- బీఆర్ఎస్ సర్కార్పై తరుణ్చుగ్ ఫైర్
- రూ.4,144 కోట్లను పక్కదారి పట్టించారని ఆరోపణ
హైదరాబాద్, వెలుగు: తెలంగాణలో బీఆర్ఎస్ ప్రభుత్వం భారీ అవినీతికి పాల్పడుతున్నదని, ఒకే పనిని రెండు వేర్వేరు స్కీమ్ల కింద చూపించి కేంద్ర, రాష్ట్ర నిధులను స్వాహా చేస్తున్నదని బీజేపీ స్టేట్ ఇన్చార్జ్ తరుణ్ చుగ్ ఆరోపించారు. రాష్ట్ర ప్రభుత్వం ఇలాంటి మోసానికి పాల్పడటం దేశచరిత్రలో ఇదే మొదటిసారి అని ఆదివారం విడుదల చేసిన ప్రకటనలో విమర్శించారు. ఇరిగేషన్ ప్రాజెక్టులతో పాటు నిజామాబాద్ జిల్లాలో ఆరు రోడ్డు ప్రాజెక్ట్ పనుల్లో కూడా పెద్దఎత్తున అవినీతి జరిగిందని ఆరోపించారు. ఒకే పనిని రెండు స్కీమ్ల కింద చూపించి.. రెండు సార్లు రిలీజైన నిధులను స్వాహా చేసిందని పేర్కొన్నారు.
ALSO READ :మూతపడిన కొలాం బడిని తెరిపించేదెన్నడు?
ఈ పనుల్లో రోడ్ డెవలప్మెంట్ కార్పొరేషన్తో పాటు కేంద్ర ప్రభుత్వ రంగ సంస్థలను కేసీఆర్ ప్రభుత్వం బురిడీ కొట్టించిందని విమర్శించారు. రూ.4,144 కోట్లు పక్కదారి పట్టినట్లు స్పష్టమవుతున్నదని పేర్కొన్నారు. సెంట్రల్ గవర్నమెంట్ స్కీమ్ కింద చేపట్టిన పనులు, రోడ్ డెవలప్మెంట్ కార్పొరేషన్ రుణం ద్వారా చేపట్టిన పనులు ఒకటే అని ఆరోపించారు. తొమ్మిదేండ్లలో కేంద్ర ప్రభుత్వం నుంచి రాష్ట్రానికి రోడ్ల స్కీమ్ కింద ఇచ్చిన నిధులు, రోడ్ డెవలప్మెంట్ కార్పొరేషన్ ద్వారా పొందిన రుణాలతో పాటు అన్ని ఇరిగేషన్ ప్రాజెక్టులపై సీబీఐతో విచారణ జరిపించాలని డిమాండ్ చేశారు.
