- తొక్కిసలాట ఘటనను రాజకీయం చేస్తున్నరు: హరీశ్
హైదరాబాద్/సికింద్రాబాద్, వెలుగు: సంధ్య థియేటర్ వద్ద జరిగిన తొక్కిసలాట ఘటనను ప్రభుత్వం రాజకీయం చేస్తున్నదని బీఆర్ఎస్ ఎమ్మెల్యే హరీశ్రావు అన్నారు. సినిమా వాళ్లను భయపెట్టి, మంచి చేసుకోవాలని సీఎం రేవంత్ రెడ్డి ప్రయత్నిస్తున్నారని మండిపడ్డారు. తొక్కిసలాటలో తీవ్రంగా గాయపడి సికింద్రాబాద్ లోని కిమ్స్ ఆస్పత్రిలో చికిత్స పొందుతున్న శ్రీతేజ్ను గురువారం బీఆర్ఎస్నేతలతో కలిసి హరీశ్ రావు పరామర్శించారు. శ్రేతేజ్కు మెరుగైన వైద్యం అందిస్తున్నట్టు డాక్టర్లు చెప్పారని, అతను త్వరగా కోలుకోవాలని హరీశ్ అన్నారు.
‘‘తొక్కిసలాట ఘటన దురదృష్టకరం. రేవతి తన ప్రాణాన్ని అడ్డుపెట్టి కొడుకు ప్రాణాలు కాపాడింది. రేవతి మృతి ఆ కుటుంబానికి తీరని లోటు. ఆమె ఆత్మకు శాంతి చేకూరాలని దేవుణ్ని ప్రార్థిస్తున్నం” అని పేర్కొన్నారు. ‘‘తొక్కిసలాట జరిగిన తర్వాత 12 రోజులకు మంత్రులు, ముఖ్యమంత్రి స్పందించారు. అంతకుముందు ఎందుకు మాట్లాడలేదు?” అని హరీశ్ ప్రశ్నించారు.
