- ఎన్నికల పరిశీలకులు బిశ్వజిత్ దత్తా, సజ్జన్ ఆర్
నస్పూర్, వెలుగు : అసెంబ్లీ ఎన్నికల నిర్వహణ, కౌంటింగ్ కోసం పూర్తిస్థాయిలో ఏర్పాట్లు చేయాలని ఎన్నికల సాధారణ పరిశీలకులు బిశ్వజిత్ దత్తా, సజ్జన్ఆర్ సూచించారు. మంచిర్యాల జిల్లాలోని హాజీపూర్ మండలం ముల్కల్లలోని ఐజా ఇంజనీర్ కాలేజీలో ఏర్పాటు చేసిన కౌటింగ్ కేంద్రాన్ని జిల్లా ఎన్నికల ఆఫీసర్, కలెక్టర్ బదావత్ సంతోష్ తో కలిసి వారు పరిశీలించారు. ఈ సందర్భంగా మాట్లాడుతూ.. జిల్లా వ్యాప్తంగా 741 పోలింగ్ కేంద్రాలు ఏర్పాటు చేశామని, ఎన్నికల నిర్వహణకు అవసరమైన అన్ని ఏర్పాట్లు పూర్తిచేయాలన్నారు. కౌటింగ్ రోజు ఎలాంటి అవాంఛనీయ ఘటనలు జరుగకుండా బందోబస్తు నిర్వహించాలన్నారు. ఎన్నికల నిబంధనలు డిసెంబర్ 5 వరకు అమల్లో ఉంటాయని తెలిపారు.
ఎన్నికల విధులు కేటాయించబడిన ఆఫీసర్లు బాధ్యతాయుతంగా వ్యవహరించాలని, ఎన్నికల ప్రవర్తన నియమావళికి లోబడి పని చేయాలన్నారు. ఉల్లంఘించిన వారిపై ఎన్నికల సంఘం నిబంధనల మేరకు చర్యలు తీసుకుంటామని హెచ్చరించారు. ఈ కార్యక్రమంలో బెల్లంపల్లి నియోజకవర్గ రిటర్నింగ్ అధికారి, జిల్లా అదనపు కలెక్టర్ రహాలు, డీసీపీ సుధీర్ రాంనాథ్ కేకన్, చెన్నూర్, మంచిర్యాల నియోజకవర్గాల రిటర్నింగ్ అధికారులు సిడాం దత్తు, రాములు, ఏసీపీ తిరుపతి రెడ్డి, ఎన్నికల విభాగం ఆఫీసర్లు తదితరులు పాల్గొన్నారు.
