- అప్పుడు సై.. ఇప్పుడు నై!..బీఆర్ఎస్, బీజేపీ ద్వంద్వ వైఖరి
- నాడు ప్రభుత్వ భూముల వేలంతో రూ.30 వేల కోట్ల పైనే సమీకరించిన బీఆర్ఎస్
- టీజీఐఐసీ, హెచ్ఎండీఏ ఆధ్వర్యంలో వెయ్యి ఎకరాల పైనే సర్కారు భూముల అమ్మకం
- గత ప్రభుత్వ భూముల అమ్మకాల ప్రతిపాదనల్లో కంచ గచ్చిబౌలి ల్యాండ్స్ కూడా..
- కోర్టు కేసు ఉండడంతో వాయిదా వేసినట్లు చెప్తున్న ఆఫీసర్లు
- తీరా ఇప్పుడు ఆ భూముల స్వాధీనాన్ని తప్పుపడ్తున్న బీఆర్ఎస్ నేతలు
- నాడు వెయ్యి ఎకరాలు అమ్మినా చోద్యం చూసిన బీజేపీ నేతలు..ఇప్పుడు ఆందోళనలు
హైదరాబాద్, వెలుగు: హైదరాబాద్లోని కంచ గచ్చిబౌలిలో 400 ఎకరాల భూములను రాష్ట్ర ప్రభుత్వం చదును చేస్తుండడాన్ని అటు బీజేపీ, ఇటు బీఆర్ఎస్ తప్పు పడ్తున్నాయి. వేలం వేస్తారనే అనుమానంతో ఆందోళన చేస్తున్న హెచ్సీయూ విద్యార్థులకు ఈ రెండు పార్టీలు మద్దతు పలుకుతున్నాయి. నిజానికి బీఆర్ఎస్ అధికారంలో ఉన్న కాలంలో ఏకంగా వెయ్యి ఎకరాలకు పైగా భూములను టీజీఐఐసీ, హెచ్ఎండీఏ ఆధ్వర్యంలో వేలం వేయడం ద్వారా రూ.30 వేల కోట్లకు పైగా నిధులను సమీకరించారు.
నాడు టీజీఐఐసీ ఆధ్వర్యంలో హైదరాబాద్లోని అత్యంత విలువైన దాదాపు 500 ఎకరాలు అమ్మినట్లు అధికారిక లెక్కలు చెబుతున్నాయి. వీటి ద్వారానే రూ.20 వేల కోట్లు ఆర్జించారు. ఇక హెచ్ఎండీఏ ఆధ్వర్యంలోనూ మరో 500 ఎకరాలకు పైగా ప్రభుత్వ భూములను అమ్మడం ద్వారా మరో రూ.10 వేల కోట్ల పైగా సేకరించారు. కాగా, కంచ గచ్చిబౌలిలో 400 ఎకరాల భూముల కోసం హెచ్ సీయూ స్టూడెంట్లు చేస్తున్న పోరాటానికి మద్దతు పలుకుతామని తాజాగా బీఆర్ఎస్ వర్కింగ్ప్రెసిడెంట్కేటీఆర్హామీ ఇచ్చారు.
కానీ ఆయన మున్సిపల్ శాఖ మంత్రిగా ఉన్నప్పుడే ఈ 400 ఎకరాల ప్రభుత్వ భూమిని కూడా వేలం వేయాలని నాటి కేసీఆర్ సర్కారు నిర్ణయించింది. ఈ మేరకు సర్కారు భూముల అమ్మకాల ప్రతిపాదనల్లో ఈ 400 ఎకరాలను కూడా చేర్చింది. కానీ కోర్టు కేసు ఉండడంతో వేలం ప్రక్రియను వాయిదా వేసినట్లు అధికారుల్లో చర్చ జరుగుతున్నది.
బీఆర్ఎస్ భూముల పందేరం ఇలా..
గత పదేండ్ల బీఆర్ఎస్ పాలనలో తెలంగాణ రాష్ట్ర పారిశ్రామిక, మౌలిక సదుపాయాల సంస్థ (టీజీఐఐసీ), హెచ్ఎండీఏ ఆధ్వర్యంలో హైదరాబాద్ లో వేల కోట్ల విలువైన ప్రభుత్వ భూములను వేలం వేశారు. టీజీఐఐసీ ద్వారా రాయదుర్గం, ఖానామెట్, మణికొండ, నార్సింగి వంటి అత్యంత విలువైన ప్రాంతాల్లోని దాదాపు 500 ఎకరాల భూమిని, హెచ్ఎండీఏ ఆధ్వర్యంలో కోకాపేట్, ఖానామెట్, రాజేంద్రనగర్, బుద్వేల్, బాచుపల్లి, తొర్రూర్, బహదూర్పల్లి, కుర్మల్గూడ, తుర్కయాంజల్, మేడిపల్లి, కవాడిపల్లి, షాబాద్, ఉప్పల్భగాయత్లలో మరో 500 ఎకరాలకు పైగా భూములను అమ్మేశారు.
