భువనగిరి టికెట్​ కోసం కాంగ్రెస్​లో ఢీ అంటే ఢీ

•     భార్య లక్ష్మి కోసం ఎమ్మెల్యే రాజగోపాల్​రెడ్డి 
•     అన్న కొడుకు సూర్యపవన్​ రెడ్డి కోసం మంత్రి  వెంకట్​రెడ్డి, 
•     గుత్తా అమిత్​ కోసం మండలి చైర్మన్​ సుఖేందర్​రెడ్డి
•     చామల కిరణ్​కుమార్​రెడ్డి కోసం  సీఎం రేవంత్
•     డీకే ద్వారా ఫైళ్ల శేఖర్​రెడ్డి ప్రయత్నాలు

నల్గొండ, వెలుగు:  భువనగిరి పార్లమెంట్​ సీటు కోసం నల్గొండ జిల్లా కాంగ్రెస్ లో టఫ్​ ఫైట్​ నడుస్తోంది. తమవారికి టికెట్ ఇప్పించుకునేందుకు హేమాహేమీ లీడర్లంతా రంగంలోకి దిగడంతో పొలిటికల్ ​హీట్ ​పీక్స్​కు చేరింది. కుటుంబసభ్యుల కోసం కోమటిరెడ్డి బ్రదర్స్​ పోటీపడ్తుండగా, అనుచరుడి కోసం ఏకంగా సీఎం ప్రయత్నిస్తుండడం విశేషం. ఈ ముగ్గురి మధ్యలోకి ఇటీవల  బీఆర్ఎస్​ నుంచి ఎంట్రీ ఇచ్చిన గుత్తా అమిత్, పైళ్ల శేఖర్​రెడ్డి ఏఐసీసీ స్థాయిలో పైరవీలు చేయిస్తుండడం ఆసక్తిరేపుతోంది. 

బ్రదర్స్​ మధ్యే మొదటి పోటీ.. 

భువనగిరి ఎంపీ సీటు కోసం కోమటిరెడ్డి ఫ్యామిలీ నుంచి ఇద్దరు పోటీపడ్తున్నారు. మునుగోడు ఎమ్మెల్యే కోమటిరెడ్డి రాజగోపాల్​ రెడ్డి ఆయన భార్య లక్ష్మికి ఎంపీ టికెట్​ ఇవ్వాలని పట్టుబడుతున్నారు. ఇంకోవైపు తన అన్న కొడుకు డాక్టర్​ సూర్యపవన్​ రెడ్డి కోసం మంత్రి కోమటిరెడ్డి వెంకటరెడ్డి ప్రయత్నిస్తున్నారు. ఇప్పటికే  బ్రదర్స్​ఇద్దరికి ఎమ్మెల్యే టికెట్లు, ఒక మంత్రి  ఇచ్చినందున  మళ్లీ అదే ఫ్యామిలీకి ఎంపీ టికెట్​ ఎట్లా ఇస్తరని సీఎం రేవంత్​ రెడ్డి సన్నిహితుడు చామల కిరణ్​ కుమార్​ రెడ్డి  ప్రశ్నిస్తున్నారు. అసెంబ్లీ ఎన్నికలు ముగియగానే ఎంపీ టికెట్​ తనకే వస్తదన్న నమ్మకంతో కిరణ్​ కుమార్​ రెడ్డి కోమటిరెడ్డి బద్రర్స్​ సపోర్ట్​తోనే భువనగిరి ఎంపీ సెగ్మెంట్​లో పార్టీ కార్యక్రమాలు ముమ్మరం చేశారు. కానీ, మంత్రి పదవి వస్తద ని ఆశించిన రాజగోపాల్​ రెడ్డికి కేబినెట్​లో చోటు దక్కకపోవడంతో భార్య లక్ష్మికి ఎంపీ టికెట్​ ఇవ్వాలని హైకమాండ్ పై ఒత్తిడి పెంచుతున్నారు. మరోవైపు  మంత్రి కోమటిరెడ్డి వెంకటరెడ్డి సైతం అనూహ్యంగా తన అన్న కొడుకు డాక్టర్​ సూర్యపవన్​ రెడ్డి పేరును తెరపైకి తెచ్చారు. సూర్య పవన్​ రెడ్డిని వెంటబెట్టుకుని  సీఎం రేవంత్​ను  కలవడంతో  భువనగిరి సీటు వ్యవహారం రసకందాయంలో పడింది.

