ఎలక్షన్​ ట్రాన్స్​ఫర్ల​ కోసం నేతల​ పైరవీలు

•     రెవెన్యూ శాఖలో మొదలైన హడావుడి
•     2 రోజుల కింద ఆరుగురి బదిలీ వివాదాస్పదం

‌‌నిజామాబాద్, వెలుగు: ఎలక్షన్లలో తమకు అనుకూలంగా పనిచేసే ఆఫీసర్ల కోసం రూలింగ్​పార్టీ ఎమ్మెల్యేలు వేట మొదలుపెట్టారు. ప్రస్తుతం పనిచేస్తున్న వారి ద్వారా ఆరాలు తీస్తున్నారు. రెవెన్యూ శాఖలో ఇందుకు సంబంధించిన ట్రాన్స్​ఫర్ల సందడి నడుస్తోంది. ఎలక్షన్​ కమిషన్​నిబంధనల ప్రకారం ఒకే చోట మూడేళ్ల సర్వీసు పూర్తయి, జిల్లా స్థానికత ఉన్న ఆఫీసర్లు అక్కడ ఎన్నికల విధులు నిర్వహించడానికి వీల్లేదు.

సర్దుబాటుకు ప్లాన్​..

అన్ని రాజకీయ పార్టీల లీడర్లు ఎన్నికల మూడ్​లోకి వచ్చేశారు. మరోసారి పోటీకి సిద్ధమవుతున్న రూలింగ్ ​పార్టీ ఎమ్మెల్యేలు ప్రతికూలతలను సెట్​చేసుకునే పనిలో పడ్డారు. తమ నియోజకవర్గాల్లోని సెకండ్ ​క్యాడర్ ​లీడర్లు, కార్యకర్తల అలకలను సరిచేసుకోడానికి బుజ్జగింపులకు దిగారు. అన్నింటికీ మించి వారి దృష్టి ఎలక్షన్లు నిర్వహించే అధికారుల పోస్టింగ్​లపై పడింది. ఎన్నికల నోటిఫికేషన్​రాకముందే తమకు అనుకూలమైన వారికి పోస్టింగ్​లు ఇప్పించేందుకు ప్రయత్నాలు చేస్తున్నారు.

ఆరుగురు తహసీల్దార్​ క్యాడర్ ​పోస్టులకు.. 

రెండు రోజుల కింద తహసీల్దార్​ క్యాడర్ ​పోస్టులకు సైలెంట్​గా పోస్టింగ్​ ఆర్డర్లు ఇచ్చారు. ఇవి రెవెన్యూ శాఖలో పెద్ద దుమారం రేపుతున్నాయి. లీడర్ల కనుసన్నల్లో పెద్దాఫీసర్లు పనిచేస్తున్నారనే విషయం ఈ ట్రాన్స్ ఫర్ల ద్వారా స్పష్టమవుతుంది. ఎలక్షన్ ​కమిషన్​నిబంధనల మేరకు బదిలీ అయ్యే అవకాశమున్న ముగ్గురు తహసీల్దార్లను కలెక్టరేట్​లో సూపరింటెండెంట్​లుగా ట్రాన్స్​ఫర్ ​చేస్తూ ఆర్డర్స్​జారీ చేసి, ప్రస్తుత మండలాల్లోనే డిప్యూటేషన్​లో తహసీల్దార్లుగా కొనసాగాలని ఆదేశిస్తూ ఉత్తర్వులు విడుదల చేశారు.  కలెక్టరేట్​లోని ముగ్గురు సూపరింటెండెంట్​లకు తహసీల్దార్​ పోస్టుల్లో మండలాలకు ట్రాన్స్​ఫర్ చేసి, యథాస్థానంలో డిప్యూటేషన్​లో కొనసాగాలని ఆర్డర్స్​ వెలువడ్డాయి. అంటే కేవలం పేపర్ల వరకే ట్రాన్స్​ఫర్ ఆర్డర్స్ ​ఉంటాయి.

 ఇటు నేను.. అటు నువ్వు

రూలింగ్​ పార్టీ ఎమ్మెల్యేలకు ఎన్నికల్లో సహకారించేందుకు చాలా మంది ఆఫీసర్లు పరస్పర అవగాహనతో ట్రాన్స్​ఫర్లకు సిద్ధపడుతున్నారు. ఆర్డీవో హోదాలోని రిటర్నింగ్​ఆఫీసర్​(ఆర్ వో), నియోజకవర్గ కేంద్రంలో తహసీల్దార్​స్టేటస్​లోని అసిస్టెంట్​రిటర్నింగ్​ఆఫీసర్ల (ఏఆర్​వో) విషయంలో  ఇది కనపిస్తోంది. ఆర్మూర్​కు జగిత్యాల జిల్లా నుంచి ఒక ఆఫీసర్​ ఆర్​వోగా రానున్నట్లు సమాచారం.  ఆయన్ను సిఫార్సు చేసిన జిల్లా ఆఫీసర్ ​ఖాళీ అవుతున్న అక్కడి జగిత్యాల జిల్లా పోస్టుకు వెళ్లనున్నట్లు సమాచారం. కామారెడ్డి జిల్లా నుంచి ఒక ఆఫీసర్ ​బీఆర్ఎస్ లోని ఒక పెద్ద మనిషి కోసం ఇటు రావడానికి గ్రీన్​సిగ్నల్​ ఇచ్చినట్లు తెలుస్తోంది.

బాల్కొండకు ఎవరు?

బాల్కొండ నియోజకవర్గానికి రిటర్నింగ్​ఆఫీసర్​(ఆర్​వో) గా ఎవరనే విషయం ఆసక్తికరంగా మారింది. గతంలో జడ్పీ సీఈవో అక్కడి ఆర్వోగా వ్యవహరించేవారు. ఈ సారి మార్పులకు అవకాశం ఉందని ఆఫీసర్ల మధ్య చర్చ నడుస్తోంది. మున్సిపల్​కార్పొరేషన్​ కమిషనర్ ​అర్బన్​ నియోజకవర్గానికి ఆర్ వోగా పనిచేస్తారు. ప్రస్తుతం ఇన్​చార్జి కమిషనర్​గా ఐఏఎస్​అధికారిణి చిత్రామిశ్రా వ్యవహరిస్తుండగా, ఆమెకు ఇక్కడి ఎన్నికల విధులు ఇవ్వకపోవచ్చని తెలుస్తోంది.  

  ​ఆఫీసర్​ కోసం వెతుకులాట..

జిల్లాలో రెండు నియోజకవర్గాల పరిధిలో ఆఫీసర్ల ట్రాన్స్​ఫర్​ చిక్కుగా మారింది. ఇద్దరు ఎమ్మెల్యేలకు ఉపయోగపడే రీతిలో అడ్జెస్ట్​ అయ్యే వారికోసం పైస్థాయిలో అన్వేషణ కొనసాగుతోంది. ఎవరి పరిధిలో వారు తమకు అనుకూలమైన ఆఫీసర్ల కోసం వెతుకుతున్నారు.