దర్జాగా వచ్చి.. కోటి సొత్తు ఎత్తుకెళ్లిండ్రు: కూకట్​పల్లి లోని జయనగర్​లో భారీ చోరీ..

• ఇంకా కొన్ని నగలను అక్కడే వదిలేసి వెళ్లిన దొంగలు
• ఆధారాలు దొరక్కుండా చేతికి గ్లౌజులు, ముఖానికి మాస్క్​లు
• కూకట్​పల్లి లోని జయనగర్​లో ఘటన
• తెలిసిన వారి పనేనని అనుమానం

కూకట్​పల్లి, వెలుగు: కూకట్​పల్లి పరిధిలోని జయనగర్​లో గురువారం రాత్రి భారీ చోరీ జరిగింది. ముఖానికి మాస్క్​లు, చేతులకు గౌజులు వేసుకొని, దర్జాగా అపార్ట్​మెంట్​లోని ప్రవేశించిన ఇద్దరు దొంగలు దాదాపు రూ.కోటి సొత్తును ఎత్తుకెళ్లారు. పోలీసుల వివరాల ప్రకారం.. ప్రముఖ బిల్డర్ అయిన మధుసూదన్​రావు తన భార్య ప్రభావతితో కలిసి జయనగర్​లోని​సీతాప్యాలెస్​అపార్ట్​మెంట్​ఫ్లాట్​నంబర్​301లో ఉంటున్నాడు. మియాపూర్​లోని వీరి కూతురు డెలివరీ కావడంతో 15 రోజులుగా ప్రభావతి అక్కడే ఉంటోంది.

మధుసూదన్​రావు సైతం గురువారం రాత్రి కూతురు ఇంటికి వెళ్లాడు. శుక్రవారం ఉదయం తన ఇంటికి తిరిగొచ్చేసరికి తలుపు సెంట్రల్​లాక్​ పగులగొట్టి ఉంది. బెడ్​రూమ్​లోని డ్రెస్సింగ్​టేబుల్​లో​లాకర్ ఉండగా, అందులో బీరువా తాళాలు పెట్టారు. దొంగలు ఈ లాకర్​ను​ఓపెన్​చేసి, ఆ తాళాలతో బీరువాలోని సుమారు 82 తులాల బంగారు ఆభరణాలు, రూ. 10 లక్షల డైమండ్​ నెక్లెస్​, రూ. 2 లక్షల నగదు ఎత్తుకెళ్లారు. 

సీసీ కెమెరాలకు గొడుగు అడ్డం పెట్టుకుని..

అయితే, డ్రెస్సింగ్ టేబుల్ లాకర్​తోపాటు బీరువాలోని ఇంకా కొన్ని నగలను దొంగలు అక్కడే వదిలేసి వెళ్లడంతో ఇది తెలిసిన వారి పనేనా? అనే అనుమానాలు వ్యక్తమవుతున్నాయి. బాధితుడి ఫిర్యాదుతో పోలీసులు ఘటనా స్థలాన్ని పరిశీలించారు. సీసీ ఫుటేజీ ఆధారంగా దొంగలు రాత్రి 1.30 సమయంలో మెయిన్​ గేటు నుంచే దర్జాగా అపార్ట్​మెంట్​లోకి ప్రవేశించినట్టు గుర్తించారు. మెట్ల నుంచి మూడో ఫ్లోరుకు చేరుకుని చోరీకి పాల్పడ్డారు.

నిందితులు ముఖానికి మాస్క్​లు, మఫ్లర్లు పెట్టుకున్నట్టు కనిపిస్తుంది. చేతులకు గౌజులు వేసుకున్నట్టు క్లూస్​టీమ్ సభ్యులు గుర్తించారు. దీన్ని బట్టి పక్కా ప్లాన్ ప్రకారమే దుండగులు చోరీకి పాల్పడినట్టు స్పష్టమవుతోంది. పరారయ్యే సమయంలో ఇంట్లోని గొడుగు తీసుకొని, సీసీ కెమెరాలకు అడ్డంపెట్టుకొని వెళ్లారు. ఈ సమయంలో వాచ్​మెన్​మద్యం తాగి పడుకున్నట్టు తెలుస్తోంది. ఈ ఘటనపై కూకట్​పల్లి పోలీసులు కేసు నమోదు చేసుకుని దర్యాప్తు చేస్తున్నారు.