- సైఫ్పై కత్తి దాడి జరిగినప్పుడు తైమూర్ కన్నీళ్లు
- ఓ టీవీ ఇంటర్వ్యూలో గుర్తుచేసుకున్న బాలీవుడ్ స్టార్
ముంబై: కత్తి దాడిలో గాయపడి తాను హాస్పిటల్ వెళ్తున్నప్పుడు తన వెంట ఎనిమిదేండ్ల తన కొడుకు తైమూర్ కూడా ఉన్నాడని బాలీవుడ్ నటుడు సైఫ్ అలీఖాన్ తెలిపారు.
ఆరోజు అర్ధరాత్రి తన బాధను చూస్తూ తైమూర్ గుక్కపెట్టి ఏడ్చాడని, వచ్చీరానీ మాటలతో ‘‘నాన్నా.. నీకేమైందే? నువ్వు చనిపోతున్నవా” అని అడిగాడని ఆయన భావోద్వేగానికి గురయ్యారు. సోమవారం ఓ టీవీ ఇంటర్వ్యూలో సైఫ్ అలీఖాన్..తైమూర్ మాటలను గుర్తుచేసుకున్నారు.
‘‘జనవరి 16..ఆ రోజు అర్ధరాత్రి మా ఇంట్లోకి దుండగుడు దూరి దాడి చేస్తున్నప్పుడు ఏం జరుగుతున్నదో నాకు అర్థం కాలేదు. నా పక్కన నా వైఫ్ కరీనా కపూర్, మా ఎనిమిదేండ్ల కొడుకు తైమూర్ ఉన్నారు. నేను మామూలు దాడే అనుకున్నాను.
కానీ, వెన్నులో కత్తి దిగినట్టు ఇంట్లో వాళ్లు గుర్తించారు. నా బాధను చూసి తాళలేక తైమూర్ వెక్కివెక్కి ఏడ్చాడు. నాతోపాటు దవాఖానకు వస్తానన్నాడు. నా వెంట ఆటోలో వాడు కూడా వచ్చాడు. ఆరోజు తైమూర్ కన్నీళ్లు, వాడి మాటలు నన్ను ఎంతో కలచివేశాయి.
‘నాన్నా.. నువ్వు చనిపోతున్నవా’ అంటూ వాడు ఏడ్చేశాడు. ‘అదేం లేదు బేటా’ అని ఓదార్చాను” అని సైఫ్ భావోద్వేగానికి లోనయ్యారు. ఆరోజు హాస్పిటల్కు ఆటోలో వెళ్తున్నప్పుడు తన వెంట తైమూర్, ఇబ్రహీం(సైఫ్ మొదటి భార్య కొడుకు), ఆటో డ్రైవర్ మాత్రమే ఉన్నారని ఆయన వివరించారు.
తనను హాస్పిటల్కు తరలించేందుకు కరీనా పడిన వేదన అంతా ఇంతా కాదని అన్నారు. ‘‘దాడి జరిగిన ఆరోజు అర్ధరాత్రి నా భార్య కరీనాకపూర్ షాక్కు గురైంది. వెంటనే తేరుకొని..తెలిసిన వారికి ఫోన్లు చేసింది.
ఎవరూ స్పందించలేదు. తనే బంగ్లా పైనుంచి కిందికొచ్చి ఆటోలు, క్యాబ్లను పిలిచింది. చివరికి ఓ ఆటో డ్రైవర్ వచ్చి.. నన్ను సేఫ్గా లీలావతి హాస్పిటల్కు తీసుకెళ్లాడు.
ఇంట్లో నొప్పితో బాధపడుతున్న నాకు పనివాళ్లు హరి, గీత సపర్యలు చేశారు. వాళ్లంతా లేకపోతే నేను ఇప్పుడు ఉండేవాడిని కాదేమో” అని వ్యాఖ్యానించారు. జనవరి 16న దాడి జరిగిన తర్వాత మొదటిసారి సోమవారం సైఫ్ అలీఖాన్ ఓ టీవీ చానల్కు ఇంటర్వ్యూ ఇచ్చారు. దాడి జరిగిన రోజు తాను, తన కుటుంబం పడిన వేదనను వివరిస్తూ భావోద్వేగానికి లోనయ్యారు.
