- మూసీ పరిహారంపై కేంద్రానికి చెప్పినవి అబద్ధాలు: హరీశ్ రావు
హైదరాబాద్, వెలుగు: మూసీ బాధితులకు పునరావాసం, పరిహారంపై కేంద్రాన్ని, పార్లమెంట్తో పాటు ప్రజలనూ కాంగ్రెస్ సర్కారు తప్పుదోవ పట్టించిందని బీఆర్ఎస్ ఎమ్మెల్యే హరీశ్ రావు ఆరోపించారు. కేంద్రానికి చెబుతున్నదొకటైతే ఇక్కడ అమలు చేస్తున్నది మాత్రం వేరేలా ఉందని అన్నారు. మూసీ బాధితులకు పరిహారం విషయంలో భూసేకరణ చట్టం 2013ను అమలు చేస్తున్నామంటూ పచ్చి అబద్ధం చెప్పారన్నారు. పార్లమెంట్లో బీఆర్ఎస్ ఎంపీ అడిగిన ప్రశ్నకు భూసేకరణ చట్టం 2013ను రాష్ట్రం అమలు చేస్తున్నదని కేంద్రం సమాధానం చెప్పిందన్నారు.
కానీ, అది జరగడం లేదన్నారు. గురువారం ఆయన తెలంగాణ భవన్లో మీడియాతో మాట్లాడారు. చట్టం ప్రకారం ముందుగా బాధితులను గుర్తించాల్సి ఉంటుందని, కానీ, ఎక్కడా అలా చేయలేదని విమర్శించారు. మూసీ విషయంలో నోటీసులు, డీపీఆర్లు, ఎన్యూమరేషన్ వంటివేవీ లేవని పేర్కొన్నారు. అవేవీ లేకుండానే మూసీ ఒడ్డున ఉన్న ఇండ్లను ఖాళీ చేయించారన్నారు. ఈ విషయంలో పార్లమెంటుకు చెప్పిన అంశాలపై చర్చించేందుకు సిద్ధమని.. ఎక్కడికి రావాలో సీఎం చెప్పాలని డిమాండ్ చేశారు.
