మహబూబ్నగర్, వెలుగు: ఎలక్షన్ ఇయర్ కావడంతో రూలింగ్ పార్టీలో కొన్ని నెలలుగా టికెట్ల పంచాది నడుస్తోంది. మెజార్టీ నియోజకవర్గాల్లో సిట్టింగ్ ఎమ్మెల్యేలు, సెకండ్ కేడర్ లీడర్లు రానున్న ఎన్నికల్లో పార్టీ నుంచి టికెట్లు ఆశిస్తున్నారు. ఇటీవల పార్టీ ఆత్మీయ సమ్మేళనాలను కూడా చాలా చోట్ల లీడర్లు వేర్వేరుగా నిర్వహించారు. కొందరు ఎమ్మెల్యేలు ప్రొటోకాల్ ప్రకారం ఆహ్వానాలు పంపకుండా ఆధిపత్యం ప్రదర్శించారు. అయితే రెండు రోజుల కిందట హైదరాబాద్లో సీఎం కేసీఆర్ రాష్ట్ర ప్రతినిధుల సమావేశం నిర్వహించారు. సమావేశంలో నియోజకవర్గాల్లో లీడర్ల మధ్య ఉన్న విభేదాలను ప్రస్తావించారు. ‘మీ వ్యక్తిగత ప్రతిష్ట కోసం పార్టీని ఇరకాటంలో పెట్టొద్దు..
తీరు మార్చుకోకపోతే తోకలు కట్ చేస్త’ అని సీరియస్ వార్నింగ్ ఇచ్చారు. ఈ క్రమంలో ఉమ్మడి జిల్లాలో బీఆర్ఎస్ లీడర్ల మధ్య ఉన్న విభేదాలు ఎన్నికల నాటికి సద్దుమణుగుతాయా? అని చర్చించుకుంటున్నారు. జడ్చర్ల టికెట్ కోసం పాలమూరు ఎంపీ మన్నె శ్రీనివాస్రెడ్డి అన్న కొడుకు మన్నె జీవన్రెడ్డి ప్రయత్నం చేస్తున్నారనే చర్చ ఏడాదిన్నరగా నడుస్తోంది. ఈయన వర్గం నియోజకవర్గంలో గ్రౌండ్ వర్క్ స్టార్ట్ చేసింది.
ఎమ్మెల్యే సి.లక్ష్మారెడ్డిపై అసంతృప్తితో ఉన్న కొందరు సర్పంచులు, మండల లెవల్ లీడర్లు జీవన్కు టచ్లో ఉన్నట్లు సమాచారం. జీవన్కు అత్యంత సన్నిహితులైన కొందరు లీడర్లు ప్రతి నెలా మహబూబ్నగర్లోని ఓ హోటల్లో నియోజకవర్గంలోని మండలాల పరిస్థితిని సమీక్షిస్తున్నట్లు తెలిసింది. అయితే, ఎమ్మెల్యే ఈ విషయంపై ఎంపీతో కొన్ని నెలల కింద సీరియస్ డిస్కషన్ చేసినట్లు సమాచారం. ఎవరి హద్దులో వారుంటే మంచిదన్నట్లు చెప్పినట్లు తెలిసింది.
బీసీ ఈక్వేషన్తో..
గద్వాల నియోజకవర్గంలో జడ్పీ చైర్పర్సన్ సరిత తిరుపతయ్య, ఎమ్మెల్యే బండ్ల కృష్ణమోహన్రెడ్డి మధ్య రెండేండ్లుగా ఆధిపత్య పోరు నడుస్తోంది. మంత్రి నిరంజన్రెడ్డి జడ్పీ చైర్పర్సన్కు పరోక్షంగా సపోర్ట్ చేస్తుండడంతోనే వీరి మధ్య వర్గపోరు దారి తీసిందనే చర్చ నడుస్తోంది. జడ్పీ సమావేశాల్లోనూ వీరి మధ్య విభేదాలు బయట పడగా, ఇటీవల నిర్వహించిన పార్టీ ఆత్మీయ సమ్మేళనానికి కూడా చైర్పర్సన్కు ఆహ్వానం పంపలేదు. ఈ విషయంపై చైర్పర్సన్ పార్టీ హైకమాండ్కు కంప్లైంట్ చేశారు.
