బ్లాక్హోల్.. దాని దగ్గరకుపోయే దేన్నైనా చటుక్కున లాగేసుకుని గుటుక్కున మింగేస్తుంది. అలాంటి బ్లాక్హోల్ను ఎన్నెన్నో రకాలుగా సైంటిస్టులు వివరించారు. చూపించారు. ఇప్పుడు, దాన్నే కొంచెం కొత్తగా ప్రెజెంట్ చేస్తోంది నాసా. మన చూపును ఎలా మాయ చేస్తుందో వివరించారు సైంటిస్టులు. వేర్వేరు ప్రాంతాల్లో గ్యాస్ కదలికల వల్ల ఏర్పడే లైట్తో బ్లాక్హోల్ డిస్క్ ఓ రూపు అంటూ లేకుండా వెళుతుందట. కాంతి వేగంతో దూసుకెళ్లే గ్యాస్ చుట్టూ అయస్కాంత క్షేత్రాల గాలులు ప్రభావం చూపించడం వల్ల దాని వెలుతురులో తేడాలు ఏర్పడతాయట. ఓ వైపు అమిత వేగంతో దూసుకెళ్లే గ్యాస్, మరో వైపు మాత్రం తక్కువ వేగంతో తిరుగుతుందట. ఇక, ఎడమవైపు మాత్రం మస్తు కాంతిమంతంగా ఉండే బ్లాక్హోల్ డిస్క్, కుడి వైపు మాత్రం కొంచెం చీకటిగా ఉంటుందంటున్నారు సైంటిస్టులు. దానికీ కారణముందని చెబుతున్నారు.
ఐన్స్టీన్ సాపేక్ష సిద్ధాంతం ప్రకారం, డిస్క్ చాలా వేగంతో మనవైపు వచ్చినట్టు ఉండడం వల్ల ఎక్కువ వెలుతురుతో కనిపిస్తుందట. అదే కుడివైపున మన నుంచి దూరంగా వెళుతున్నట్టు ఉండడం, వేగం తగ్గడం వల్ల కొంచెం తక్కువగా వెలుగుతుందట. అదే మనం ఆ డిస్క్పైనగానీ, కిందగానీ చూసినప్పుడు ఆ లెక్కలన్నీ తారుమారవుతాయని అంటున్నారు. కారణం, ఆ డిస్క్ మనవైపు వస్తున్నట్టుగానీ, మన నుంచి దూరంగా పోతున్నట్టుగానీ అనిపించకపోవడమేనని చెబుతున్నారు. బ్లాక్హోల్కు సరికొత్త రూపునిచ్చింది నాసా గొడ్డార్డ్ స్పేస్ఫ్లైట్ సెంటర్కు చెందిన జెరిమీ ష్నిట్మాన్.
