- 30న మండల కమిటీ ఎన్నికపై వర్క్ షాప్
హైదరాబాద్, వెలుగు : బీజేపీ సంస్థాగత ఎన్నికల ప్రక్రియ మొదలైంది. రాష్ట్రంలో సోమవారం బూత్ కమిటీల ఎన్నికలు మొదలయ్యాయి. ఎక్కడెక్కడ బూత్ కమిటీలకు సరిపడ మెంబర్ షిప్ అయిందో అక్కడ కమిటీలు వేసుకోవచ్చని బీజేపీ రాష్ట్ర ఎన్నికల కమిటీ అధికారులు ప్రకటించారు. ఈ క్రమంలోనే ఈ నెల30న బీజేపీ మండల కమిటీల ఎన్నికలపై వర్క్ షాప్ నిర్వహించనున్నారు.
స్టేట్ ఆఫీసులో జరిగే సమావేశానికి ముఖ్యఅతిథులుగా బీజేపీ ఇన్ చార్జీలు అభయ్ పటేల్, సునీల్ బన్సల్ అటెండ్ కానున్నారు. ఈ సందర్భంగా బూత్ కమిటీల ఏర్పాటుతో పాటు మండల కమిటీల ఎన్నికలపై నేతలకు సూచనలు చేయనున్నారు. రాష్ట్రవ్యాప్తంగా ఇప్పటికే 30 లక్షలకు పైగా మెంబర్ షిప్ పూర్తయినట్టు నేతలు చెప్తున్నారు. దీనిలో రెండు లక్షల సభ్యత్వంతో కరీంనగర్ జిల్లా టాప్ లో ఉండగా, ములుగు, భూపాలపల్లి చివరి స్థానంలో నిలిచినట్టు బీజేపీ నేతలు చెప్తున్నారు.
