- వచ్చే నెల 1 నుంచి బీజేపీ మెంబర్షిప్ డ్రైవ్
- సభ్యత్వాలను రెట్టింపు చేయడంపై నజర్
- లోకల్ బాడీ ఎన్నికలే టార్గెట్గా ముందుకు..
- ఈ నెల 21న రాష్ట్ర స్థాయి సన్నాహక సమావేశం
హైదరాబాద్, వెలుగు: రాష్ట్రంలో సంస్థాగత నిర్మాణంపై బీజేపీ దృష్టి పెట్టింది. దీంట్లో భాగంగా పార్టీ సభ్యత్వ నమోదును సీరియస్గా తీసుకోవాలని
నిర్ణయించింది. ప్రస్తుతం ఉన్న సభ్యత్వాలను డబుల్ చేయాలని టార్గెట్గా పెట్టుకున్నది. ప్రతి బూత్ లో కనీసం 200 సభ్యత్వాలు చేయించడంపై దృష్టి పెట్టింది. త్వరలో జరిగే లోకల్ బాడీ ఎన్నికలను లక్ష్యంగా చేసుకుని ముందుకు పోవాలని నిర్ణయించింది. వచ్చే నెల 1వ తేదీ నుంచి ప్రారంభం కానున్న మెంబర్షిప్ డ్రైవ్ కోసం కసరత్తు ప్రారంభించింది.
రాష్ట్రంలో బీజేపీకి 8 మంది ఎమ్మెల్యేలు ఉండగా, 8 మంది ఎంపీలు ఉన్నారు. వీరితో పాటు ఒక టీచర్ ఎమ్మెల్సీ ఉన్నారు. ఇటీవల జరిగిన లోక్ సభ ఎన్నికల్లో బీజేపీ 8 చోట్ల గెలిచింది. ప్రజల నుంచి లభించిన ఈ సానుకూలతను అందిపుచ్చుకునేందుకు ఆ పార్టీ ప్రయత్నిస్తున్నది. దేశవ్యాప్తంగా పార్టీ మెంబర్ షిప్ డ్రైవ్లో భాగంగా సెప్టెంబరు 1 నుంచి తెలంగాణ సభ్యత్వ నమోదు కార్యక్రమాన్ని ప్రారంభించేందుకు కమలం నేతలు ఏర్పాట్లు చేస్తున్నారు. 45 రోజుల పాటు ఈ కార్యక్రమం నిర్వహించేందుకు సన్నాహాలు మొదలుపెట్టారు.
రెండు రోజుల క్రితం దేశవ్యాప్తంగా మెంబర్షిప్ డ్రైవ్పై ఢిల్లీలో ఆ పార్టీ చీఫ్ నడ్డా అన్ని రాష్ర్టాల ముఖ్య నేతలతో సమావేశం నిర్వహించారు. తెలంగాణలో సభ్యత్వ డ్రైవ్ ఫాలో అప్ కోసం అరవింద్ మీనన్ను ఇన్చార్జీగా నియమించారు. సభ్యత్వ నమోదుపై ఈనెల 21 రాష్ట్ర స్థాయి సన్నాహక సమావేశాన్ని బీజేపీ నిర్వహిస్తోంది. దీనికి రాష్ట్ర ఆఫీస్ బేరర్లతో పాటు జిల్లా అధ్యక్షులు, ఎమ్మెల్యేలు, ఎంపీలు, ఎమ్మెల్సీలతో పాటు మెంబర్షిప్ ఇన్ చార్జీలు, సీనియర్ నేతలు హాజరు కానున్నారు. ఈ సమావేశం తర్వాత జిల్లా, మండల, గ్రామ స్థాయిలోనూ ఈ నెలాఖరు వరకూ సన్నాహక సమావేశాలు నిర్వహించనున్నారు.
