హైదరాబాద్, వెలుగు: హైదరాబాద్లో అల్లర్లు సృష్టించడానికి బీజేపీ కుట్ర చేస్తుందని, ఈ విషయంలో ప్రజలు అప్రమత్తంగా ఉండాలని మాజీ మంత్రి, పీసీసీ ఉపాధ్యక్షురాలు పుష్పలీల కోరారు. సోమవారం గాంధీ భవన్లో మీడియాతో ఆమె మాట్లాడారు. తెలంగాణలో బీజేపీ, బీఆర్ఎస్ కలిసి కాంగ్రెస్ ప్రభుత్వాన్ని ఇబ్బంది పెట్టాలని చూస్తున్నాయని ఆరోపించారు. ఫోన్ ట్యాపింగ్ కేసులో తప్పులు చేసి విదేశాలకు వెళ్లిన వారిని ఇక్కడకు రాకుండా కేసీఆర్ అడ్డుకుంటున్నారని విమర్శించారు. కేసీఆర్కు విద్యుత్తు కొనుగోలు స్కామ్ అరెస్ట్ భయం పట్టుకుందన్నారు. తెలంగాణలో ప్రజా పాలన సాగుతోందని, రాష్ట్ర అభివృద్ధికి కృషి చేస్తున్న కాంగ్రెస్ ప్రభుత్వానికి రాష్ట్ర ప్రజలు సహకరించాలని కోరారు.