2021లో కోకాపేటలో 65 ఎకరాల భూమికి వేలం పాటలో రూ.2,729 కోట్లు వచ్చాయి. ఖానామెట్లో 24 ఎకరాల భూమిని వేలం వేసి రూ.వెయ్యి కోట్లకు పైగా సమకూర్చుకున్నారు. బుద్వేల్, రాజేంద్రనగర్లో 100 ఎకరాలతో రూ.3,625 కోట్లు , కోకాపేట్ నియోపోలిస్లో 45.33 ఎకరాలతో రూ. 3,319.60 కోట్లు, బాచుపల్లి లో రూ. 111 కోట్లు, తొర్రూర్లో రూ.400 కోట్లు మేర వచ్చినట్లు అధికారిక లెక్కలు చెబుతున్నాయి.
కోకాపేటలోనే ఎకరం రూ.100 కోట్లు పలకడం అప్పట్లో సంచలనం సృష్టించింది. ఈ స్థాయిలో ప్రభుత్వ భూములను అమ్మిన కేసీఆర్ సర్కారుపై అప్పట్లో తీవ్ర విమర్శలు వచ్చాయి. ‘పడావుపడ్డ భూములను అమ్మి సంక్షేమ పథకాలు అమలుచేయడంలో తప్పేముంది?’ అని నాటి సీఎం కేసీఆర్పలుమార్లు కౌంటర్ఇచ్చారు. తీరా ఇప్పుడు కోర్టు ద్వారా న్యాయంగా దక్కిన భూమిని ప్రభుత్వం స్వాధీనం చేసుకోవడాన్ని కూడా బీఆర్ఎస్తప్పుపట్టడంపై విస్మయం వ్యక్తమవుతున్నది. మరోవైపు నాడు వెయ్యి ఎకరాలకు పైగా భూములు అమ్ముతున్నా చోద్యం చూసిన బీజేపీ పెద్దలు ఇప్పుడు కాంగ్రెస్సర్కారుపై మాత్రం హెచ్సీయూ స్టూడెంట్లతో కలిసి ఏకంగా ఉద్యమమే చేస్తున్నారు.
వాణిజ్యపరంగా వినియోగించుకునే యోచనలో ప్రభుత్వం..
కంచ గచ్చిబౌలిలోని 400 ఎకరాల ప్రభుత్వ భూములను అభివృద్ధి చేసి వాణిజ్యపరంగా వినియోగించుకునే ఆలోచనలో కాంగ్రెస్ సర్కారు ఉన్నట్లు తెలుస్తున్నది. ఈ భూములను ఐటీ కారిడార్‌‌లో భాగంగా మార్చి, రాష్ట్రానికి దీర్ఘకాలిక ఆదాయం సమకూర్చే విధంగా ప్రణాళికలు రూపొందిస్తున్నది. తద్వారా వచ్చే ఆదాయాన్ని పేదల సంక్షేమం కోసం అమలుచేస్తున్న పథకాలకు వాడుకోవాలని భావిస్తున్నది.
అయితే, అవి హెచ్సీయూ భూములు కానప్పటికీ ఈ రెండు పార్టీల నేతలు తమ స్వార్థం కోసం విద్యార్థులను రెచ్చగొడ్తున్నారని కాంగ్రెస్ నేతలు ఆరోపి స్తున్నారు. గతంలో వెయ్యి ఎకరాలకు పైగా భూములమ్మిన బీఆర్ఎస్, ఇప్పుడు తమకు నీతులు బోధించడాన్ని తప్పు పడ్తున్నారు. ‘కంచ గచ్చిబౌలి భూముల విషయంలో బీజేపీ నేతల తీరు చిత్రంగా ఉంది.. నాడు బీఆర్ఎస్భూములమ్మితే సైలెంట్గా ఉన్నారు.. ఇప్పుడేమో గగ్గోలు పెడ్తున్నారు. కేంద్రాన్ని నిధులు అడగొద్దు అంటారు. భూములు అమ్మద్దు అంటారు. సంక్షేమ పథకాలు అమలుచేయాలని అంటారు. ఇదెలా సాధ్యం?’ అని కాంగ్రెస్కు చెందిన ఓ ఎమ్మెల్యే ప్రశ్నించారు.
