- గుండెపోటుతో బీజేపీ కార్యకర్త మృతి
- భద్రాద్రి కొత్తగూడెం జిల్లా అశ్వారావుపేటలో ఘటన
అశ్వారావుపేట, వెలుగు: భద్రాద్రి కొత్తూగూడెం జిల్లా అశ్వారావుపేటలో మంగళవారం టీవీలో ఎన్నికల ఫలితాలను చూస్తూ భావోద్వేగానికి గురైన ఓ బీజేపీ కార్యకర్త గుండెపోటుతో చనిపోయాడు. కుటుంబసభ్యుల కథనం ప్రకారం..అశ్వారావుపేటలోని శివయ్య గారి బజారుకు చెందిన చల్లా నిరంజన్ దాస్ (48) బీజేపీకి వీరాభిమాని. మంగళవారం ఎన్నికల ఫలితాలు వెలువడతాయని ఉదయాన్నే టీవీ ముందు కూర్చున్నాడు.
11 గంటల వేళలో ఎన్డీఏ కూటమి ఆధిక్యం వైపు దూసుకువెళ్తుండడంతో మళ్లీ బీజేపీ ప్రభుత్వమే వస్తుందంటూ భావోద్వేగానికి లోనయ్యాడు. వెంటనే ఛాతిలో నొప్పి వస్తోందని భార్యకు చెప్పి బైక్ పై స్వయంగా టౌన్లోని ఓ ప్రైవేట్ హాస్పిటల్ కు వెళ్లాడు. డాక్టర్కు విషయాన్ని చెప్పి బల్లపై కుప్పకూలాడు. డాక్టర్లు సీపీఆర్ చేసి మెరుగైన వైద్యం కోసం సత్తుపల్లి దవాఖానకు రెఫర్ చేశారు. అంబులెన్స్ లో సత్తుపల్లి తీసుకువెళ్తుండగా చనిపోయాడు. మృతుడికి భార్య, ఇద్దరు పిల్లలున్నారు. విషయం తెలుసుకున్న బీజేపీ లీడర్లు నిరంజన్ దాస్ మృతుడి కుటుంబానికి ధైర్యం చెప్పి అండగా ఉంటామని హామీ ఇచ్చారు.
