ఆ మూడు సీట్లపై టెన్షన్ .. బీఆర్ఎస్​పై అసంతృప్తి ఎమ్మెల్యేల తిరుగుబాటు

•  ఇటీవల రేఖా నాయక్ రాజీనామా 
•  బోథ్ ఎమ్మెల్యే బాపురావు సైతం అనిల్​కు మద్దతుపై అనుమానాలు
•  సైలెన్స్​లో ఆత్రం సక్కు

ఆదిలాబాద్, వెలుగు: బీఆర్ఎస్ అధిష్టానం ఉమ్మడి ఆదిలాబాద్ జిల్లాలోని మూడు ఎస్టీ నియోజకవర్గాల్లో ముగ్గురు సిట్టింగ్​లకు షాకిస్తూ కొత్త అభ్యర్థులను ఎన్నికలో బరిలో దించింది. బోథ్, ఖానాపూర్, ఆసిఫాబాద్ నియోజకవర్గాల్లో సిట్టింగ్​ఎమ్మెల్యేలను కాదని వారి స్థానంలో కొత్త వారికి అవకాశం ఇచ్చింది. అయితే, టికెట్ దక్కకపోవడంతో ఈ ముగ్గురు సిట్టింగులు తీవ్ర అసంతృప్తితో ఉండగా.. ఈ ప్రభావం ఎలక్షన్​పై పడుతుందని క్యాడర్​భావిస్తోంది. ఇటీవల ఖానాపూర్ ఎమ్మెల్యే రేఖా నాయక్ బీఆర్​ఎస్​కు రాజీనామా చేసి పార్టీపై తీవ్ర విమర్శలు చేశారు. ఇక్కడ బీఆర్ఎస్ అభ్యర్థి జాన్సన్ నాయక్ ను ఓడించడమే తన లక్ష్యమంటూ శపథం పూనారు. గత పదేండ్లుగా ఎస్టీ నియోజకవర్గాల్లో బలంగా ఉన్న బీఆర్ఎస్​కు ఎమ్మెల్యేల అసంతృప్తితో ఈ ఎన్నికలు సవాల్​గా మారనున్నాయి. 

సిట్టింగుల తిరుగుబాటు..

ఖానాపూర్ ఎమ్మెల్యే రేఖా నాయక్, బోథ్ ఎమ్మెల్యే రాథోడ్ బాపూరావుతో పాటు ఆసిఫాబాద్ ఎమ్మెల్యే ఆత్రం సక్కుకు బీఆర్​ఎస్​ పార్టీ ఈసారి మొండిచేయి చూపింది. దీంతో ఖానాపూర్, బోథ్ ఎమ్మెల్యేలు తిరుగుబాటు చేయగా ఆసిఫాబాద్ ఎమ్మెల్యే సైలెంట్ అయిపోయారు. ఈ క్రమంలో రెబల్ ఎమ్మెల్యేల తిరుగుబాటు కొత్త అభ్యర్థులకు ఆందోళన కలిగిస్తోంది. ఖానాపూర్​కు కేటీఆర్ ఫ్రెండ్ జాన్సన్ నాయక్​ పేరును ప్రకటించడంతో రేఖా నాయక్ ఆ పార్టీకి రాజీనామా చేసి రెబల్​గా పోటీ చేయనున్నట్లు ప్రకటించడంతో ఇక్కడ రాజకీయాలు ఆసక్తిగా మారాయి. జాన్సన్ నాయక్ ను టార్గెట్ చేస్తూ నాన్ లోకల్ అభ్యర్థి అంటూ కొత్త ప్రచారం మొదలు పెట్టారు.

ALSO READ  :- అక్టోబర్ 9న భూపాలపల్లి కలెక్టరేట్‌‌‌‌‌‌‌‌‌‌‌‌‌‌‌‌ ఓపెనింగ్‌‌‌‌‌‌‌‌‌‌‌‌‌‌‌‌ .. హాజరుకానున్న మంత్రి కేటీఆర్‌‌‌‌‌‌‌‌‌‌‌‌‌‌‌‌

 అటు బోథ్ నియోజకవర్గంలో సైతం కేటీఆర్ కు సన్నిహితుడైన అనిల్ జాదవ్​కు హైకమాండ్​ టికెట్ కేటాయించింది. దీంతో సిట్టింగ్ ఎమ్మెల్యే రాథోడ్ బాపూరావు సైతం తిరుగుబాటు చేయడం అనిల్​కు తలనొప్పిగా మారింది. ఇటీవల నిర్మల్​లో జరిగిన కేటీఆర్ సభకు సైతం బాపూరావు హాజరు కాకపోవడంతో అనిల్​కు మద్దతు తెలిపే అవకాశాలు సన్నగిల్లినట్లు కనిపిస్తోంది. ఆసిఫాబాద్ ఎమ్మెల్యే ఆత్రం సక్కుకు ఎంపీ టికెట్ ఇస్తారనే ప్రచారం జరిగినప్పటికీ.. ఇంతవరకు అధిష్టానం నుంచి ఎలాంటి హామీ రాకపోవడంతో ఆయన పూర్తిగా సైలెంట్ అయ్యారు. సిట్టింగ్​ఎమ్మెల్యేల తిరుగుబాటుతో వీరి మద్దతుదారులు ప్రస్తుత అభ్యర్థులకు సపోర్ట్​ చేస్తారా? అనే విషయం ప్రశ్నార్థకంగా మారింది. 

బీఆర్ఎస్ పై అసంతృప్తితో ఆదివాసులు

ఎస్టీ నియోజకవర్గాలు కావడంతో పార్టీ పరంగానే కాకుండా ఆదివాసీల ప్రభావం ఎక్కువగా ఉంటుంది. అయితే ఖానాపూర్, బోథ్​ నియోజకవర్గాల్లో ఆదివాసీలకు కాకుండా ఆదివాసేతరులకు కేటాయించడంతో ఈ  సెగ్మెంట్లలో ఆదివాసీ ఓటర్లు అసంతృప్తితో ఉన్నారు. తామంతా ఏకమై ఈ ఎన్నికల్లో బీఆర్ఎస్​కు బుద్ధి చెబుతామంటూ ఇప్పటికే ఆదివాసీ సంఘాలు హెచ్చరించాయి. ఓ వైపు సొంత పార్టీలో అసంతృప్తులు.. మరోవైపు నియోజకవర్గంలో ఆదివాసీ ఓటర్ల ప్రభావం ఈ ఎన్నికల్లో పార్టీకి సవాల్​గా మారే అవకాశం కనిపిస్తోంది. ఇప్పటికే ఆయా నియోజకర్గాల్లో ఆదివాసీ నేతలనే గెలిపించుకోవాలంటూ తీర్మానాలు కూడా చేశారు.