- అసెంబ్లీ ఎన్నికల తర్వాత మారిన సీన్
- జిల్లా ప్రెసిడెంట్ సహా సెగ్మెంట్కు దూరంగా ఓడిన లీడర్లు
- కారు దిగేసి షాక్ ఇచ్చిన ముఖ్య నేతలు
- పార్లమెంటు ఎలక్షన్ లో పెద్ద దిక్కు లేక సతమతం
నిజామాబాద్, వెలుగు: పదేండ్లు తిరుగులేని ఆధిపత్యంతో జిల్లాలో వెలుగు వెలిగిన బీఆర్ఎస్ ప్రస్తుత పార్లమెంట్ ఎలక్షన్లో ప్రతికూల రాజకీయ పరిస్థితులకు ఎదురీదుతోంది. అసెంబ్లీ ఎన్నికల తర్వాత స్టేట్లో అధికారం కోల్పోవడం ఓడిన నేతలు సెగ్మెంట్లకు అంటీముట్టనట్లు ఉండడం, ముఖ్య లీడర్లు పార్టీని వీడగా కార్యకర్తలు చెల్లాచెదురైన టైంలో లోక్సభ ఎలక్షన్ రావడం కఠిన పరీక్షగా మారింది.
పార్టీ చీఫ్ కేసీఆర్ కూతురు ఎమ్మెల్సీ కవిత అరెస్టు కానట్లయితే ఎన్నికల కోఆర్డినేషన్ బాధ్యతలు అప్పగించేవారేమో. ఇప్పుడా పరిస్థితి లేనందున ఏకవాక్యంతో క్యాడర్ను ఒక్కతాటిపై నడిపే లీడర్ షార్టేజ్ ఉంది. రాజ్యసభ సభ్యుడు కేఆర్సురేష్రెడ్డి, మాజీమంత్రి ప్రశాంత్రెడ్డి పెద్దదిక్కుగా ఆ కొరతను తీర్చే ప్రయత్నం చేస్తూ ఒడిదొడుకులు ఎదుర్కొంటున్నారు. ఈ పరిణామాల బర్డన్ అంతా అభ్యర్థి బాజిరెడ్డి గోవర్ధన్పై పడుతోంది.
టికెట్ కోసం క్యూ కట్టిన స్టేజ్ నుంచి బలవంతంగా ఒప్పించే స్థాయికి
తెలంగాణ రాష్ట్రం ఏర్పడక ముందు ఆయా పార్టీలతో పొత్తులు ఫిక్స్ చేసుకొని అసెంబ్లీ స్థానాలకు బీఆర్ఎస్ పోటీ చేసినప్పుడు టికెట్లు ఆశించే లీడర్ల సంఖ్య బాగానే ఉండేది. ఇక 2014 నుంచి 2023 దాకా అయితే మొత్తమంతా వన్ సైడే. జిల్లా పార్లమెంట్ సెగ్మెంట్‌లో మొత్తం ఏడు అసెంబ్లీ స్థానాలుండగా 2014 ఎన్నికల్లో ఒక్క జగిత్యాలలో మాత్రమే కాంగ్రెస్ గెలిచింది. మిగితా ఆరుగురు బీఆర్ఎస్ ఎమ్మెల్యేలే. 2018 ఎలక్షన్లో టోటల్ ఏడుగురు ఎమ్మెల్యేలు బీఆర్ఎస్ వారే. ఎంపీగా కవిత గెలిచాక అధినేత కేసీఆర్ కూతురు కావడంతో ఎదురులేని ఆధిపత్యం నడిపారు.
2023 జనరల్ ఎలక్షన్లో బీఆర్ఎస్ పార్టీ నుంచి బాల్కొండ, కోరుట్ల, జగిత్యాలలో ముగ్గురు ఎమ్మెల్యేలు గెలిచినా స్టేట్లో పవర్ కోల్పోవడంతో సీన్ రివర్స్ అయింది. పార్లమెంట్ స్థానంలో కవిత పోటీ చేస్తారని అంతకముందు అంతా భావించగా ఆమె 'నో' చెప్పారు. అర్బన్ మాజీ ఎమ్మెల్యే బిగాల గణేశ్ఆయన తమ్ముడు బిగాల మహేశ్ ఇలా అందరూ జారుకున్నారు. చివరకు అన్ని రకాల సహకారాలు ఇస్తామనే హైకమాండ్ భరోసాతో బాజిరెడ్డి గోవర్ధన్ను ఎంపిక చేయగా ఆయన సరేనన్నారు.
