- ప్రధాన పార్టీల్లో జోరందుకున్న చేరికలు
- బీఆర్ఎస్ను వీడుతున్న మెజార్టీ లీడర్లు
మహబూబ్నగర్, వెలుగు : స్థానిక సంస్థల ఎమ్మెల్సీ బై ఎలక్షన్స్, లోక్సభ ఎన్నికల నేపథ్యంలో పాలమూరు జిల్లాలో బీఆర్ఎస్ నుంచి కాంగ్రెస్, బీజేపీల్లోకి భారీగా చేరికలు జరుగుతున్నాయి. దీంతో ఉమ్మడి మహబూబ్నగర్ లో కారు పార్టీ క్రమంగా ఖాళీ అవుతోంది.
కాంగ్రెస్లోకి భారీగా వలసలు..
గత అసెంబ్లీ ఎన్నికలకు ముందు బీఆర్ఎస్ పార్టీ నుంచి పెద్ద మొత్తంలో క్యాడర్ బయటకు వచ్చింది. ముఖ్యంగా అప్పటి బీఆర్ఎస్ ప్రభుత్వ తీరు, ఆ ప్రభుత్వంలోని మాజీ మంత్రులు, ఎమ్మెల్యేల అహంకార ధోరణి వల్ల క్యాడర్ పార్టీలో ఇమడలేకపోయింది. తరచూ అవమానించడం, అందరి ముందు దుర్భాషలాడడంతో చాలా మంది ఎన్నికలకు కొద్ది రోజుల ముందు కాంగ్రెస్ పార్టీలో చేరారు. ఆ తర్వాత చేరికలకు బ్రేక్ పడింది. అయితే, ఇప్పుడు ఎన్నికల సీజన్ మొదలు కావడంతో బీఆర్ఎస్తో పాటు బీజేపీ లీడర్లు హస్తం గూటికి చేరేందుకు ప్రయత్నాలు చేస్తున్నారు.
ఇప్పటికే ఎమ్మెల్యేలు యెన్నం శ్రీనివాస్ రెడ్డి, జి.మధుసూదన్ రెడ్డి, వాకిటి శ్రీహరి సమక్షంలో మండలాల నుంచి ఎంపీటీసీలు, వైస్ ఎంపీపీలు, ఇతర లీడర్లు కాంగ్రెస్ గూటికి చేరుతున్నారు. రెండు రోజుల కింద మాజీ ఎంపీ ఏపీ జితేందర్రెడ్డి బీజేపీని వీడి కాంగ్రెస్లో చేరారు. ఆయన కొడుకు ఏపీ మిథున్ రెడ్డి కూడా తండ్రి బాటలోనే కాంగ్రెస్ కండువా కప్పుకున్నారు. జితేందర్రెడ్డి రాకతో ఉమ్మడి పాలమూరు జిల్లాలో కాంగ్రెస్కు మరింత బలం చేకూరినట్లైంది. అయితే ఇదే సమయంలో బీజేపీలోకి కూడా వలసలు పెరుగుతున్నాయి. మహబూబ్నగర్ పార్లమెంట్ పరిధిలో ఆ పార్టీ క్యాండిడేట్ డీకే అరుణ అపోజిషన్ పార్టీల్లోని అసంతృప్తులను పార్టీలోకి ఆహ్వానించి, వారి మద్దతును కూడగట్టుకుంటున్నారు.
కాంగ్రెస్కు పెరుగుతున్న ఎంపీటీసీల బలం..
కాంగ్రెస్కు ఎంపీటీసీల బలం పెరుగుతోంది. మహబూబ్నగర్ స్థానిక సంస్థల ఎమ్మెల్సీ స్థానానికి బై ఎలక్షన్స్ జరుగుతుండగా, ఈ ఎన్నికల్లో ఎంపీటీసీల ఓట్లు గంపగుత్తగా ఎవరికి పడితే వారినే విజయం వరించనుంది. ఇటీవల ఈ స్థానానికి 16 మంది నామినేషన్లు వేయగా, మూడు తిరస్కరణకు గురయ్యాయి. 10 మంది విత్డ్రా చేసుకున్నారు. కాంగ్రెస్ నుంచి యువ వ్యాపారవేత్త మన్నె జీవన్ రెడ్డి, బీఆర్ఎస్నుంచి మాజీ జడ్పీ వైస్ చైర్మన్ నవీన్ రెడ్డి, ఎంపీటీసీల సంఘం తరుపున ఆ సంఘం రాష్ట్ర అధ్యక్షుడు గడీల కుమార్ గౌడ్ పోటీకి రెడీ అయ్యారు.
అయితే గడీల కుమార్గౌడ్ ఎన్నికల్లో ఎందుకు పోటీ చేస్తున్నారనే విషయాన్ని మంత్రి జూపల్లి కృష్ణారావు, ఎమ్మెల్యేలు యెన్నం, జి.మధుసూదన్ రెడ్డి తెలుసుకునే ప్రయత్నం చేశారు. గత బీఆర్ఎస్ ప్రభుత్వం ఎంపీటీసీలకు గౌవరం ఇవ్వలేదని ఆయన ఆవేదన వ్యక్తం చేసినట్లు తెలిసింది. పలు సమస్యలు కూడా వీరి దృష్టికి తీసుకొచ్చినట్లు సమాచారం.
ఎంపీటీసీల సమస్యలను సీఎం దృష్టికి తీసుకెళ్తామని చెప్పినట్లు తెలిసింది. ఇటీవల పాలమూరులో జరిగిన సభలో సీఎం రేవంత్ రెడ్డి ఎంపీటీసీలు మద్దతు తెలుపాలని, మద్దతిస్తే సమస్యలు పరిష్కారం అవుతాయని హామీ ఇచ్చిన నేపథ్యంలో కుమార్ గౌడ్ పోటీ నుంచి తప్పుకుంటున్నట్లు సమాచారం. దీంతో ఉమ్మడి జిల్లాకు చెందిన ఎంపీటీసీలు మన్నె జీవన్రెడ్డికి సపోర్ట్ చేసేందుకు సిద్ధమవుతున్నట్లు ప్రచారం జరుగుతోంది.
బీఆర్ఎస్ సైలెన్స్..
బీఆర్ఎస్ పార్టీ ఖాళీ అవుతోంది. ఆ పార్టీ నుంచి మండలాలకు చెందిన క్యాడర్ ఇతర పార్టీల్లోకి వెళ్లిపోతోంది. ఇప్పటికే హన్వాడ, చిన్నచింతకుంట, అడ్డాకుల, మూసాపేట, మక్తల్ మండలాలకు చెందిన లీడర్లతో పాటు పార్టీకి అనుబంధంగా ఉన్న సంఘాల లీడర్లు కూడా కండువాలు మార్చుకుంటున్నారు. ముఖ్యంగా అసెంబ్లీ ఎన్నికల్లో ఈ పార్టీ ఘోర పరాభావం చవిచూసింది. అప్పటి నుంచి ఈ పార్టీ మాజీ ఎమ్మెల్యేలు నియోజకవర్గాల్లో ఎక్కువగా కనిపించడం లేదు. ఏదైనా సమస్య వస్తే చెప్పుకునేందుకు లీడర్లు అందుబాటులో లేకపోవడంతో మండల స్థాయి క్యాడర్ ప్రత్యామ్నాయం చూసుకుంటోంది. దాదాపు వారం రోజులుగా జిల్లాలో జాయినింగ్స్ జోరు పెరిగినా.. ఇంత వరకు ఆ పార్టీల మాజీలు క్యాడర్ను బుజ్జగించే ప్రయత్నాలు చేయట్లేదు.
