హైదరాబాద్, వెలుగు: సెంట్రల్ యూనివర్సిటీని కాపాడుకునేందుకు విద్యార్థులు రోడ్డెక్కాల్సిన పరిస్థితి వచ్చిందని బీఆర్ఎస్ ఎమ్మెల్యే జగదీశ్ రెడ్డి అన్నారు. కాంగ్రెస్ అంటేనే కేసులు, లాఠీచార్జీలు అని విమర్శించారు. బుధవారం ఆయన తెలంగాణ భవన్లో మీడియాతో మాట్లాడారు. విద్యార్థులను పెయిడ్ బ్యాచ్ అంటూ మంత్రులు అవమానకరంగా మాట్లాడారని, కానీ అసలు పెయిడ్ బ్యాచ్ సీఎం, మంత్రులేనని విమర్శించారు. పీసీసీ, సీఎం, మంత్రి పదవులన్నీ పేమెంట్తోనే వస్తున్నాయని ప్రజలకు తెలుసన్నారు. ప్రస్తుతం మంత్రి పదవులు పొందినవాళ్లంతా పేమెంట్లతోనే పొందారని ఆరోపించారు. దీనిపై మాట్లాడినవాళ్లంతా గుంటనక్కలేనడం దారుణమన్నారు.
ఉమ్మడి ఏపీలో హెచ్సీయూ భూములను ప్రైవేటోళ్లకు ఇచ్చేందుకు అప్పటి సీఎం చంద్రబాబు నాయుడు ప్రయత్నించారని.. కాంగ్రెస్, బీఆర్ఎస్ అడ్డంపడుతున్నాయని నాడు టీడీపీలో ఉన్న రేవంత్ రెడ్డి అన్నారని చెప్పారు. ఇప్పుడు చంద్రబాబు బాటలోనే రేవంత్ నడుస్తున్నారని విమర్శించారు. హెచ్సీయూ భూములపై బీజేపీ, కాంగ్రెస్ కలిసి నాటకం ఆడుతున్నాయన్నారు.
