీవ్రత తగ్గినట్టు స్కూల్డ్రిల్స్, పబ్లిక్ మీడియా, ఫోన్ల ద్వారా ప్రజలకు అధికారులు సమాచారాన్ని చేరవేశారు. దీంతో మధ్యాహ్నం ఉత్తర తైపీ శివారు బైటౌలోని మెట్రో స్టేషన్ ఉద్యోగులు, ప్రయాణికులు, పర్యాటకులతో బిజీగా మారింది. జనాలు ఇండ్లనుంచి బయటకొచ్చి, పనుల్లో నిమగ్నమయ్యారు. జనజీవనం యధావిధిగా కొనసాగింది. కాగా, విపత్తులపై తైవాన్ సంసిద్ధత ప్రపంచంలోనే అత్యాధునికమైనదని మిస్సోరి యూనివర్సిటీ ఆఫ్ సైన్స్ అండ్ టెక్నాలజీ ప్రొఫెసర్, సెస్మోలజిస్ట్ స్టీఫెన్ గావో వెల్లడించారు.
