కామారెడ్డి, వెలుగు: కామారెడ్డి మాస్టర్ ప్లాన్పై ఎమ్మెల్యే , కలెక్టర్, మున్సిపల్ కమిషనర్లు పొంతన లేకుండా చెప్తున్నారని బీజేపీ కామారెడ్డి నియోజకవర్గ ఇన్చార్జి కాటిపల్లి వెంకటరమణారెడ్డి విమర్శించారు. ఆదివారం స్థానిక మీడియాతో మాట్లాడుతూ.. మాస్టర్ ప్లాన్ ముసా యిదా అయితే ఎన్ని సార్లు డ్రాప్ట్ చేసి పంపిస్తారన్నారు. గతంలో కౌన్సిల్ ఆమోదం అయ్యాక మళ్లీ ఎందుకు పంపారో కలెక్టర్ సమాధానం చెప్పాలని డిమాండ్ చేశారు. ఎమ్మల్యేకు చిత్తశుద్ది ఉంటే ఈ నెల 12న మున్సిపల్ కౌన్సిల్ మీటింగ్ లో కౌన్సిల్ తీర్మానం చేయించాలన్నారు.
కలెక్టరేట్ ఎదుట రైతులు ఆందోళన చేస్తే అందులో అల్లరి మూకలు ఉన్నారనడం ఏంటని ప్రశ్నించారు. కలెక్టరేట్ ముట్టడి సందర్భంగా ఐదుగురు రైతులను పోలీసులు కొట్టారని, దీనిపై మానవ హక్కుల కమిషన్కు వెళ్తామన్నారు. మాస్టర్ ప్లాన్ రద్దయ్యే వరకు రైతులు ఉద్యమిస్తారని వారికి బీజేపీ అండగా ఉంటుందనన్నారు. సమావేశంలో కౌన్సిలర్లు శ్రీకాంత్, రవి, ప్రవీణ్, శ్రీనివాస్ తదితరులు పాల్గొన్నారు.
