హైదరాబాద్, వెలుగు: కాంగ్రెస్, బీఆర్ఎస్ పార్టీలు డైవర్షన్ పాలిటిక్స్కు చేస్తున్నాయని బీజేపీ ఎంపీ లక్ష్మణ్ అన్నారు. బీజేపీ, బీఆర్ఎస్ పొత్తు పెట్టుకుంటాయంటూ తప్పుడు కథనాలను సృష్టిస్తున్నారని ఫైర్ అయ్యారు. బీజేపీకి పెరుగుతున్న ఆదరణ చూసి ఓర్వలేకనే దుష్ప్రచారం చేస్తున్నారని మండిపడ్డారు. వాస్తవానికి కాంగ్రెస్, బీఆర్ఎస్ మధ్యే చీకటి ఒప్పందం ఉందని ఆరోపించారు. విజయ సంకల్ప యాత్ర రథచక్రాల కింద ఆ రెండు పార్టీలు నలిగిపోవడం ఖాయమన్నారు.
శుక్రవారం బీజేపీ స్టేట్ ఆఫీసులో మీడియాతో లక్ష్మణ్ మాట్లాడారు. అవినీతి బీఆర్ఎస్ను కాపాడేందుకు కాంగ్రెస్ ఎందుకు కాపలా కాస్తున్నదని ప్రశ్నించారు. కాళేశ్వరం, ధరణి, ఇసుక దందా వంటి వాటితో రూ.లక్షల కోట్లు కాజేసిన బీఆర్ఎస్ నేతలపై చర్యలు తీసుకోకుండా కూనిరాగాలు తీస్తున్నారని మండిపడ్డారు. లోపల చీకటి ఒప్పందాలు చేసుకుని బయట విమర్శలు చేసుకుంటున్నారని ఫైర్ అయ్యారు. విజయ సంకల్ప యాత్ర రాష్ట్ర రాజకీయాల్లో పెను మార్పులు తీసుకొస్తుందన్నారు. బీఆర్ఎస్ అవినీతి, కాంగ్రెస్ గ్యారంటీల అమల్లో వైఫల్యాలను ప్రజల్లోకి తీసుకెళ్తున్నామన్నారు.
మోదీ నాయకత్వంపై నమ్మకం
మోదీ నాయకత్వంపై ప్రజలకు నమ్మకం ఉందని లక్ష్మణ్ అన్నారు. అసెంబ్లీ ఎన్నికల్లో భిన్నమైన పార్టీలకు ప్రజలు ఓటేసినా లోక్ సభ ఎన్నికల్లో బీజేపీనే గెలిపిస్తారన్నారు. అయోధ్యలో రామ మందిరం కట్టిస్తే.. కాంగ్రెస్ నాయకులు ఆ పూజల్లో పాల్గొనలేదని ఫైర్ అయ్యారు. దేశానికి మోదీ పాలన స్వర్ణయుగమని, పదేండ్ల ఆయన పాలనలో 25 కోట్ల మంది పేదరికం నుంచి బయటపడ్డారన్నారు. ముస్లింలను సంతృప్తిపరచి హిందువులను దూషించడమే కాంగ్రెస్ గ్యారంటీ అని విమర్శించారు.
