- జిల్లాలోని అయిదు మున్సిపాలిటీల్లో వసూళ్లు అంతంతే
వనపర్తి, వెలుగు : వనపర్తి జిల్లాలోని ఐదు మున్సిపాలిటీల్లో నల్లా బిల్లులు కొండలా ఏండ్ల తరబడి పేరుకుపోతున్నాయి. వనపర్తి జిల్లా ఏర్పాటు తరువాత కొత్తగా నాలుగు మున్సిపాలిటీలు ఏర్పడ్డాయి. ఐదు మున్సిపాలిటీల్లో కలిపి అధికారిక లెక్కల ప్రకారం 27,500 నల్లాలు ఉన్నాయి. ఇందులో ఆన్లైన్లో నమోదైనవి 50 శాతం కూడా లేవు. వీటిలో 13,928 నల్లాలు మాత్రమే ఆన్లైన్లో నమోదయ్యాయి.
నత్తనడకన వసూళ్లు..
మున్సిపాలిటీల్లో నల్లా బిల్లుల వసూళ్లు నత్తనడక నడుస్తోంది. గతంలో ఇంటింటికీ తిరిగి మున్సిపల్ ఉద్యోగులు నల్లా బిల్లులను వసూలు చేసేవారు. ప్రభుత్వం ఆన్లైన్ చేయడంతో.. బిల్లుల చెల్లింపులు అంతంత మాత్రంగా ఉన్నాయి. ఇలా రూ.కోట్లలో బిల్లులు పేరుకుపోతున్నాయి. జిల్లాలో ఐదు మున్సిపాలిటీల్లో కలిపి రూ.6,81,61,000 ఉండగా, ఇప్పటి వరకు రూ.63,40,000 వసూలయ్యాయి.
జిల్లా కేంద్రంలో 6 శాతమే..
వనపర్తి మున్సిపాలిటీలో నల్లా బిల్లుల వసూలు తక్కువగా ఉంది. ఇక్కడ రూ.6 కోట్ల బకాయిలు ఉంటే రూ.40 లక్షలే వసూలయ్యాయి. అంటే 6 శాతమే వసూలయ్యాయన్నమాట. కలెక్టర్, అడిషనల్ కలెక్టర్లు మున్సిపాలిటీ నల్లా బిల్లులు, ఆస్తి పన్ను వసూళ్లపై దృష్టి పెట్టాలని పదే పదే ఆదేశిస్తున్నా ఎలాంటి ఫలితం ఉండడం లేదు. జిల్లాలోని పెబ్బేరు, ఆత్మకూరు, అమరచింత, కొత్తకోట మున్సిపాలిటీల్లో ఆన్లైన్లో నల్లా వివరాలు పూర్తి స్థాయిలో నమోదు కాకపోవడంతో వసూళ్లు అంతంతమాత్రంగానే ఉన్నాయి. కొత్తకోటలో అసలు ఆన్లైన్లోనే నమోదు కాకపోవడం గమనార్హం.
నల్లా బిల్లుల బకాయిలు ఇలా..
మున్సిపాలిటీ నల్లాలు బకాయిలు
- వనపర్తి 16,365 రూ.6 కోట్లు
- ఆత్మకూరు 3,100 రూ.10 లక్షలు
- కొత్తకోట 3,040 రూ. 32 లక్షలు
- పెబ్బేరు 2,300 రూ.30 లక్షలు
- అమరచింత 1,800 రూ.9.61 లక్షలు
