- ప్రత్యేక ఆకర్షణగా తొట్టెల ఊరేగింపు, పోతురాజు ఆటలు
- యూకే నలుమూలల నుంచి తరలివెళ్లిన ప్రవాస భారతీయులు
హైదరాబాద్, వెలుగు : తెలంగాణ అసోసియేషన్ ఆఫ్ యునైటెడ్ కింగ్డమ్ (టాక్) ఆధ్వర్యంలో లండన్లో బోనాల వేడుకలు ఘనంగా నిర్వహించారు. యూకే నలుమూలల నుంచి సుమారు వెయ్యి మందికి పైగా ప్రవాస భారతీయులు ఈ వేడుకలకు హాజరయ్యారు. తొట్టెల ఊరేగింపు నిర్వహించారు. పోతురాజు ఆటలు ప్రత్యేక ఆకర్షణగా నిలిచాయి. లండన్ కు ఉన్నత చదువుల కోసం వచ్చిన తెలంగాణ విద్యార్థి అక్షయ్ మల్చేలం.. వారి వంశవృత్తి పోతురాజు వేషధారణ వేసి అలరించాడు. కార్యక్రమానికి ముఖ్య అతిథిగా హౌంస్లౌ నగర డిప్యూటీ మేయర్ మొహమ్మద్ షకీల్ అక్రమ్ పాల్గొన్నారు.
ఈ సందర్భంగా ఆయన మాట్లాడుతూ... యూకేలో నివసిస్తున్న తెలంగాణ ఎన్నారైలంతా సమాజ సేవలో ఎంతో క్రియాశీలకంగా పాల్గొంటారని, వీరి స్ఫూర్తి చాలా గొప్పదన్నారు. విదేశాల్లో ఉన్నా తెలంగాణ సంస్కృతి, సంప్రదాయాలను ప్రపంచానికి చాటిచెప్తున్న తీరు చాలా గొప్పగా ఉందని, టాక్ చేస్తున్న కార్యక్రమాలు ఎందరికో స్ఫూర్తినిస్తున్నాయని ఆయన ప్రశంసించారు.
ప్రముఖ నృత్య కళాకారిణి, లిమ్కా బుక్ ఆఫ్ రికార్డ్స్ గ్రహీత రాగసుధా వింజమూరి చేసిన నృత్యం వేడుకలకు ప్రత్యేక ఆకర్షణగా నిలిచింది. టాక్ అధ్యక్షుడు రత్నాకర్ కడుదుల, వ్యవస్థాపకుడు అనిల్ కూర్మాచలం, ఉపాధ్యక్షులు శుష్మణ రెడ్డి, సత్యమూర్తి చిలుముల, టాక్ ముఖ్య నాయకులు సుప్రజ పులుసు, గణేష్ కుప్పల, హరి గౌడ్, సురేష్ బుడగం, రాకేష్ పటేల్, సత్యపాల్ పింగిళి, శ్రీకాంత్, క్రాంతి తదితరులు ఈ కార్యక్రమంలో పాల్గొన్నారు.
