హైదరాబాద్, వెలుగు: ఖర్చుల భారం ఒకరిది, లాభాలు మాత్రం మరొకరికి అన్నట్టు ఉంది ఓఆర్ఆర్ నిర్వహణ తీరు. గత బీఆర్ఎస్ ప్రభుత్వ నిర్వాకంతో ఓఆర్ఆర్టోల్ వసూల్ ను ప్రైవేటు సంస్థకు అప్పగించింది. కానీ, నిర్వాహణ మాత్రం హెచ్ఎండీఏకు కట్టబెట్టింది. దీంతో వన్ వే ట్రాఫిక్ లాగా ఓఆర్ఆర్ నిర్వాహణ కోసం హెచ్ఎండీఏ కోట్ల రూపాయలను ఖర్చు చేయాల్సి వస్తోంది. కానీ టోల్ వసూల్ చేస్తూ కోట్ల ఆదాయాన్ని మాత్రం లీజ్ తీసుకున్న ప్రైవేటు సంస్థ ఐఆర్బీ పొందుతోంది.
గత ప్రభుత్వ నిర్వాకం..
ఓఆర్ఆర్పై టోల్ వసూల్ చేసేందుకు లీజు తీసుకున్న ఐఆర్బీ ఇన్ఫ్రా ఆదాయం మాత్రమే తమదని, నిర్వహణ మాత్రం తమదికాదని అంటోంది. ముఖ్యంగా ఓఆర్ఆర్పై పచ్చదనం నిర్వహణ, ఇతర మరమ్మతులు, విద్యుత్ దీపాల నిర్వహణ భారం అంతా హెచ్ఎండీఏపై తోసేసింది. హెచ్ఎండీఏలో భాగమైన హైదరాబాద్గ్రోత్ కారిడార్(హెచ్జీసీ)అధికారులు ఓఆర్ఆర్ నిర్వహణ బాధ్యతలు చూస్తున్నారు. ఐఆర్బీకి లీజుకు ఇచ్చే సమయంలోనే నిర్వహణ బాధ్యతలు కూడా వారికే అప్పగించాల్సిందని, కానీ ఇప్పుడు ఔటర్ నుంచి తమకు పైసా ఆదాయం రాకున్నా నిర్వహణ తడిసిమోపెడవుతోందని అధికారులు అంటున్నారు. వీధి దీపాల నిర్వహణకే కోట్లలో బిల్లులు చెల్లించాల్సి వస్తోందని, ఇక పచ్చదనం కోసం, ఇతర మరమ్మతులకు మరింత కలిపితే ఏడాదికి దాదాపు 200 కోట్లకుపైగానే ఖర్చు వస్తోందని అధికారులు చెబుతున్నారు. గత ప్రభుత్వ హయాంలోనే ఓఆర్ఆర్ను ప్రైవేట్కు అప్పగించాలని ఏకంగా 30 సంవత్సరాల లీజు కోసం రూ. 7,380 కోట్లకు వారికి కట్టబెట్టారు. కానీ ఓఆర్ఆర్ నిర్వాహన భారాన్ని సదరు కంపెనీకే అప్పగించకుండా ప్రభుత్వమే భరించేలా ఒప్పందం చేసుకున్నారు.
ప్రైవేటు సంస్థకు లాభాల పంట
ఔటర్రింగ్రోడ్ పై టోల్ వసూలు చేసుకునేందుకు గత ప్రభుత్వం ఐఆర్ బి ఇన్ఫ్రా సంస్థకు టోల్ ఆపరేట్ ట్రాన్స్ఫర్ పద్దతిలో 30 సంవత్సరాలు లీజుకు ఇచ్చింది. టోల్ వసూలు ద్వారాగత సంవత్సరం నవంబరు నెలలో 55.6 కోట్ల ఆదాయాన్ని పొందిన ఆ సంస్థ డిసెంబరు లో రూ. 62.7కోట్ల ఆదాయాన్ని సాధించింది. ఒక్క నెలలో ఏడు కోట్లు అధికంగా రావడంతో అధికారులు సైతం విస్మయం చెందారు.
158 కిలోమీటర్ల ఔటర్ రింగ్రోడ్ పలు జాతీయ రహదారులను కలుపుతోంది. ఓఆర్ఆర్పైకి ఎక్కి దిగడానికి 44 పాయింట్లతో పాటు 22 ఇంటర్ఎక్స్ఛేంజ్ జంక్షన్లు ఉన్నాయి. భవిష్యత్లో అభివృద్ధి అంతా ఓఆర్ఆర్ చుట్టూనే ఉంటుందని భావించిన ప్రభుత్వం ఆయా ప్రాంతాల్లో తాగునీరు, ఇతర మౌలిక సదుపాయాలను కల్పిస్తోంది. రోజుకు ఔటర్ పై 1.40 నుంచి 1.45 లక్షల వాహనాలు రాకపోకలు సాగిస్తున్నాయి. ప్రస్తుతానికి నెలకు రూ. 60కోట్ల ఆదాయాన్ని పొందుతున్న సదరు సంస్థ ఇటీవల టోల్గేట్ ఛార్జీలను పెంచింది. దీంతో ఇంకా మరింత ఎక్కువ ఆదాయాన్ని పొందే అవకాశం వుంది.
చిన్న సమస్య వచ్చినా..
ఔటర్ రింగ్ రోడ్ లో చిన్న సమస్య వచ్చినా పరిష్కరించే బాధ్యతలు హెచ్ఎండీఏపై పడింది. ముఖ్యంగా భద్రత, విద్యుత్ దీపాల నిర్వహణ, మరమ్మతులు, ఔటర్ పై పచ్చదనం నిర్వహించాల్సిన బాధ్యతలను హెచ్జీసీ పరిధిలో ఉంది. కానీ లీజుకు తీసుకున్న ఐఆర్బి ఇన్ఫ్రా సంస్థ కేవలం టోల్వసూలు చేసుకోవడం పైనే దృష్టి పెట్టింది. గత ప్రభుత్వం ఔటర్ను ప్రైవేట్సంస్థకు అప్పగించడం పెద్దఎత్తున వ్యతిరేకత వచ్చింది.
ముఖ్యంగా చాలా తక్కువ మొత్తానికే లీజుకు ఇస్తున్నారన్న ఆరోపణలు వచ్చాయి. అయినా కూడా అప్పటి ప్రభుత్వం లీజుకు ఇవ్వడానికి మొగ్గుచూపి వారికి అప్పగించింది. కానీ ఇప్పుడు నిర్వహణ బాధ్యతలు తమ పై పడడంతో అధికారులు సైతం ఏమీ చేయలేని పరిస్ధితిని ఎదుర్కొంటున్నట్టు తెలిపారు.