అయితే, గద్వాలలో బీసీ ఓటర్లు ఎక్కువగా ఉండడం, చైర్పర్సన్ కూడా బీసీ వర్గానికి చెందడంతో ఈసారి ఎన్నికల్లో బీఆర్ఎస్ నుంచి టికెట్ ఆశిస్తున్నారు. మంత్రి సపోర్ట్ కూడా ఉండడంతో టికెట్పై ఆశలు పెట్టుకున్నారు. కల్వకుర్తిలో సిట్టింగ్ ఎమ్మెల్యే జైపాల్యాదవ్, ఎమ్మెల్సీ కసిరెడ్డి నారాయణరెడ్డి మధ్య టికెట్ పంచాది నడుస్తోంది. పార్టీ కార్యక్రమాలను ఇద్దరూ వేర్వేరుగా నిర్వహిస్తున్నారు. మాజీ మంత్రి చిత్తరంజన్ దాస్ కూడా టికెట్ కోసం ప్రయత్నం చేస్తున్నారు. బీసీ ఈక్వేషన్లో తనకు టికెట్ ఇవ్వాలనే డిమాండ్ను తెరమీదకు తెస్తున్నారు.
పార్టీ కార్యక్రమాలకు పిలుస్తలేరు..
మక్తల్లో సిట్టింగ్ ఎమ్మెల్యే చిట్టెం రాంమోహన్రెడ్డి, బీఆర్ఎస్ లీడర్ వర్కాటం జగన్నాథ్రెడ్డి మధ్య విభేదాలు నడుస్తున్నాయి. నిరుడు ఎన్నికల్లో వర్కాటం పార్టీ నుంచి టికెట్ ఆశించినా సిట్టింగ్లకే టికెట్ కన్ఫాం కావడంతో చిట్టెం గెలుపు కోసం కృషి చేశారు. ఆ తర్వాత జరిగిన పరిణామాలతో చిట్టెం పార్టీ కార్యక్రమాలకు వర్కాటంను పిలువడం మానేశాడు. అప్పటి నుంచి వీరి మధ్య గ్యాప్ పెరిగింది. ఈసారి ఎన్నికల్లో తనకు టికెట్ దక్కుతుందనే ఆశతో ఏడాదిన్నరగా వీజేఆర్ ఫౌండేషన్ పేరుతో నియోజకవర్గంలో విస్తృతంగా సేవా కార్యక్రమాలు నిర్వహిస్తూ, ప్రజలకు దగ్గరయ్యే ప్రయత్నాలు చేస్తున్నారు.
వారసులను బరిలో దింపాలని..
అలంపూర్ ఎమ్మెల్యే డాక్టర్ వీఎం అబ్రహం ఈ ఎన్నికల్లో తన కుమారుడు డాక్టర్ అజయ్ను బరిలో దింపేందుకు ప్రయత్నిస్తున్నారు. ఎస్సీ నియోజకవర్గం కావడంతో ఇక్కడి నుంచి మాజీ ఎంపీ మందా జగన్నాథం తన కొడుకు మందా శ్రీనాథ్కు పోటీకి దింపే ప్రయత్నం చేస్తున్నారు. వీరి మధ్య ఆధిపత్య పోరుతో పార్టీ రెండుగా చీలిపోయింది. ఫైనల్గా ఎమ్మెల్సీ చల్లా వెంకట్రామిరెడ్డి ఎవరికి సపోర్ట్ చేస్తే, వారికే టికెట్ కన్ఫాం అయ్యే చాన్స్ ఉంది. మరో ఎస్సీ నియోజరవర్గమైన అచ్చంపేటలోనూ ఎంపీ పి.రాములు, ఎమ్మెల్యే గువ్వల బాలరాజు మధ్య వర్గపోరు తీవ్ర స్థాయిలో నడుస్తోంది.
ఎంపీ తన కుమారుడు పి.భరత్ను ప్రోత్సహిస్తుండడంతో తరచూ ఎమ్మెల్యే మధ్య విభేదాలు బయట పడుతున్నాయి. నెల కింద ఎమ్మెల్యే, ఎంపీ మధ్య ఫోన్లో జరిగిన మాటల యుద్ధం సోషల్ మీడియాలో వైరల్గా మారింది. నాగర్కర్నూల్ నుంచి ఎమ్మెల్సీ కుచకుళ్ల దామోదర్రెడ్డి, ఎమ్మెల్యే మర్రి జనార్ధన్రెడ్డి మధ్య విభేదాలున్నాయి. కొన్ని నెలలుగా కుచకూళ్ల పార్టీ కార్యక్రమాలకు దూరంగా ఉంటున్నారు. ఈ ఎన్నికల్లో తన కొడుకు డాక్టర్ రాజేశ్కు టికెట్ ఇప్పించాలని ప్రయత్నం చేస్తున్నారు. ఒక వేళ టికెట్ రాకుంటే కండువా మార్చేందుకు సిద్ధంగా ఉన్నారనే టాక్ నడుస్తోంది.
