- రంగంలోకి కేటీఆర్, హరీశ్, కవిత!
- కీలక నేతలతో చర్చలు.. మొదలైన చేరికలు
- మున్ముందు మరిన్ని చేరికలకు ప్లాన్
హైదరాబాద్, వెలుగు: కాంగ్రెస్ కేడర్పై బీఆర్ఎస్ ఆకర్ష్ వల విసురుతున్నది. గ్రామ, మండల స్థాయిలో కాంగ్రెస్ పార్టీకి చెందిన బలమైన నేతలపై ఫోకస్ పెట్టింది. నియోజకవర్గ స్థాయిలోనూ ప్రభావం చూపగల కీలక నేతలను గుర్తించి, వారిని తమ పార్టీలో చేర్చుకునే ప్రయత్నాలు ముమ్మరం చేసింది. ఇందుకోసం మంత్రులు కేటీఆర్, హరీశ్రావు, ఎమ్మెల్సీ కవిత రంగంలోకి దిగి, బలమైన నేతలతో సంప్రదింపులు జరుపుతున్నట్లు స్థానికంగా ప్రచారం జరుగుతున్నది. గులాబీ కండువా కప్పుకుంటే రాజకీయ భవిష్యత్కు తమది హామీ అంటూ వారిలో నమ్మకం పెంచుతున్నారు.
నియోజకవర్గాల వారీగా ఎక్కడ దెబ్బకొడితే కాంగ్రెస్వీక్అవుతుందో అలాంటి నేతలపైనే ప్రధానంగా గురిపెట్టారు. రాబోయే రోజుల్లో పెద్ద ఎత్తున కాంగ్రెస్ నేతల చేరికలు ఉండేలా ప్లాన్చేస్తున్నారు. కర్నాటక అసెంబ్లీ ఎన్నికల్లో గెలుపు, కొందరు కీలక నేతల చేరికలతో జోరు మీదున్న కాంగ్రెస్పార్టీ.. కేసీఆర్ను గద్దె దించేది తామేనని చెప్తున్నది. బీఆర్ఎస్, బీజేపీలోని అసంతృప్తులను చేర్చుకొని బలం పుంజుకోవాలని ప్రయత్నిస్తున్నది. ఇదే సమయంలో కాంగ్రెస్లోని అసంతృప్త నేతలకు గాలం వేయడంతోపాటు గ్రామ, మండల స్థాయిలోని నేతలను కూడా తమవైపు తిప్పుకోవాలని బీఆర్ఎస్ ప్రయత్నిస్తున్నది.
పెద్ద టీమే పని చేస్తున్నది
రాష్ట్రంలో రెండుసార్లు అధికారంలో ఉన్న కేసీఆర్ప్రభుత్వంపై ప్రజల్లో క్రమేణా వ్యతిరేకత పెరుగుతున్నది. అధికార పార్టీ ఎమ్మెల్యేల్లో దాదాపు సగం మందిపై వ్యతిరేకత ఎక్కువగా ఉంది. దీనిని అధిగమించి మూడోసారి గెలిచి హ్యాట్రిక్ కొట్టాలని బీఆర్ఎస్ వ్యూహాలు రచిస్తున్నది. ప్రగతి భవన్ కేంద్రంగా పార్టీ చీఫ్ కేసీఆర్తో పాటు పలువురు ముఖ్యనేతలు ఇదే టాస్క్లో నిమగ్నమయ్యారు. తెరపైన కేటీఆర్, హరీశ్, కవిత కనిపిస్తున్నా.. తెరవెనుక పెద్ద టీమే పార్టీని చక్కదిద్దడం, క్షేత్ర స్థాయిలో పరిస్థితులను సానుకూలంగా మలుచుకోవడం కోసం పని చేస్తున్నది. హస్తం పార్టీకి వెన్నెముకగా ఉన్న ముఖ్య నేతలపై ఫోకస్ పెట్టారు. రాష్ట్రంలో కాంగ్రెస్ అధికారంలోకి రాదని, ఉచిత కరెంట్పై రేవంత్రెడ్డి చేసిన కామెంట్స్తో రైతులు హస్తం పార్టీకి దూరమయ్యారని.. తమతో కలిస్తే రాజకీయంగా అవకాశాలిస్తామని, ఆర్థికంగా చేయూతనిస్తామని నేతలకు బీఆర్ఎస్ టీమ్ హామీ ఇస్తున్నది. ఎక్కడెక్కడ కాంగ్రెస్ గెలిచే అవకాశముందని సర్వే సంస్థలు చెప్తున్నాయో ముందుగా ఆయా నియోజకవర్గాల్లో చేరికలకు ప్లాన్ చేస్తున్నది. తర్వాతి దశలో మిగతా అన్ని నియోజకవర్గాల్లోనూ నేతలు చేరేలా ప్రణాళికలు సిద్ధం చేస్తున్నది. ఆదివారం జహీరాబాద్కు చెందిన కాంగ్రెస్ముఖ్య నేతలు బీఆర్ఎస్లో చేరారు. హరీశ్రావు తెలంగాణ భవన్లో వారికి కండువాలు కప్పి పార్టీలోకి ఆహ్వానించారు. రానున్న రోజుల్లో హైదరాబాద్తో పాటు ఆయా జిల్లాల్లోనూ పెద్ద ఎత్తున చేరికలు ఉండేలా చర్యలు చేపట్టారు.
ALSO READ :ఎండీఏ పథకంతో ఎంతో ఆదా.. తగ్గనున్న రసాయన ఎరువుల వాడకం
ప్రభావం చూపే నేతలను గుర్తించి..!
2014 తర్వాత కాంగ్రెస్, టీడీపీల నుంచి ఎమ్మెల్యేలు, ఎమ్మెల్సీలు, పెద్ద సంఖ్యలో నేతలు గులాబీ పార్టీలో చేరారు. అప్పటికే ఆయా నియోజకవర్గాల్లో ఉన్న సొంతనాయకులు, కేడర్ను కాదని కొత్తగా పార్టీలోకి వచ్చిన వారికే ప్రాధాన్యం దక్కింది. ఈక్రమంలోనే కొందరు నేతలు కారు దిగి కాంగ్రెస్లో చేరిపోయారు. పార్టీలోనే ఉన్నా తమకు గుర్తింపు దక్కడం లేదని మరికొందరు నేతలు రగిలిపోతున్నారు. బీఆర్ఎస్లోని ఇలాంటి వారిపై ప్రత్యర్థి పార్టీలు ఫోకస్ పెంచాయి. వారిని తమ పార్టీలో చేర్చుకొని బలం పెంచుకునే ప్రయత్నాల్లో ఉన్నాయి. ఇదే సమయంలో కాంగ్రెస్ కేడర్ను తమ వైపు తిప్పుకునే ప్రయత్నాల్లో బీఆర్ఎస్ ఉంది. కొందరు మాజీ మంత్రులు, మాజీ ఎమ్మెల్యేలు, ఇతర కీలక నేతలను చేర్చుకునేందుకు వారితో బీఆర్ఎస్ టీమ్ చర్చలు జరుపుతున్నది. పెద్ద లీడర్ల చేరికలతోనే సరిపెట్టకుండా.. కాంగ్రెస్ స్థానిక నేతల చేరికలకు కూడా తెరతీసింది. గ్రామ, మండల స్థాయిలో ప్రభావం చూపించగల నేతలను ఇప్పటికే గుర్తించింది. వారితో ఆయా నియోజకవర్గాలకు చెందిన ఎమ్మెల్యేలు, ఎమ్మెల్సీలు, ఇతర నేతలు చర్చలు జరుపుతున్నారు. వారికి భరోసానిచ్చేలా కేటీఆర్, హరీశ్రావు, కవితతోనూ మాట్లాడిస్తున్నట్లు ప్రచారంలో ఉంది.