ప్రజలకు దూరంగా మాజీ ఎమ్మెల్యేలు
బీఆర్ఎస్ జిల్లా ప్రెసిడెంట్ బాధ్యతలు నిర్వహిస్తున్న ఆశన్నగారి జీవన్రెడ్డి ఆర్మూర్ అసెంబ్లీలో ఓటమి చెందాక జిల్లా పాలిటిక్స్లో యాక్టివ్గా లేరు. అర్బన్కు చెందిన బిగాల గణేశ్ గుప్తా అప్పుడప్పుడు వచ్చి వెళ్తున్నారు. పోలీస్ కేసులతో బేజారవుతూ బోధన్ మాజీ ఎమ్మెల్యే షకీల్దుబాయ్లోనే ఉంటున్నారు. మున్సిపల్ కార్పొరేషన్ మేయర్ నీతూకిరణ్ పార్టీ ప్రోగ్రామ్స్లో అంటీముట్టనట్లే ఉంటున్నారు. మార్క్ఫెడ్ ఛైర్మన్ మారమోహన్రెడ్డి, డీసీసీబీ చైర్మన్ రమేశ్రెడ్డి బీఆర్ఎస్ను వీడారు. బోధన్, ఆర్మూర్ మున్సిపాలిటీలలో గులాబీ జెండా దిగిపోయింది. మాజీ ఎమ్మెల్సీ డి.రాజేశ్వర్, జడ్పీ వైస్ చైర్మన్ రజితయాదవ్ తదితర ముఖ్య లీడర్లు కారు దిగేశారు. లోకల్ బాడీస్ ప్రతినిధులు మెజారిటీ శాతం పార్టీ నుంచి బయటకు వచ్చేశారు. లీడర్షిప్ లేక కార్యకర్తలు దాదాపు చెల్లాచెదరయ్యారు.
భుజాన వేసుకునే వారేరి..?
పార్లమెంట్ ఎన్నికలను కష్టకాలంలో బీఆర్ఎస్ ఎదుర్కొంటుండగా సమన్వయం చేసే లీడర్ లేకుండా పోయారు. ఎమ్మెల్సీ కవిత అరెస్టు కానట్లయితే ఆమెకు బాధ్యత ఇచ్చేవారే. బీఆర్ఎస్ గవర్నమెంట్ఉన్నప్పుడు పవర్ మొత్తం ఫ్యామిలీ మెంబర్స్చుట్టే తిరిగేదనే అపవాదు మధ్య మంత్రుల రోల్ లిమిటెడ్గా ఉండేది. జిల్లా మంత్రిగా ప్రశాంత్రెడ్డి పనిచేసినప్పటికీ ఆఫీసర్స్తో రివ్యూ మీటింగ్‌ల వరకే ఆయన హోదా పరిమితమయ్యేది.
పక్క సెగ్మెంట్స్లోకి తొంగిచూడడం పార్టీ కార్యకర్తలతో పరిచయాలను అనుమతించేవారు కాదు. కారణాలైవైనా సెగ్మెంట్ దాటకుండా ఎమ్మెల్యేలకు లైన్ గీసిపెట్టారు. ప్రస్తుతం పెద్దదిక్కుగా మారిన రాజ్యసభ సభ్యుడు సురేశ్రెడ్డి, మాజీ మంత్రి ప్రశాంత్రెడ్డికి హైకమాండ్ గతంలో అమలు చేసిన నియంత్రణలు ఇప్పుడు సమస్యగా మారాయి. పార్టీ మీద పట్టులేక ముందుకు వెళ్లడం ఇబ్బందవుతోంది. వీటికి ఎదురీదడం అభ్యర్థి బాజిరెడ్డి గోవర్ధన్కు తప్పనిసరిగా మారింది.
