కామారెడ్డి , వెలుగు: జిల్లా పరిషత్సర్వసభ్య సమావేశంలో బీఆర్ఎస్ సభ్యులే.. సమస్యలపై గళమెత్తారు. గురువారం కామారెడ్డి జడ్పీ చైర్పర్సన్దఫేదర్ శోభ అధ్యక్షతన కలెక్టరేట్లోని మీటింగ్హాల్లో జడ్పీ సర్వసభ్య సమావేశం జరిగింది. కలెక్టర్ జితేశ్వి పాటిల్, అడిషనల్ కలెక్టర్ వెంకటేశ్దొత్రే, సీఈవో సాయాగౌడ్, డీఎఫ్వో నిఖిత పాల్గొన్నారు. ఎమ్మెల్యేలు, ఎమ్మెల్సీలు, ఎంపీ మీటింగ్కు రాలేదు.
జిల్లా ఆస్పత్రి పరిస్థితులపై తల ఎత్తలేకపోతున్నం..
జిల్లా ఆస్పత్రిలో పరిస్థితులపై ప్రజల్లో తల ఎత్తలేకపోతున్నామని వైస్ చైర్మన్ ప్రేమయ్య ఆవేదన వ్యక్తం చేశారు. రాత్రి వేళ తీసుకొచ్చే పేషెంట్లను డాక్టర్లు సరిగా పట్టించుకోవడంలేదని వైస్చైర్మన్తో పాటు పలువురు సభ్యులు పేర్కొన్నారు. ‘ఇటీవల ఒక బాలుడిని కాలిన గాయాలతో తల్లిదండ్రులు ఆస్పత్రికి తీసుకువచ్చారు. అదే సమయంలో తాను కూడా అక్కడే ఉన్నాను. కానీ డ్యూటీలో ఉన్న డాక్టర్ అసలు పట్టించకోలేదు.’ అని ఆగ్రహం వ్యక్తం చేశారు. హరిసింగ్అనే డాక్టర్నిర్లక్ష్యంగా వ్యవహరిస్తున్నారని, అతడిపై చర్యలు తీసుకోవాలని డిమాండ్చేశారు. పుట్టు మూగ అయిన 25 ఏండ్ల యువకుడు సదరం క్యాంపునకు పోతే 2 ఏండ్ల కాలపరిమితితో సర్టిఫికెట్ఇచ్చారని సదాశివనగర్ జడ్పీటీసీ నర్సింహులు ప్రస్తావించారు. అర్హులైన వారికి సదరం సర్టిఫికెట్లు ఇస్తలేరని తాడ్వాయి ఎంపీపీ రాజు అన్నారు. కలెక్టర్ స్పందిస్తూ.. జిల్లా హాస్పిటల్ను తనిఖీ చేస్తానని, డ్యూటీలో లేని డాక్టర్లపై చర్యలు తీసుకుంటానని చెప్పారు. డాక్టర్ల నుంచి వివరణ తీసుకోవాలని డీసీహెచ్వో విజయలక్ష్మిని ఆదేశించారు. సదరం సర్టిఫికెట్లను డీఆర్డీవోతో పరిశీలన చేయిస్తానన్నారు.
భగీరథ నీళ్లు వారంలో మూడు రోజులు కూడా వస్తలే..
మాచారెడ్డి మండలంలోని పలు గ్రామాలకు మిషన్ భగీరథ నీళ్లు వారంలో మూడు రోజులు కూడా సరిగా వస్తలేవని, వచ్చినట్లు చూపిస్తే తాను రాజీనామా చేస్తానని ఎంపీపీ నర్సింగ్రావు ఆఫీసర్లపై గరమయ్యారు. కొన్ని హాబిటేషన్లలో భగీరథ పైపులైన్ పనులు, ట్యాంకుల నిర్మాణం కూడా పూర్తి చేయలేదన్నారు. ఎస్ఈ స్పందిస్తూ గ్రామాల్లో పరిశీలిస్తామన్నారు. పైపు లైన్ డ్యామేజ్అయినప్పుడు తప్పా.. మిగతా అన్ని రోజులు నీటిని సప్లై చేస్తున్నామన్నారు.
సన్న బియ్యం సరిగా లేవు
హాస్టల్స్, స్కూల్స్కు పంపే సన్న బియ్యం సరిగా వస్తలేవని పలువురు సభ్యులు ప్రస్తావించారు. తాము పరిశీలనకు వెళ్లినప్పుడు అన్నం దొడ్డుగా ఉంటోందని, ముద్దగా అవుతోందని దీంతో స్టూడెంట్లు తినలేక పారేస్తున్నారన్నారు. బ్యాంక్ అకౌంట్ నుంచి రూ. 4 లక్షలు ట్రాన్స్ఫర్చేసినందుకు తన తెల్ల రేషన్ కార్డు రద్దు చేశారని, జడ్పీటీసీ పరిస్థితే గిట్ల ఉంటదా? అని పిట్లం జడ్పీటీసీ శ్రీనివాస్రెడ్డి వాపోయారు. చనిపోయిన వ్యక్తుల పేరుతో డీలర్లు బియ్యం నొక్కేస్తున్నారని సదాశివనగర్ జడ్పీటీసీ నర్సింహులు ప్రస్తావించారు.
పంచాయతీ సెక్రటరీలను పర్మినెంట్ చేయాలని తీర్మానం
జూనియర్ పంచాయతీ సెక్రటరీలను పర్మినెంట్ చేయాలని జడ్పీలో తీర్మానించారు. మూడేండ్ల కాల పరిమితి ముగిసిందని, వీరు పల్లెల్లో విధులు సక్రమంగా నిర్వహించడం వల్లనే అవార్డులు వస్తున్నాయని, వెంటనే పర్మినెంట్ చేయాలని తీర్మానం చేసిన కాపీని ప్రభుత్వానికి పంపారు. 3 గంటల పాటు 8 అంశాలపై చర్చించి మీటింగ్ ముగిసిందని ప్రకటించారు. ఇంకా పలు శాఖలపై చర్చించలేదు.
సిబ్బందికి జీతాలు ఇవ్వకపోతే ఎట్లా?
పంచాయతీల్లో చేపడుతున్న పలు అభివృద్ధి పనుల గురించి డీపీవో శ్రీనివాస్రావు వివరించగానే .. జడ్పీ వైస్చైర్మన్ ప్రేమయ్య మాట్లాడుతూ.. ‘కింది స్థాయి సిబ్బంది శానిటేషన్ లేబర్స్, సెక్రెటరీలు , ఇతర సిబ్బంది పనిచేస్తేనే అవార్డులు వస్తున్నయ్.. ప్రజాప్రతినిధులుగా మనం వెళ్లి ఫొటోలు దిగి వస్తున్నాం. కానీ పంచాయతీల్లో పని చేసే సిబ్బందికి నెలల తరబడి జీతాలు ఇవ్వడం లేదు. వాళ్లకు ఇచ్చే తక్కువ జీతాలు కూడా సరిగా ఇవ్వక పోతే ఎట్లా..? ’ అంటూ ఆఫీసర్లను నిలదీశారు. బీబీపేట గ్రామ పంచాయతీలో శానిటేషన్ వర్కర్ఉరేసుకుని చనిపోతే ఆఫీసర్లు ఎందుకు రాలేదని ప్రశ్నించారు. ప్రతి నెలా జనరల్ ఫండ్ నుంచి జీతాలు అందేలా చూడాలని కోరారు. తగిన చర్యలు తీసుకుంటామని డీపీవో చెప్పారు.
