- మహిళా కమిషన్కు బీఆర్ఎస్ ఫిర్యాదు
హైదరాబాద్, వెలుగు: ఆశా వర్కర్లతో పోలీసులు అమానుషంగా ప్రవర్తించారని, మహిళల గౌరవానికి భంగం కలిగించారని మహిళా కమిషన్కు బీఆర్ఎస్ మహిళా విభాగం ఫిర్యాదు చేసింది. ఆశావర్కర్లు శాంతియుతంగా నిరసన తెలియజేస్తుంటే పోలీసులు దాడి చేశారని పేర్కొంది. మంగళవారం మహిళా కమిషన్ చైర్పర్సన్ నేరెళ్ల శారదను తుల ఉమ నేతృత్వంలోని బీఆర్ఎస్ మహిళా నేతలు కలిసి ఫిర్యాదును సమర్పించారు.
ఎన్నికల సందర్భంగా ఆశా వర్కర్ల జీతాన్ని నెలకు రూ.18 వేలకు పెంచుతామని సీఎం రేవంత్ రెడ్డి హామీ ఇచ్చారని, దానిని డిమాండ్ చేస్తూ నిరసన చేపట్టిన ఆశా వర్కర్లపై పోలీసులు దారుణంగా ప్రవర్తించారని ఫిర్యాదులో పేర్కొన్నారు. ఏసీపీ శంకర్, సీఐ శ్రీనివాస చారి నేతృత్వంలోని పోలీసులు.. ఆశా వర్కర్లను లాక్కెళ్లారని, నిర్దయగా పోలీస్ వ్యాన్లలో కుక్కి కొట్టారని చెప్పారు. ఓ ఆశా వర్కర్చీరను పట్టుకుని లాగారని, చాలా మంది ఆశావర్కర్లను మగ పోలీసులు చెంప దెబ్బలు కొట్టారని ఫిర్యాదు కాపీలో పేర్కొన్నారు.