అమిత్​, ఫైళ్ల ఎంట్రీతో మారిన సీన్​..

కాంగ్రెస్​లో ఎంపీ టికెట్​ కోసం ఓవైపు హైడ్రామా నడు స్తుండగా, మరోవైపు  బీఆర్ఎస్​ నుంచి మండలి చైర్మన్​ గుత్తా సుఖేందర్​ రెడ్డి కొడుకు అమిత్​ రెడ్డి, భువనగిరి మాజీ ఎమ్మెల్యే పైళ్ల శేఖర్​ రెడ్డి ఎంట్రీ ఇవ్వడంతో టికెట్​ వ్యవహారం కొత్త మలుపు తిరిగింది. తనకు టికెట్​ ఇస్తే కాంగ్రెస్​లో చేరేందుకు సిద్ధంగా ఉన్నానని అమిత్​ రెడ్డి  ప్రకటించారు.  జిల్లా మంత్రులతోపాటు  సీఎం సలహాదారుడు వేం నరేందర్​ రెడ్డితో చర్చలు జరపడం ద్వారా రేసులోకి వచ్చారు.  ఇక భువనగిరి మాజీ ఎమ్మెల్యే పైళ్ల శేఖర్​ రెడ్డి  కర్నాటక నుంచి చక్రం తిప్పుతున్నారు. అక్కడి డిప్యూటీ సీఎం డీకే శివకుమార్​ను కలిసి టికెట్​ ఇస్తే పార్టీలో చేరేందుకు సిద్ధమని ప్రకటించారు. వీరిద్దరి ఎంట్రీతో భువనగిరి సీటు కోసం పోటీ పడుతున్న వారి సంఖ్య ఐదుకు చేరింది. కోమటి రెడ్డి ఫ్యామిలీ మెంబర్స్​ విషయంలో పార్టీ హైకమాండ్​ ఏదైనా అభ్యంతరం చెప్తే మధ్యేమార్గంగా శేఖర్​రెడ్డి, అమిత్​లో ఎవరినో  ఒకరిని ఫైనల్​చేస్తారనే  ప్రచారం జరుగుతోంది. కానీ, సీఎం అండదండలతో రేసులోకి వచ్చిన కిరణ్​ కుమార్​ రెడ్డికి ఎంపీ టికెట్​ ఇవ్వాల్సిందేనని ఆయన వర్గీయులు పట్టబుడుతున్నారు.

తెరపైకి బీసీ క్యాండేట్​..

బీజేపీ నుంచి బీసీ సామాజికవర్గం నుంచి బూర నర్సయ్య గౌడ్​కు టికెట్ ​ఇచ్చిన సంగతి తెలిసిందే. బీఆర్ఎస్​ సైతం బీసీ క్యాండేట్​ను బరిలో నిలిపే అవకాశమున్నట్లు తెలుస్తోంది. ప్రత్యర్థులిద్దరూ బీసీలు అయితే కాంగ్రెస్​ హైకమాండ్​ సైతం బీసీకి చాన్స్​ ఇవ్వొచ్చనే ప్రచారం జరుగుతోంది. నిజానికి అసెంబ్లీ ఎన్నికల  టైంలో నల్గొండ సీటును బీసీలకు ఇస్తానని ప్రకటించిన మంత్రి కోమటిరెడ్డి వెంకటరెడ్డి నల్గొండ కేడర్​ ఒత్తిడి మేరకు ఆయనే పోటీ చేయాల్సి వచ్చింది. పైగా అసెంబ్లీ ఎన్నికల్లో కాంగ్రెస్​ బీసీలకు ఒక్క ఆలేరు సీటు మాత్రమే ఇచ్చింది. దీనిని పరిగణలోకి తీసుకొని  కాంగ్రెస్​ సైతం బీసీ అభ్యర్థిని బరిలో దింపాలని భావిస్తే అప్పుడు  మండలి డిప్యూటీ మాజీ చైర్మన్​ నేతి విద్యాసాగ ర్​ పేరును పరిశీలనలోకి తీసుకునే అవకాశం ఉన్నట్లు  తెలుస్తోంది.