- విజయోత్సవాల్లో సంస్కృతిని మంటగలిపారు
హైదరాబాద్, వెలుగు: కాంగ్రెస్ ఏడాది పాలన విజయోత్సవాల్లో తెలంగాణ సంస్కృతిని మంటగలిపారని బీఆర్ఎస్ ఎమ్మెల్యే జగదీశ్రెడ్డి అన్నారు. సాంస్కృతిక కార్యక్రమాల పేరిట సినిమా పాటలు పాడించారన్నారు. తెలంగాణ సంస్కృతిని ధ్వంసం చేశారని ఫైర్ అయ్యారు. మంగళవారం తెలంగాణ భవన్లో ఎమ్మెల్సీ పోచం పల్లి శ్రీనివాస్ రెడ్డి, ఇతర నేతలతో కలిసి ఆయన మీడియాతో మాట్లాడారు.
తెలంగాణ భాష, యాసను ఉమ్మడి రాష్ట్రంలో తొక్కేశారని, నాడు తెలంగాణ పదాన్నే అసెంబ్లీలో నిషేధించే స్థాయికి వెళ్లారని గుర్తుచేశారు. తెలంగాణ ఉద్యమం నుంచే తెలంగాణ తల్లి పుట్టిందని తెలిపారు. ఆ తల్లి దేవతామూర్తిలా ఉండి ఉద్యమానికి ప్రేరణగా నిలిచిందని వెల్లడించారు. ఇప్పుడు తెలంగాణ తల్లి పేరుతో ఏ రూపాన్ని ప్రతిష్టించారో అందరికీ తెలుసన్నారు.
తెలంగాణ తల్లిని చంపుతామని తుపాకీ పట్టుకుని బయల్దేరినవాళ్లే నేడు కొత్త తల్లిని తీసుకొచ్చారని విమర్శించారు. కిరాయి రాతగాళ్లు రాసిచ్చిన స్క్రిప్ట్నే సీఎం చదివారని మండిపడ్డారు. ఇది తెలంగాణ సంస్కృతిపై జరుగుతున్న భయంకరమైన దాడి అని తెలిపారు. తెలంగాణ తల్లి విగ్రహావిష్కరణ పేరిట అడ్డమైన పాటలు పాడారని ఫైర్ అయ్యారు. సమైక్యవాదులు 80 ఏండ్ల కిందట పన్నిన కుట్ర మళ్లీ ఇప్పుడు మొదలైందని జగదీశ్ రెడ్డి పేర్కొన్నారు.
