వికారాబాద్, వెలుగు: తెలంగాణలో బీజేపీ నాయకులను తిరగనియ్యబోమని కాంగ్రెస్ వికారాబాద్ జిల్లా అధ్యక్షుడు, పరిగి ఎమ్మెల్యే టి.రాంమోహన్రెడ్డి అన్నారు. నేషనల్ హెరాల్డ్ వ్యవహారంలో కాంగ్రెస్ అగ్రనేతలపై ఈడీ చార్జిషీట్ దాఖలు చేయడాన్ని నిరసిస్తూ వికారాబాద్లో కాంగ్రెస్ నాయకులు బుధవారం నిరసన వ్యక్తం చేశారు. బీజేపీ, కేంద్ర ప్రభుత్వానికి వ్యతిరేకంగా నినాదాలు చేశారు. ప్రధాని మోదీ దిష్టి బొమ్మను దగ్ధం చేశారు.
ఈ సందర్భంగా ఎమ్మెల్యే మాట్లాడుతూ.. తమ అగ్ర నాయకులపై బీజేపీ కక్ష సాధింపు చర్యలకు పాల్పడుతోందన్నారు. బీజేపీకి బుద్ధి చెప్పడానికి మున్ముందు అనేక ఆందోళన కార్యక్రమాలు చేపడుతామని, కార్యకర్తలందరూ సిద్ధంగా ఉండాలన్నారు.
